Womu Duro 7

1

2

3

4

5

6

7

8

¹ɑ ɡɔsirɑmɑ, ɑ ɡɔsirɑmɑ, Sunɛmun bii, ɑ ɡɔsirɑmɑ su nun mɛɛri. Mbɑn sɔ̃nɑ i nɛ Sunɛmun bii mɛɛrɑ nɡe wi u yɑɑmɔ tɔn wuunu yirun bɑɑ sɔɔ.

²wɔndiɑ bɛɛrɛɡii, wunɛn nɑɑsu su wɑ̃ sɑlubɑtɑ sɔɔ. Wunɛn pɔrɑ yɑ wɑ̃wɑ nɡe sɑbɑ. Wi u ye kuɑ mɔmɔn tiiwɑ.

³Wunɛn bwĩirun ɡirɑ yerɑ sɑ̃ɑwɑ bwɛrɛrɛ nɡe nɔrɑn nɔɔ ye yɑ ku rɑ tɑm kpe. Wunɛn bɔsɔ ɡɑ swɛ̃ri nɡe ɑlikɑmɑ ye bɑ kɑ biibii sikerenɛ.

⁴Wunɛn bwɑ̃su sɑ̃ɑwɑ nɡe yɑɑ kpikun binu yiru.

⁵Wunɛn wĩiru tɑ buririwɑ nɡe suunu donnu. Wunɛn nɔni yi dɛɛrewɑ nɡe Hɛsibonin yɛru si su wɑ̃ɑ wuu bɔkɔ ɡen kɔnnɔn bɔkuɔ. Wunɛn wɛ̃ru tɑ dɛndewɑ mɑm mɑm nɡe Libɑnin kɔ̃su yeru te tɑ Dɑmɑsi mɛɛrɑ.

⁶Wunɛn wirɑ suɑrewɑ nɡe ɡuu te bɑ mɔ̀ Kɑɑmɛli. Mɑ wunɛn tɑrɑ yɑ bɑllimɔ nɡe beku ɡobiɡiru sere yɑ sinɑ bokon bwɛ̃rɑ kpuro mwɑ.

⁷Wunɛn burɑm bɑndɑ, ɑ mɑn wɛ̃re too. Wunɛ sɔɔrɑ nɛn kĩru kpuro wɑ̃ɑ.

⁸Wunɛn wɑsi yi dɛndewɑ nɡe kpɑkpɑ bɑ̃ɑ. Wunɛn bwɑ̃su su sɑ̃ɑwɑ nɡe dɑ̃ɑ mɑrum swɑɑru.

⁹Nɑ nɛɛ, kon kpɑkpɑ yɔwɑ kpɑ n yen mɑrum nɛnɛ. Wunɛn bwɑ̃su su sɑ̃ɑwɑ nɡe resɛm swɑɑru. Wunɛn wɛ̃siɑru tɑ nuburu do nɡe dɑ̃ɑ mɑrum mɛ bɑ mɔ̀ pɔmu.

¹⁰Nɑ̀ n nun sɔ̃su, nɑ rɑ n nuku dobu mɔ nɡe wi u tɑm durom nɔrɑ. Kurɔ u nɛɛ, tɑm mɛ, mu kokuo nɛn kĩnɑsin sɔ̃ mu du win nɔɔ sɔɔ ù n dweeyɑmɔ.

¹¹Nɑ sɑ̃ɑwɑ nɛn kĩnɑsiɡii, mɑ win kĩru kpuro wɑ̃ɑ nɛ sɔɔ.

¹²nɛn kĩnɑsi, ɑ yɑrimɑ su dɑ bɑru kpɑɑnɔ kpɑ sɑ n wɑ̃ɑ mi.

¹³Bururu sɑ ko se su dɑ dɑ̃ɑ ɡbɑɑrɔ, su wɑ resɛm tɔ̃kɑ kɑ dɑ̃ɑ te bɑ mɔ̀ ɡerenɑdi yɑ̀ n kpɑre yɑ wɛ̃su sɑ̃ɑ. Miyɑ kon nun kĩru sɔ̃ɔsi.

¹⁴Dɑ̃ɑ te bɑ mɔ̀ mɑndɑrɑɡore tɑ ten turɑre yɛ̃kɑmɔ. Bɛsɛn yɛnu kɔnnɔwɔ, sɑ dɑ̃ɑ mɑrum kpuro mɔ mɛ mu dobu bo, ɡinɑkuɡim kɑ ɡisɔku ɡeɡim. Nɑ mɛ kpuro yii wunɛn sɔ̃ nɛn kĩnɑsi.