Än Salomon Köl 6

1

2

3

4

5

6

7

8

¹Ia ätewe mi wor tongan me reöm a feila ie, en mi liöch seni fefin meinisin? Ia a feila ie, pwe aipwe etuk le kütta?

²Ätewe mi wor tongan me rei a feila ren tanipin we ia ekewe irän nofitin mongö ra mär ie. Ikenan epwe foleni nöün pwiin sip o fichifich kiop.

³Aüküki me ren, ngang nöün, nge aükükün me rei, i nei. A foleni nöün pwiin sip lein ekewe kiop.

⁴En mi wor tongom me rei, ka liöch usun ekewe telinimw Tirsa me Jerusalem, nge ka pwal eniwokus usun eu mwichen sounfiu fän ar filäik.

⁵Kopwe akulu mesom seniei, pun üa tiperukoruk rer. Meten mökürom a usun chök epwi pwiin kuuch ra tötiu me won ekewe chukun Kiliat.

⁶Ngiim ra pwech usun chök epwi pwiin sip ra liwinto seni ar lenien tütü. Ir meinisin a wor nöür lippwe, esap wor eman me leir a aemanüla.

⁷Sapom ra woparapar fän pwölüpwölün won mesom usun chök pekin apel.

⁸A wor wone kiwinnen ewe king me walik ülüpwülüan, pwal föpwül resap lea.

⁹Nge ngang üa chök tongei eman, neminewe mi liöch usun eman lisom. I chök eman won inan, a pwal lieson me won. Lupwen ekewe föpwül ra küna, ra apasa pwe a feiöch, nge kiwinnen ewe king me ülüpwülüan meinisin ra mwareiti.

¹⁰Iö we a ling usun chök mallen rän, a tinöch usun maram o saramaram usun akkar, nge a pwal eniwokus usun eu mwichen sounfiu fän ar filäik?

¹¹Üa feitiu ren ewe tanipin almont, pwe üpwe nengeni ekewe irä mi pwüküfö lon ewe lemol, pun üa mochen silei ika ekewe irän wain ra sawit, ika ekewe apel ra ua.

¹²Iwe, üse mörüei mwo, nge ai mochen a nukieila won wän nei aramas woken, pwe üpwe ar samol.

¹³Kopwe liwinto, kopwe liwinto, en föpwülün Sulam, kopwe liwinto, kopwe liwinto pwe aipwe tongeni atolok. Mwän Pwota oua mochen katol ewe föpwülün Sulam, lupwen a pwörük lefilen ruu telin chon katol?