Titus 1

1

2

3

¹Re babyor ney e yib rok Paul, ni tapigpig rok Got, me ir reb e apostel rok Jesus Kristus. Ni turguyeg nga nol’igeg ni nggu ayuweg e pi’in ke mel’egrad Got ni ngar manged girdi’en nge mich Kristus u wun’rad, mu gu pow’iyrad ko tin nib riyul’ ni be fil e ba’ rodad e taliw,

²ni murung’agen e yafos ndariy n’umngin nap’an ni ir e nge l’agan’uy ngay. I Got nder ma ban e turguy e re yafos ney ndariy n’umngin nap’an ni nge pi’ ngodad ko ngiyal’ ndawori sunumeg e fayleng riy,

³ma fa’ani yan i taw nga nap’an, me dag nib tamilang ko thin rok ngodad, ni ireray e ren’en ni kan pag fan ngog, ma gu be wereg murung’agen ko girdi’, ni Got ni ir e ma thapegdad ngak e ke yog ngog ni nggu rin’.

⁴Gu be yol ngak Titus, ni en nriyul’ ni fakag u fithik’ e michan’ romow ngak Kristus ni be lungug: I Got ni Chitamangiy nge Kristus Jesus ni ir e ma thapegey ngak Got e ngu’ur ayuwegew gur ma yow be pi’ e gapas nga lanin’um.

⁵Gu pagem u Krete ni fan e ngam fal’eg rogon e tin kabay ban’en ni ngan muruwliy, ma nge reb e binaw ma ga duwgiliy e pi’in ngar manged pi’ilal ko galesiya riy. Dab mpag talin e tin kugog ngom nike lungug:

⁶en ni ir reb e pi’ilal ko galesiya e dabisiy ni be’ nib yal’uw; ma dabisiy ni ri ta’reb e bpin rok, ma pifak e dabisiy nib mich Kristus u wun’rad ma de kireb thirad ko yanyan ni yad be tay ara reb e darir folgad.

⁷Ya ke milfan e maruwel rok Got ngak, aram fan ni cha’ ni ir e be yog e thin rok e galesiya e nge par nib yal’uw. Ma thangri dabi ufanthin fa reb e ba papey e damumuw ngak, ara ba tamuun rrum, ara ba tacham, fa reb e ma chogownag e salpiy.

⁸Ma thangri m’agan’ ngay ni nge fek e milekag nga tabinaw rok nge ayuweg ma ba’adag e tin ni bfel’. Ma thangri yag rok ni nge t’ar laniyan’ ko tin nde fel’, ma nge par nib yul’yul’, ma ba thothup, mrayag ni nge tel ir ko tin nde mat’aw.

⁹Ma thangri dabi pag e thin rok Got ni ir e nge pagan’uy ngay, ma ba puluw ko tin ni yibe machibnag ngak e girdi’. Ireray kanawo’en me fil e tin nib riyul’ ngak boch e girdi’ me pi’ e athamgil nga lanin’rad, me ki dag ngorad e oloboch nike tay e pi’in yad be togopluw ko re thin ney.

¹⁰Ya pire’ e girdi’ ni kar togopluwgad ko re thin ney karban niged boch e girdi’ ko tin ndariyfan ni yad be weliy, ni ba ga’ ni pi’in karbad ngodad ni ka yad be fek yalen piyu Israel.

¹¹Dabi siy ni ngan talegrad ko tin ni yad be weliy, ya yad be yo’ornag laniyan’ girdi’en e tabinaw i yan, ni bochan e yad be machibnag e tin nsusun e dab ra machib niged ni fan e kemus ni nge yag e salpiy ngorad, ni ban’en ni ngan tamra’ ngay.

¹²Ma be’ u Krete ni ir reb fapi profet rorad e yog ni ga’ar, “Girdi’ nu Krete e gubin ngiyal’ ni yad ma ban, ma yad e gamanman nib kireb, ni yad ba gamed ma ba ga’ l’ugunrad ko abich.”

¹³Tin keyog e ba riyul’. Ireray fan nthingar mu puwan’ ngorad nib gel, ni bochan e nge mich Kristus u wun’rad ni bfel’ rogon,

¹⁴miyad pag e yat rok piyu Israel nge pi motochiyel ni girdi’ e sunumeg, ni yib rok e girdi’ ni kar n’iged e thin rok Got nib riyul’.

¹⁵Urngin ban’en ma bmachalbog u wan’ e pi’in yad rorad ma yad bmachalbog; machane dariy ban’en nib machalbog u wan’ e pi’in ba alit lanin’rad ma de mich Kristus u wun’rad, ya leam rorad nge lanin’rad e ke alit.

¹⁶Yad be yog ni yad manang Got, machane be m’ug u pangirad ndar nanged Got. Ma dabuy pangirad ma darir folgad, ma dabiyag ni ngar ngongliyed ban’en ni bfel’.