TITU 1 - Luda yã takada kↄ̃n Bokobaru yão

¹Mamↄma Pↄlu, Luda zↄ̀bleri, Yesu Kirisi zĩ̀rin ma ũ. À ma zĩ mà gbɛ̃ kɛ̀ Luda ń sɛ́nↄ kaara a náanɛkɛnan mà tó aↄ̃ à dↄnzizɛ yãpuraa dↄ̃,

²lɛ aↄ̃ wɛ́ɛ gↄ̃ dↄ wɛ̃̀ndi kɛ̀ è yãaroozi, kɛ̀ Luda à lɛ́ gbɛ̃̀ zaalɛ anduna e káɛro. Eè ɛgɛɛ to sↄ̃ro.

³Ben yã pì bↄ̀ gupuraaa a gurↄↄa waazi kɛ̀ Luda wa Mìsiri dàmɛ ma kɛɛ guu lán à dìɛ nà.

⁴Mámbe ma takada kɛ̀ kɛ̃̀nnɛ Titu, ma nɛ́ yãpuraa Yesu zɛ́ kɛ̀ wá kún lɛdoo guu. De Luda kↄ̃n Kirisi Yesu wa Mìsirio gbɛ̃kɛɛ kɛnnɛ, à n gba aafia.

⁵Ma n to Kɛrɛti, lɛ ǹ yã kɛ̀ gↄ̃̀ gweenↄ gↄ̃gↄ̃, ǹ gbɛ̃nsinↄ diɛ wɛ́tɛ kↄ̃n wɛ́tɛo lán má ònnɛ nà.

⁶À maa gbɛ̃nsi gↄ̃ kuu taari sai nↄmɛndodee ũ. À nɛ́nↄ gↄ̃ dɛ ludanaanɛkɛrinↄ ũ, wàtongↄ̃ ń dↄ̃ nɛ́ zàzari swãgbãadeenↄ ũro.

⁷Zaakɛ gbɛ̃nsi nɛ́ Luda zĩ gwàrimɛ, àtongↄ̃ dɛ taaridee ke wadadee ke pↄfɛ̃ri ke wɛ̃dɛri ke gbɛ̃ pãsĩ ke ↄↄzaawɛtɛri ũro.

⁸Sé àgↄ̃ dɛ nibↄfↄ̃ri ũ, làakaridee kɛ̀ zɛ̀ kↄ̃n maakɛnao ũ, gbɛ̃ súusu kɛ̀ kú adona bensↄ̃ à a zĩnda kũna dↄ̃ↄ ũ,

⁹gbɛ̃ kɛ̀ zɛ̀ gbãngbãn kↄ̃n yã náanɛdee kɛ̀ wè dańnɛo ũ, lɛ à e à lɛ́ da gbɛ̃ pãndenↄa kↄ̃n yãzɛdedannɛna pìo, à gbɛ̃ kɛ̀ bↄ̀ à yã kpɛɛnↄ ɛgɛɛ káńnɛ ń ↄzĩ.

¹⁰Zaakɛ swãyãmarisaidee kɛ̀ aↄ̃è gbɛ̃nↄ likↄ̃a kↄ̃n ń yã'onaonↄↄ pari, atɛ̃nsa gbɛ̃ kɛ̀ aↄ̃ zɛ̀ kↄ̃n bã̀ngukɛna yãonↄ.

¹¹Aↄ̃è ua lɛzii yaka. À maa wà lɛ́sↄ dańnɛ. Aↄ̃è yã kɛ̀ dɛ wà dańnɛroo dańnɛ ↄↄ zaa ena yãnzi.

¹²Kɛrɛti bùsu annabi ke bè, Kɛrɛtinↄ nɛ́ ɛgɛdeenↄmɛ, nↄ̀bↄ pãsĩnↄmɛ, ye'uzi mɛadeenↄmɛ.

¹³Yã pì nɛ́ yãpuraamɛ. Beee yãnzi ǹ kpãkɛ̃ńzi maamaa, lɛ aↄ̃gↄ̃ dↄnzizɛ kũna gbãa.

¹⁴Aↄ̃ton làakari dↄ Yudanↄ garaaro ke gbɛ̃ kɛ̀ aↄ̃ kɛ̃̀ yãpuraaa yãdiɛnanↄ.

¹⁵Pↄ́ke ègↄ̃ gbãsĩ gbãsĩsaideenↄnɛro, bensↄ̃ pↄ́ke ègↄ̃ gbãsĩsai ludayãdarisai gbãsĩdeenↄnɛro, kɛ̀ aↄ̃ laasuu kↄ̃n ń nↄ̀sɛo zaa yãnzi.

¹⁶Aↄ̃è be wà Luda dↄ̃, ben aↄ̃ yãkɛna è ń ɛgɛ bo. Bɛgizinↄmɛ, aↄ̃è yã maro, aↄ̃è fↄ̃ wà yã maa ke kɛro.

TITU 1123

TITU 1
1
2
3