Tito 1

1

2

3

¹Tito, ẽ mia kirika kenexõ fomai. Ẽfi Pabloki, Niosfi ẽfe Ifokõiki. Nã ea yoiai keskamis ẽ. Jesucristo ea nĩchia ẽ aõnoa yoimis inõ, nã Niospa katoa yorafo ẽ ato tãpimanõ afãfe Jesús chanĩmara fanõfo.

²Niospa mai onifatama shinãkĩ iskafani: “Na yorafo ẽ ato katoano efe rafeaifono ẽ ato ĩkikõipakenaka efe ĩpaxanõfo,” ixõ shinãni. Nãskakẽ nõ Nios Ifofapaikĩ nã yoiai keskara nõ chanĩmara fatiro. Nios ramashara chanĩmisma.

³Aatofi noko tãpimapaiyaitĩa ãfe meka shara noko tãpimani. Nãskakẽ iskaratĩa ea nĩchia ẽ ato ãfe meka shara yoinõ eõxõ tãpinõfo. Nã Nios noko ifimis nõ afe ĩpaxanõ.

⁴Tito, ẽ mia kirika kenexõ fomai. Mĩfi ẽfe fake keskarakõikĩ, eõxomãi mĩ Nios chanĩmara fakẽ. Epa Nios mĩ Ifofakẽ mia imasharakõipakenaka mia noikĩ mia shinãsharamani. Nõko Ifo Jesucristori mia askafai.

⁵Tito, ẽ mia nĩchiferati Creta ano a nõ yonofai mitoxoma mĩ chipo mitonõ. Nãskakẽ ẽ mia yoiti iskafakĩ: “Nã pexe rasi anoafo kexemisfo katofe nã Nios Ifofaafo ichanãfono ato kexenõ,” ixõ ẽ mia yoiferati.

⁶A Nios Ifofaafo kexemis katofe afaa chaka shinãmisma. Ãfi fistiya inõ. Ãfe fakefo Jesús tãpiafo inõfo, ato kemamisma inõfo, afaa chakafamisfoma inõfo ãfe fakefo.

⁷Nã Nios Ifofaafo kexemis sharakõi itiro, afaa chaka shinãmisma nãmãi xanĩfoax. Nã keskara yora mĩ katotiro nã Nios Ifofaafo kexemis inõ. Nã Niospa shinãmanai keskara inõ aõnoa afaa chaka yoiyamanõfo. Askatari kakapaimis itiroma. Askatari samama õitifishki imiskai itiroma. Askatari pãemis itiroma. Askatari setemitsamis itiroma. Askatari yora fetsa pãraxõ kori fĩamis itiroma.

⁸Askatamaroko isharakõixõ yorafo ãfe pexe nokoaito atoki inimayanã ato ifitiro. Askatari yorafo keyokõi ato afara shara axosharakõimis itiro. Askatari ãa kexemesharamis itiro mẽstekõi isharakõiyanã. Niospa meka nikasharakõipai afara chakafapaifikĩ anã akima. Nãskaxõ a Niospa fichikaspaifo anã shinãima.

⁹Niospa meka nikasharaxõ kachikiri fayamafãi, nã Niospa yoiai anori chanĩmara faxõ fetsafori yoitiro. Xafakĩakõi yoitiro. Nãskaito nikai yorafo Nioski inimanõfo. Askatari anorima yoimisfori ato tãpimatiro, akairi tãpinõfo.

¹⁰Akka nã fetsafo nikayospakõimisfo Niospa meka ato yoiaifono nikakaspakõimisfo. Nãskaxõ meka fetsafaxõ yoimisfo ãa fanĩrira yoikakĩ nã Moisés yoini keskara fisti nõ nikanõra ikaxõ. Akka nã judeofo ranãri askamisfo ãa chanĩkani.

¹¹Nãskakẽ ato xatemafe ato pãranõfoma. Kori fisti fipaikakĩ anorima chakakõi ato tãpimapaikani kiki. Nãskakẽ ranãrito atoõxõ Jesús kachikiri fayomisfoki.

¹²A feronãfake onãyato a inõpokoai keskaraõnoa Creta anoxõ yoini: “Nono ikafo, Cretafofi chanĩmisfokĩ, nikayospafo, pikĩ fisti tãpiafo, yoinã keskara pitsikõifo xanikõifo,” fani.

¹³Nã tãpiato ato yoikõini ato pãranima. Creta anoafo chakakõi ikafo. Nãskafiaifono ato yoisharafe Titopa, anã askanõfoma, Niospa yoiai keskara nikanõfo. Nãskaxõ Niospa meka chanĩmara fanõfo.

¹⁴Akka judeofãfe ãto xinifãfe ato yoipaonifoki anorima, ãa chanĩkakĩ. Nãskakẽ ato yoisharafe anã ato nikanõfoma. Askatari a Niospa meka anã nikaifãfema ato yoipaiyaifono, ato yoisharafe anã ato nikanõfoma.

¹⁵Fetsafo õiti sharayafo, mãmãi Epa Niospa ato chaka xatexonano. Nãskakẽ afara sharafo atonã sharakõifo. Akka a õiti chakayafãfe ãto shinã mẽraxõ chakakõi shinãmisfo.

¹⁶Askafiax chanĩmisfo, “Nõ Nios tãpiara,” iki, tsõa Nios shinãyamafi. Askara yõra Niospa meka nikakaspakĩ chakafai. Nãskakẽ nõ tãpitiro askara yora Nios fe rafemisma. Askara yõra shara shinãima, afaa pishta shara fatiroma, chakakõi shinãi.