LUKU 5:1-13

¹Zĩkea Yesu zɛna Gɛnɛsarɛti sɛ̀bɛ baa, ben gbɛ̃nↄ kàkↄ̃azi pari lɛ wà Luda yã ma yãnzi, aↄ̃ↄe nakↄ̃rɛɛa.

²Ben à góro'itɛ è kaɛna baa mɛ̀n plaa, sↄrↄkↄnↄ bↄ̀ɛn aↄ̃ↄe ń táarunↄ pipii.

³Ben à gɛ̃̀ góro pìnↄ doke guu kɛ̀ dɛ Simↄ pↄ́ ũ, à wɛ́ɛ kɛ̀a à góro pì yĩpa féte à gɛ̃o ín. Ben à vɛ̃̀ɛ góro pì guu à yã dà gbɛ̃nↄnɛ.

⁴Kɛ̀ à yã ò à yã̀a, ben à bè Simↄnɛ: Ǹ gá kↄ̃n góroo í lↄ̀n, à táaru zu, é kpↄ̀ kũ.

⁵Simↄ wèàla à bè: Dannɛri, wa zĩi kɛ̀ ai guu gàa dↄo wée pↄ́ke kũro, mↄde lán ń ò nà, mɛ́ zu.

⁶Kɛ̀ aↄ̃ↄ kɛ̀ lɛ, aↄ̃ kpↄ̀ kàkↄ̃a gídigidi ai aↄ̃ táarunↄ yezi à kɛ̃.

⁷Ben aↄ̃ ↄ kɛ̀ yáku ń górode daanↄnɛ aↄ̃ mↄ́ wà ń ĩan ká. Kɛ̀ aↄ̃ mↄ̀, aↄ̃ kpↄ̀ kà góro mɛ̀n plaaa pìnↄ guu à pà ai aↄ̃ↄ yezi wà vlɛ̃ɛ.

⁸Kɛ̀ Simↄ Pita è lɛ, à kùɛ Yesu gbá saɛ à bè: Ǹ gu ma saɛ Dii, zaakɛ durunkɛrin ma ũ.

⁹Simↄ bídi kɛ̀ kↄ̃n gbɛ̃ kɛ̀ aↄ̃ↄ kú lɛdoonↄ ń píngi kpↄ̀ parii kɛ̀ aↄ̃ↄ kũ̀ pì yãnzi.

¹⁰Lɛmɛ dↄ Yemisi kↄ̃n Yohanao, Zebedi nɛ́ kɛ̀ aↄ̃ↄ dɛ kↄ̃ gbɛ̃ ũ kↄ̃n Simↄo bídi kɛ̀ se. Ben Yesu bè Simↄnɛ: Ǹton tó vĩa n kũro. Zaa gbã̀a gbɛ̃nteen nɛ́gↄ̃ wɛɛ.

¹¹Kɛ̀ aↄ̃ kà kↄ̃n ń góroo baa, ben aↄ̃ pↄ́ píngi tòn wà tɛ̀zi.

¹²Zĩkea Yesu kú wɛ́tɛ ke guu, ben gↄ̃gbɛ̃ kɛ̀ kusu dààlaa mↄ̀. Kɛ̀ à Yesu è, à dàɛ a puua à wɛ́ɛ kɛ̀a à bè: Dii, tó ń yezi, nɛ́ fↄ̃ ǹ ma kɛ̃kↄ̃a wásawasa.

¹³Ben Yesu ↄ bↄ̀ à kɛ̀a à bè: Má yezi, ǹ gↄ̃ wásawasa. Zaa gwe gↄ̃ↄ à kusu yã̀a.