Tuni Bidi Dabego Po Elalubo Buku Si 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Te Rehoboam aga Jerusalemba saboligi pelama, agai bomai Juda hani ami bidi me Benjamin hanigo bomai ami bidi dabe i olama sisinagasali. Te ami bidi dabego namba te 180,000 usu nama asali. Rehoboamgo homugo augwali te Israel dabe dali te not badu hwįgi pomainao homu yali, tama augwali aga dologode ma bidimainu ilaibao homu yali.

²Tiali goli, Genuai Bidigo te profet Semaiabolo e tama po walali,

³“Nage king Rehoboam te Juda dabego king pageba, me Juda hani we bidi, me Benjamin hani we bidi pageba pelama, tama augwalibolo e tama po waligi pao.

⁴‘Ena Genuai Bidi, eno po obao, dage duga ama dede dali hwįgi pelamo dao. Magi baso meni, eno ena digi ebaso, te Israel dabego dagede buga pelama, dage taga pali dao,’ te po wao,” Genuai Bidigo te po wai. Tialima Semaia aga pelama, Genuai Bidigo po augwalibolo pusigi pali, tibaso augwali augwa buluba geasa ma pali, tama augwali Jeroboam dali hwįgi pabeo.

⁵Te Rehoboam aga Jerusalemde bidiyu, agai meba sę bidi dabebolo te distrik Judade elalubo hanu bagulali masigigo nigai obo me badu bugagia dąų walao po wali.

⁶Augwaligo te obo dąų walobo sę ela bilali hanu dabe te e dao, Betlehem, Etam, me Tekoa,

⁷me Betsur, me Soko, me Adulam,

⁸me Get, me Maresa, me Sif,

⁹me Adoraim, me Lakis, me Aseka,

¹⁰me Sora, me Aijalon, me Hebron dao. Te tama taun dabe te Juda hanigo tǫde me Benjamin hani dabego tǫde elaluali.

¹¹Augwaligo te obo dabe bugagia mu dąų walali. Te hanu tomode dabede king Rehoboamgo te hanu tonalubo ami bidi dabe me badu sa munama tatagalo pali. Deli deli hanude ofisa bidi deli deli te ami hani deli dali tagaliyu yali. Tama me agai te hanu dabede agai hwįabo no munaluabo nai dabe hauwa munama elaluali. Agai tubo nai hauwa muyu, me ni oliv wel me hauwa muyu, me wain du dabe muyu, me hauwa me hwįabo awa me sesemone hauwa mu muyu yali. Agai te tama tialigo da, agai te hanu dabe bomai hanu mu elalumainu ilama, tama aga Juda hani me Benjamin hani dabego king bidi bidali.

¹³Te pris dabe me Livai dabe te Israel bulu badu tigidali augwali augwa bulu dabe taga solama, augwali Rehoboam dali bidagasali.

¹⁴Te tama tiali page da e dao. Jeroboam me aga tudi badu nosali pedelali king dabego augwali sela sąnama, augwaligo te pris sę emainogo sula tagalobeo, te Genuai Bidigo sę emainogo. Tama tibaso, te pris bidi dabe me Livai dabe augwaligo augwa be dabe me tǫ dabe tagalama, augwali Jerusalemba me te Juda tǫ badu meba tǫba dabe bidigi peyu ela pali.

¹⁵Jeroboamgo augwali sese sela sąna silama, tama aga digi aga gasa olo bidi dabe te pris sę te lotu wabo pesagede dabe tatagalo pali, te tibo god dabeba lotu wabo pesage dabede. Tama me te pris dabego te bulu hwą bidiba lotu wabo sę iyu, me kau kibu piksa omai siba lotu wabo sę iyu yali, te Jeroboamgo nigai piksa.

¹⁶Israel we bidi meba augwaligo God augwa Genuai Bidiba lotu wabo godolo naga yali. Tama tibaso augwali te pris bidi me Livai dabe wali augwa distrik taga soayu asali, te Jerusalemba te augwali te lotu po weyu, God augwa wąį dabego Genuai Bidiba ofa iyu yainogo.

¹⁷Te we bidi augwali te distrik Judade bidiyu, te kantri bomai bulu mu pedelali. Tama te kibu be selade augwaligo te king Devit me king Solomongo yali wiegi yai kolesaga tiwai yali. Tama te tama tialigo da, king Rehoboam te bomai king pedelemainogo tau sali.

¹⁸Te Rehoboamgo we Mahalat te Jerimotgo wegi sali. Jerimot aga te king Devitgo ogwa dabe me deli dao. Mahalat aga ida te Abihail dao. Tama Abihail aga aya te Eliap dao, te Jesigo ogwa.

¹⁹Mahalatgo ogwa sela ame nani, te bage selago nogi da te e tama dao, te Jeus ebadi, me Semaria ebadi, me Saham dao.

²⁰Nosali Rehoboamgo Maka sali, te Apsalomgo wegi. Tama Makago ogwa me si me si ame nani. Te bage augwaligo nogi da e tama dao, Abiya, me Atai, me Sisa, me Silomit dao.

²¹Rehoboamgo we 18 tama sali, tama agai i badu namba tu we dabe sibi hani te 60 we bidali. Tama te we sibi hanigo ogwa dabe 28 ame niyu, me 60 wegi mane ame niyu yali. Rehoboamgo we hauwa mu sali goli, agai Maka godolo genuai mu yali.

²²Tama tibaso, Rehoboamgo Makago ogwa Abiya aga isibode nosali king bidimainogo sa muani. Tama agai Abiya te aga ama solo tomode polalubo bidi muani.

²³Tiali goli, Rehoboam aga wiegi yai homu elaluyu, tama aga ogwa dabe aga te obo dąų wawalo bilali te hanu dabe tonalua pomainogo sa muna muna pali, te Juda distrik me Benjamin distrikde tonalumainogo tama tiali. Tama agai augwalibolo tubo nai dabe hauwa mu augwalibolo mani. Tama me agai augwaligo sabo we hauwa mu gegela mani.