Womu Duro 6

1

2

3

4

5

6

7

8

¹mɑnɑ wunɛn kĩnɑsi wi, u dɑ, wunɛ wi ɑ kurɔbu kpuro burɑm kere. Berɑ mɑnɑ u ɡɛre, kpɑ su kɑ nun wi kɑsu.

²nɛn kĩnɑsi u dɑwɑ win dɑ̃ɑ ɡbɑɑrɔ, mi turɑre bii wɑ̃ɑ yi yi kpiibu wee, u kɑ win sɑbenu kpɑrɑ kpɑ u biibii bɔɔri.

³Nɑ sɑ̃ɑwɑ nɛn kĩnɑsiɡii, mɑ u mɑɑ sɑ̃ɑ nɛɡii. U win sɑbenu kpɑrɑmɔ biibiin suunu sɔɔ.

⁴ɑ ɡirimɑ mɔ nɡe wuu ɡe bɑ mɔ̀ Tirisɑ. Nɛn kĩnɑsi, ɑ wɑ̃ nɡe Yerusɑlɛmu. A nɑnum mɔ nɡe tɑbu sĩɑ kɑ yen ɡidi bɔrɑ.

⁵A ku mɑɑ mɑn mɛɛri. Domi wunɛn nɔni yi nɛn kĩru seeyɑmɔ. Wunɛn seri yi sɑ̃ɑ nɡe boo wuuru te tɑ sɑrɑmɑmɔ Gɑlɑdin ɡuurun wɔllun di.

⁶Wunɛn donnu nu buriri nɡe yɑ̃ɑ nìn sɑnsu bɑ bɔɔrɑ nu nim nɔrum wee, nu mɑɑ nɔɔ nɛwɑ swɛɛ swɛɛ, nin ɡɑrɑ kun kɑnde.

⁷Wunɛn bɑɑnu nu bɑllimɔwɑ nɡe dire sɔnsɔm biɑ wunɛn sɔnditiɑn wɛ̃rin di.

⁸Sinɑnibun ɡeerɑ sɑ̃ɑwɑ wɑtɑ, sinɑ kurɔbu mɑɑ wɛnɛ. Wɔndiɑbɑn ɡeerɑ kun nɔru mɔ be.

⁹Adɑmɑ nɛn kĩnɑsi wi, u ǹ bɑu mɔ, u sɑ̃ɑwɑ nɛnɛm be sɔɔ. U sɑ̃ɑwɑ win mɛron bii wɔndiɑ teereru te u kĩ too. Wɔndiɑ be bɑ nùn wɑ, bɑ nɛɛ, u sɑ̃ɑwɑ domɑruɡii. Sinɑnibu kɑ bɑn sinɑ kurɔbu bɑ mɑɑ nùn siɑrɑ bɑ nɛɛ,

¹⁰wɑrɑ u yɑrimɑm wee nɡe buruku sɔ̃ɔ. Wɑrɑ u wɑ̃ mɛ nɡe suru. Wɑrɑ u bɑllimɔ nɡe sɔ̃ɔ. U nɑnum mɔ nɡe tɑbu sĩɑ kɑ yen ɡidi bɔrɑ.

¹¹Nɑ dɑ dɑ̃ɑ ɡbɑɑrɔ mi dɑ̃ɑ mɑrum wɑ̃ɑ, n kɑ wɑ yɑkɑsu sù n kpiɑ wɔwɑɔ, kpɑ n wɑ resɛm tɔ̃kɑ yɑ̀ n kpɑrɑ, kpɑ n mɑɑ wɑ dɑ̃ɑ te bɑ mɔ̀ ɡerenɑdi tɑ̀ n wɛ̃su sɑ̃ɑ.

¹²Nɑ ǹ kɑ bɑɑru nɛn bwɛ̃rɑ mɑn suɑ, yɑ mɑn doke nɛn tɔmbun tɑbu kɛkɛbɑn suunu sɔɔ yi dumi ɡɑwe.