1Namba Polo Gotenya kendemane Jisasa Kataisanya aposele kalyo. Nambame Gotenya yapao nyepae endakali dupanya masoo miningi doko kyoto injisakamaitopa, Gote minao katenge dokopa kanda soo dupame kiningi pii doko masokondape pina lao Goteme namba ipu lea.
2Gotenya mana watao miningi dokonya tenge doko lete etete katatamana lao masoo malisoo katenge doko. Wamba yuupi kaitipi wapuala nayao pituu, sambo nalenge Gote dokome lete etete katenge doko naima ditona latea-pyaa.
3Baame dopa pitona lao masiamo doko gii seteamo dokonya panasia. Naimanya Pyoo Nyingi Gote dokome panasiamo pii doko nambame isoo lamaiyoo katape lea.
4Nambapa masoo miningi mendai dokonya nambanya wane angi Taitesa embanya pepa dake pyao peekelyo. Takange Gotepa naimanya Pyoo Nyingi Akali Kataisa Jisasapame emba kandao mona epe mende palyetala embanya mona doko lyuu lasekena.
5Kalai malatae silyamo dupa embame tolasetala, sosa katenge yuu taono mendai mendai lao dupanya isingi akali mendatupa katena latenopa lao emba Kitita yuu dokonya yakineo. Embame dopa pyaale lao nambame dapa langio: akali mende-kisa koo tengepi mende nasingi, baa enda mendai petenge, baanya wane dupame Kataisa lao masoo minao endangi takangepanya pii tanga nalao kyakao luilyamino nalengema akali dopale dupa embame isingi akali katena lape.
7Kini, setao katenge akali doko-kisa koo tengepi mende nasoo Gotenya kalai isoo katapenge. Baame luiyala nayao, yapa imbu nakayao, bia akipi masetae soo nala nayao, pyao napyoo, munipi opale longo waa palyoo nyalanya putiti nakayawaka pipenge.
8Baame endakali opone minao mana epe dupa auu kayao mona palyokondape petala, tolalakao tolatae epe etete joo katao baame baa tange isokondape pipenge.
9Tungi pyapenge Gote dokonya pii doko baame mana nyiamoliaka pyoo minakondape pipenge. Dopa pyoo katao baame endakali dupa mana pii tolatae doko lamaiyoo pupu lasetala, pii tanga lenge endakali dupanya kopeta pingi dupa tange masina lao panasakamaipenge.
10Endakali longome pii tanga lao pii tenge nakatenge dupa lao endakali minakasoo kalyamino. Doko, Juta endakali masoo miningi dupame dopale dupanya tenge joo kalyamino.
11Endakali dopale dupame muni pake nyalanya pii lamaiya nayapenge dupa mana lamaiyoo endakali mendapuanya palu dupa pitaka koyasilyamino. Dopana, embame dupanya nengekaita lyokena lape.
12Wamba Kitita tange dupanyaka masingi akali mendeme lao pituu, “Kitita tange dupame wambapi indupapi sambo lao mena kumbalo joo katao, nee tuu lao napala maka maka kayao katengemana,” lea-pyaa.
13Pii doko kiningina, tenge dokonya minao dupame Jutamanya tindi piipi Gotenya kiningi pii doko yakinenge endakali dupame mana seteamino dupapi dupanya kale katao sala naenya, masoo minao kyoto joo katena lao embame pupu lao dupa tolasepe.
15Endakali auu pipae dupame kandapimino dupa pitaka auu pipayaka jilyamo. Dopaka doko, endakali koyapae Kataisa lao masoo minala naenge dupame kandapimino dupanya mendaipi mende auu pipae nanjilyamo. Doko, dupanya mona masingipi dupa koyapae.
16Dupanya kambumi Gote lao masilyamano lengemaka doko, mana minilyami dokome Gote maita maingima. Dupame aii pyao katapala Gotenya pii watao minala nayao mana epe mendaipi mende kapa pao naminapengema.
