ቲታ 1

1

2

3

¹ዬሱሲ ኪሪስቶሲ ኪቴዳ ታኒ ጳዉሎሲ፥ ፆሳ ኣይሊ፥ ሃ ዳቢዳቢያ ፃፋይ። ፆሳይ ዶሬዳ ኣሳው ኣማኑ ዴዓናዳኒኔ ፆሳ ቱማቴꬃ ኤራኮ ኡንቱንታ ካሌꬃናዳን ታኒ ዶሬታዴ ኪቴታዲ።

²ዎርዶቴና ፆሳይ ኑሲ ሃ ሜꬊና ዴዑዋ ዳሮ ዎዲያፔ ካሴ ኢማና ጌዳ።

³ፆሳይ ኑና ኣሺያዌ ሊኬ ዎዲያን ባሬ ቃላን ሃዋ ቆንጪሴዳ፤ ኢ ሃዳሪዴ ታና ኣዛዜዳዋዳን፥ ታኒ ኣ ቃላ ኦዳይ።

⁴ኣማኑዋ ኢቲፔቴꬃን ታ ቱሙ ናዓ ኔው ቲቶ፥ ፆሳ ኣዉዋፔኔ ኑና ኣሺያ ዬሱሲ ኪሪስቶሳፔ፥ ኣꬎ ኬካቴꬃይ፥ ማሮቴꬃይኔ ሳሮቴꬃይ ጊዶ።

⁵ታኒ ኔና ቃርፄሳን ኣጋዴ ዬዳዌ፥ ኔኒ ኣቶዋ ጊጊሳናሳኔ፥ ታኒ ኣዛዜዳዋዳን፥ ካታማ ኡባን ዎሳ ጎሊያ ጪማቱዋ ዶራናሳ።

⁶ጪማይ ቦሬቴናዋኔ ኢቲ ማቻቲ ፃላላይ ዴዒያዋኔ ኣማኒያ ናናይ ዴዒያዋ ጊዳናው ቤሴ፤ ኣ ናናይ ሻሉዋ ባዪዚያባኒኔ ዎይ ኣዛዜቴናን ኢፂያባን ኣሳይ ኣማሳሌናዋንታ ጊዳናው ቤሴ።

⁷ኣዪሲ ጎፔ፥ ሄ ጪማይ ፆሳ ኦሱዋ ኣዛዚያ ካፑዋ ጊዲዴ፥ ፖኪሴናዋ፥ ኦቶሬቴናዋኔ ኤሌ ሃንቄቴናዋ ጊዳናው ቤሴ፤ ቃሲ ማꬆቴናዋ፥ ሱጌናዋኔ ዮራቴናዋ ጊዳናው ቤሴ።

⁸ሺን ኢማꬃ ሞኪያዋኔ ሎዖባ ዶሲያዋ ጊዳናው ቤሴ፤ ቃሲ ኣኬካንቻ፥ ፂሉዋ፥ ጌሻኔ ባሬና ናጊያዋ ጊዳናው ቤሴ።

⁹ኣማኔቲያ ዴዑ ቤቲያ ቲሚርቲያና ጊጊያ ቃላ ኢ ሎይꬂ ኦይቆ። ያቶፔ ሃራቱዋ ቱሙ ኣማኑዋ ታማሪሲያዋኒ ሜንꬄꬃናዉኔ ቃሲ ሄዋ ኢፂያዋንታካ ዞራናው ዳንዳያናዋ።

¹⁰ኣዪሲ ጎፔ፥ ኣዛዜቴናዋንቱ፥ ማዴናዋ ሃሳዪያዋንቱ፥ ሃራቱዋ ጪሚያዋንቱኔ ቃፃሬቴዳ ኣዪሁዳ ኣማኒያዋንቱ ባጋ ጊዴዳ ዳሮ ኣሳቱ ዴዒኖ።

¹¹ኡንቱንቱ ታማሪሳናው ቤሴና ፖኪያ ኦጊያን ሚሻ ዴማናው ታማሪሲያዋን ጎሊያ ኡባ ባይዚያ ዲራው፥ ኡንቱንቱ ሃሳያ ቴዓና ቤሴ።

¹²ኡንቱንቱ ጊዶፔ ኢቱ፥ ቲምቢቲያ ኦዲያዌ ኡንቱንቶ፥ «ቃሪፄሴ ኣሳይ ኡባ ዎዴ፥ ዎርዳቱዋ፥ ኢታ ዱዓቱዋኔ ዮራንቻ፤ ቃሲ ኣዛላ ኣሳ» ያጌዳ።

¹³ኢ ማርካቶዌ ቱማ፤ ሄዋ ዲራው፥ ኔኒ ኡንቱንቱሲ ሚኖ ኣማኑ ዴዓናዳኒኔ ቃሲ ኣዪሁዳቱዋ ቶሳኔ ቱሙዋ ኢፄዳ ኣሳቱዋ ኣዛዙዋ ኡንቱንቱ ሲሴናዳን፥ ኡንቱንታ ሚኒሳዴ ሴራናው ቤሴ።

¹⁵ባሬንቱ ሁጴው ጌሻ ጊዴዳዋንቱሲ ኡባባይካ ጌሻ፤ ሺን ቱናቱዋሲኔ ኣማኔናዋንቱሲ ኡንቱንቱ ዎዛና ቆፋይኔ ኡንቱንታ ሱሬ ዎዛናይ ቱኔዳ ዲራው፥ ኡንቱንቶ ኣያይኔ ጌሻ ጊዴና።

¹⁶ኡንቱንቱ ባሬንቱ ፆሳ ኤሪያዋ ቆንጪያን ኦዲኖ፤ ሺን ኡንቱንቱ ሼኔዪያዋንታ፥ ኣዛዜቴናዋንታኔ ኦሱዋ ኡባዉካ ጊጌናዋንታ ጊዲያ ዲራው፥ ባሬንቱ ኪታን ኣ ኤሮኮ ጊኖ።