SAN LUCAS 5:1-13

¹ꞌBi kuán kionga Jesús sejñandai ndachikun tseꞌe Genesaret, xutankjiun tiꞌbeꞌnyuꞌñu kui tuxi kjuintꞌeni enre Naꞌenchana.

²ꞌBa Jesús tsabe jó barku xi kjiyundai ndachikun, ꞌba xi tsuba tjiuti kio ꞌetukajenni nga yane naꞌya tire.

³ꞌBa Jesús jaꞌasꞌen jngu barkubiu, xi tseꞌe Simón, ꞌba tsiꞌare nga ngatatsikjinchire ngando. ꞌBa tsikꞌejña ngaya barku, ꞌba ꞌnda kio yakuyanire xuta.

⁴ꞌBa kionga je jetꞌare nga yakuya, kitsure Simón: —Tꞌinkue barku ña ngisa nanga nando, ꞌba kio chanikjaꞌajiun naꞌya tinu tuxi sa̱kuninu tjiuti.

⁵ꞌBa Simón kitsingojore: —Naꞌen, je kañaꞌaxai̱ tsaꞌa nistjen ꞌba nijnguú kaxuntsjai. Tunga mé ji ꞌba teꞌminaa̱, skanikjaꞌajinfara̱ naꞌyo.

⁶ꞌBa kionga nchjabiu je ꞌba kitsaꞌen, ꞌñu nkjin tjiuti kixuntsja kaꞌnda naꞌyo je mejen kitijnda.

⁷ꞌBa ꞌbatsaꞌen tu chuba= kitsaꞌenre nchja xinkjin xi tjinduya barku xi ngijngu, tuxi kjuaꞌekasekoni. ꞌBa nchjabiu jendiba, ꞌba ꞌñu kitsitse ngojó barkubiu ꞌba tu ngichuba kichaja ngisare nga stiungijndiu.

⁸Nga tsabe kibi, Simón Pedro tsakasenkunchꞌin ngixkun Jesús, ꞌba kitsure: —Tisentꞌaxinnaa̱ Naꞌen, ngatꞌa jngu= ña̱ xuta je.

⁹ꞌBi kitsu Simón ngatꞌa kui ko ngatsiꞌi xi tjenko kuakunre tu kjuare nga ꞌñu nkjin tjiuti kitsuba.

¹⁰ꞌBa nde kjimare Santiago ko Juan, kiꞌndire Zebedeo, xi ñatjen tsaꞌexa Simón. Tunga Jesús kitsure Simón: —Bi kuin. ꞌNdani ngandaꞌe bi tjiuti kꞌuekui, tusa xuta kꞌuekui xi ngatꞌa tsaꞌan.

¹¹ꞌBa kionga je jaꞌeko barku ña je nangi, ꞌendu yeje xi tjinre ꞌba kitjenngi Jesús.

¹²ꞌBa kionga Jesús tijña jngu naxinanda chi, jaꞌe jngu xuta xi ꞌñu kunre chiꞌin feꞌndujun. ꞌBa nga tsabe Jesús, kitsikindi ꞌnda tꞌanangiu ꞌba ꞌetsꞌare: —Ji naꞌen, tsa mejénri, ku̱an sitsejunnaa̱ nga xjaꞌaxinnaa̱ chiꞌin xi kunna̱.

¹³ꞌBa meni Jesús kitsure nga yanere ntsja xi tjiꞌmio: —Mejénna̱. Ngatamatsje ngani. ꞌBa ndekuini chubabiu kitjuxinre chiꞌin feꞌndujun xi kunre xutabiu.