Taalie 30:3-11

³N mu findixi lɔnnila ra, n mu lɔnni sɔtɔxi Ala xa Sɛniyɛntɔɛe xa fe ra.

⁴Nde texi koore, a man naxa goro? Nde foye malanxi a bɛlɛxɛe kui? Nde ye ragataxi a xa sosee kui? Nde duniɲa naaninyie saxi? A xili di? A xa di xili di? I na kolon?

⁵Ala xa masenyi birin findixi nɔndi nan na, a findi kantari ra mixi bɛ naxan lama a ra.

⁶I naxa se sa na masenyi xun ma, alako Ala naxa i suxu, a fa i xa wule to.

⁷N wama fe firin maxɔrinfe i ma beenun n xa faxa. I naxa tondi.

⁸Madaxuɲa nun wule makuya n na. I naxa n findi setare ra, i naxa n findi banna ra. Baloe gbansan fi n ma, naxan n wasama.

⁹Xa n sa se gbegbe sɔtɔ, n gaaxuma nɛ n naxa nɛɛmu i ma, n fa a fala, «Nde na Alatala ra?» Xa n sa lu setareɲa fan kui, n gaaxuma nɛ n naxa muɲɛ ti, n fa i tan n Marigi Ala xili kana.

¹⁰I naxa konyi xili kana a kanyi bɛ, alako a naxa i danka, na haakɛ lu i ma.

¹¹Mixi ndee e baba dankama, e e nga finsiriwali.