YƐSÃÃ 144:1-11

¹Dɑfiti yɛ̀nfɛ̀. N Yiɛ̀ nKuyie nyètìrì ndɛu, kuù tu dipèrì dìì n kɑ̃nkɛ́, kuù kpénkùnko m bɑɑ̀ mmudoò kpɛ́í, kɛ kpénkùnko n nɔu dikpɑ̀nnì kpɛ́í.

²Kuù n dɔ̀ɔ̀ri mɛsɑ̀ɑ̀ nkɛ̀ kuù tu n kó tɛcɛ̃kpetɛ̀, n cɛ̃diɛtɛ̀, n dɛɛtíwè, n kó kudɔpìkù, n sɔri dɛ̀, kuù te kɛ̀ ibotí m búɔ́.

³N Yiɛ̀ nKuyie, we ntu onìtì kɛ dò nhɑ́ ndɑkɛ o kpɛ́í? Onìtì yie ntu we kɛ dò nhɑ́ nyɛ̃́ o kpɛ́í.

⁴Onìtì dònnɛ̀ muyɑɑ́ mmu, kòo we pɛ̃nkɛ́ mɛdɛ́ɛ̀ nkɔ̃mɛ.

⁵N Yiɛ̀ nKuyie nkpɛ́ú ntiwɛtì kɛ́cútɛ́ní, kɛ́kɑ́ɑ́kɛ́ yɛtɑ̃rɛ̀ kɛ̀ yɛ̀ɛ̀ cɔ̀útɛ́.

⁶Duɔnní itɑpíɛ kɛ̀ ìì ciɛ́ n dùɔ̀ntɔbɛ̀, tɑ̃ũ ɑ pie nkɛ̀ bɛ̀ɛ cíɛ́tɛ́.

⁷Youtɛní ɑ nɔ̀ùtɛ̀ dɛĩ́nkɛ̀ kɛ́ n dɛɛtɛ́, kɛ́ n dennɛní kubinku miɛkɛ, kɛ́ n dɛɛtɛ́nɛ̀ bɛkpɑ́kpɑ̀rìbɛ̀.

⁸Bɛ̀ɛ̀ nɑ́ɑntɛ siyɑ́ɑ̀bìsí, bɛ̀ɛ̀ ɔ̃ɔ̃ mpɑriku kɛ nɛ́ soú.

⁹Kuyie n yóó dɑ dentɛ̀ fɛyɛmpɑ̀nfɛ̀ nfɛ, kɛ́mbiennɛ̀ kukùtìdùkù iwɛ̃ĩ tɛpíítɛ̀ kɔku.

¹⁰Fɔ̃́ nwèè ɔ̃ nte kɛ̀ bɛkpɑ̀ɑ̀tìbɛ̀ɛ nɑ, fɔ̃́ nwèè dɛɛrí mí nhɑ kóo tɔ̃ntì Dɑfiti.

¹¹N dɛɛtɛ́, n fietɛ bɛkpɑ́kpɑ̀rìbɛ̀ nɔu miɛkɛ, bɛ̀ nɑ́ɑntɛ siyɑ́ɑ̀bìsí nsi. Bɛ̀ ɔ̃ mpɑrìkumu kɛ nɛ́ soú.