Tuni Bidi Dabego Po Elalubo Buku Si 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Te Asa aga Juda dabego king bidibadi kibu be 36 wabode, Basa te Israel dabego king aga ami bidi dabe selama, tama augwali Juda dabe dali hwįainogo pali. Augwaligo taun Rama selama, tama augwaligo te hanu bagulali obo dąų walama iduali. Te we bidi te Juda buluba ugwa eda idali weyu te sunumi paliyu yali.

²Tama tialima Asago te Godigo tempel be tomode elalubo te mone mubo be tomoba pelama, tama silva me gol siyu, me aga digi kingo be tomoba pelama, te be habude elalubo nai dabe me siyu elama, tama Benhadat, te Siria king pageba tolali. Tama Asago king Benhadatbolo e tiwai po ola tolali,

³“Eno homugo dadi si abagi si bidabo po dąų waibao, te polobadu dadi sigo aya sigo yali gilama. Tama tibaso eno te silva me gol dali si nagebolo te tolobao. Eno homugo nago te Israel dabego king Basa dali dąų wali po hųgia sąyao. Tama agai aga ami dabe sela peyu eno tǫ taga pomainao,” Asago te po ola tolali.

⁴Te king Benhadatgo king Asago te po odali, tama agai agabolo usu dao po wali. Tama tialima agai aga ami ofisa bidi dabebolo augwa ami bidi dabe selama, augwali Israel dabe dali boi hwįgi pao po wali. Tama tialima augwali boi hwįgi pelama, tama augwaligo taun Ijon sobadi, me taun Dan sobadi, me taun Abel Betmak sobadi, te taun me nogi Abel Maim sali. Tama me augwaligo Naptali hanigo tǫde taun dabe me sali. Te da te Israel dabego tubo nai dabe mubo hanu dabe dao.

⁵Tama king Basago te Siria dabego Israel dabego taun dabeba hwįagasalio po odobo si, teda agai te Ramade iduali sę tagalama, te obo silisąma taga pali.

⁶Tama tialima king Asago tigidali Juda bidi dabe asao po wali, tama augwaligo te taun Ramaba pelama, tama augwalibolo king Basago te obo sę yainogo yali te masigi dabe me ni name dabe sigi pelama sela asao po wali. Tialima augwaligo te nai dabe sigi pelama, tama augwaligo hanu Mispa me hanu Geba siba sela pelama, tama augwaligo te hanu si obo dąų walali.

⁷Tama te sogo profet Hanani pelama, te king Asa sugi pelama, agabolo e tama po walali, “Nago homugo Siria king bidigo nage tau sabo bomo genuai elalubao homu elama, tama nago dago Genuai Bidi dena Godiba homu dąų wabeo, tama agabolo nage tau sao olama hanalubeo. Tama tialima, nago naga boi bidi dabe aiyaba me elalubeo, me te Siria ami bidi dabe me nago aiyaba me elalugobeo.

⁸Nago koneani, polobadu te kantri Sudan me kantri Libia ami sigo nage dali boi hwįagasai dao. Augwaligo ami sibi hauwa mu elaluyu, me augwaligo karis hauwa elaluyu, me augwaligo ami hani hauwa te hosde dualama boi hwįyu yai dao. Tiali goli te sogo nago Genuai Bidiba homu dąų olama, tama nago agabolo nage tau sao po hanalu wai dao. Tama Genuai Bidigo nagebolo bomo menama, tama nago augwali aiyaba elaluai dao.

⁹Tigidali sogo Genuai Bidigo aga dologode elalubo bidi dabe naga bugagia tonalubo dao. Augwali menade tǫ dabede bidibo me tagala. Agai augwali tau selama augwali bomo ilibo dao. Tiali goli nago Siria king bidibolo nage tau somainogo hanalu wali da, teda te dwai kolesaga mu dao. Tama tialima nage dali te Juda dabe dage bugagia dua me bidigobeo, menio. Tigidali sogo boi bidi dabego dage dali boi hwįagasiyu yaibao,” wali.

¹⁰Te profet Hananigo te wali pogo king Asa sębę dwai mu ilali. Tama agai pode augwaligo Hanani kalabusiba muani, tama agai sągą ni namego dąų walali. Tama te sogo naga Asago bomonama dwai sę te Juda we bidi meba dali yali.

¹¹King Asago yali sę dabe tigidali te po dabe te aga king pedelalidu gagalasa aga isaliba saboluyu yali sę po dabe, te buku augwali Juda Dabego King Dabego Po Buku wabo, me Israel Dabe Kingo Po Buku wabo, tede asęai dao.

¹²Asa aga king bidibadi kibu be 39 wabode, gasi dwai me agai sągąde pedelali. Tiali goli Asa agai Genuai Bidibolo aga tau somainu hanalubeo. Menio. Agai te dokta dabebolo naga hanalu wali.

¹³Tama Asa aga king bidibadi kibu be 41 wabode aga isali.

¹⁴Tama tialima, augwaligo aga te augwaligo Devitgo Taun wabo tede pubulali, te masigi dudulawe tomode, aga digi te bidi dabebolo dogao po polo wai madigi. Te bidi dabego te wiegi yai denami ebo pauda me wel si taluama, tama augwaligo te pauda te dedage tomode bet me tomode muai tede gelali. Tama augwaligo kingo tigi te bet saiba ugwaba muani. Tama augwaligo aga hobede ebaso tama augwaligo agai genuai nogi konealuainogo, tama augwaligo genuai isi mu nogoani.