ሉቃሴ 5:1-13

¹ፔቴ'' ኬሊ'' ዬሱሴ ጌንሴሬፄ ጌይንታ ባዞ'' ዓጫ ዔቂ ዓኣንቴ ሚርጌ ዓሳ ዒዛ ባንሢ ሙኪ ፆኦሲኮ ቃኣሎ'' ዋይዛኒ ቱቺንታኔ።

²ዒዚያ ባዞ'' ዓጮይዳ፥ ሳዖኮ ዑኬ ዔቄ፥ ላምዖ ዋኣሢና ፒንቆ ጎንጊ ዴንቄኔ፤ ሞላሢ ዓርቃዞንሢ ጋዓንቴ ዋኣፆና ፒንቆ ጎንጋፓ ኬዲ'' ዔያቶኮ ሞላሢ ዓርቆ ሮኦጮ ማላ ሱዞ ማስካኔ።

³ዬሱሴ ዋኣፆና ፒንቆ ጎንጎንሢዳፓ ፔቴ''ዞ፥ ሲሞኦኔሬሎይዳ ጌላዖ ሲሞኦኔ ኮራ፦ «ሓኖ'' ዋኣፆና ፒንቆ ጎንጌሎ ሳዖ ኮራፓ ባዞ'' ሳዞ'' ባንሢ ታኣም ዶጪሴ» ጌዔኔ። ዬካፓ ዋኣፆና ፒንቆ ጎንጌሎይዳ ዴዒ ዴሮ'' ዔርዚሢ ዓርቄኔ።

⁴ዒ ኬኤዛ ባኮ ጋፒሴሢኮ ጊንፃ ሲሞኦኔ ኮራ፦ «ዋኣፆና ፒንቆ ጎንጌሎ ሴካ ባዞ'' ሳዞ'' ጌልዚ ኔኤኒ ኔኤኮ ላጎንሢና ዎላ'' ሞላሢ ዓርቃኒ ሮኦጮ ማላ ሱዞ ዋኣፆይዳ ዓጉዋቴ» ጌዔኔ።

⁵ሲሞኦኔ ማሃዖ፦ «ዔርዛሢዮ! ዋንቴ ሳዓ ካራንዳያ ሄላ''ንዳኣና ዓርቃኒ ኮዒ ሚርጌ ኑ ላቤዖ ፔቴ''ታዖ ዓርቂባኣሴ፤ ኔ ጌዔቶ ጋዓንቴ ሓይሾ ሱዞ ኑ ዓጋንዳኔ» ጌዔኔ።

⁶ሮኦጮ ማላ ሱዞ ዔያታ ዓጋዖ ሱዛ ማኣማንዳያ ሄላ''ንዳኣና ሚርጌ ሞሎ ዓርቄኔ።

⁷ዬያሮ ሜሌ'' ዋኣፆና ፒንቆ ጎንጎይዳ ዓኣ ዔያቶኮ ላጎንሢ ሙኪ ዔያቶ ማኣዳ''ንዳጉዲ ኩቻ ዉቲ ዔኤላ''ዛ፥ ዔያታ ሙኪ ላምዖ ዋኣፆና ፒንቆ ጎንጋ ዔኤዺንታኒ ዑካንዳያ ሄላ''ንዳኣና ሞላሢ ዓርቂ ጎንጎ ኩንሤኔ።

⁸ሲሞኦኔ ጎዖ ጴፂሮሴ ዬያ ዛጌ ዎዶ''ና ዬሱሴኮ ቤርታ ጉምዓቲ፦ «ታ ጎዳሢዮ! ታ ጎሜ ዓሲ ማዔሢሮ ታ ባንሢ ኔ ዑኪፖ» ጌዔኔ።

⁹ዬያ ዒ ጌዔሢ ዒዛንታ ዒዛና ዎላ'' ዓኣ ላጎንሢ ቢያ ዓርቄ ሞላሢ ሚርጉሞይዳፓ ዔቄያና ሚርጌና ዲቃቲ ሄርሼሢሮኬ።

¹⁰ዬያጉዲ ሃሣ ሲሞኦኔኮ ላጎንሢ ማዔ ዜብዲዮሴ ናኣቶ''ንሢ፥ ያይቆኦቤና ዮሓኒሴናኣ ዲቃቲ ሄርሼኔ። ዬሱሴ ሲሞኦኔ ኮራ፦ «ሓይ ኔ ዎይታይ! ዒጊጪፖ፤ ሓካፓ ሴካ ኔ ዓሲ ፒሪ ዓርቃያ ማዓንዳኔ» ጌዔኔ።

¹¹ዔያታ ዋኣፆና ፒንቆ ጎንጎንሢ ሳዖ ባንሢ ዑኪሲ ዔቂሴስካፓ ቢያ ባኮ ሓሺ'' ዬሱሴ ጊንፆ ሓንታያ ማዔኔ።

¹²ፔቴ'' ኬሊ'' ዬሱሴ ካታሞይዳ ዓኣንቴ ፔቴ'' ዑሢዳ ኬስካ ዶርዓ ዑፆ ባይዜ ዓሲ ዒዛ ኮራ ሙኬኔ፤ ዒዚ ዬሱሴ ዴንቃዖ፦ ባሊቲና ሳዓ ሎኦሚ፦ «ኔ ኮዔቴ፥ ታና ጌኤሻኒ ዳንዳዓኔ» ጌዒ ሺኢቄኔ።

¹³ዬሱሴያ ኩጮና ዒዛኮ ዑፆ ፒፃ''ዖ፦ «ጌኤሽኬ! ኔ ጌኤሽካንዳጉዲ ታ ኮዔኔ» ዒዛም ጋዓዛ፥ ቤዞማና ዓሢ ዑፃ ኬስኬ ዶርዓስካፓ ጌኤሽኬኔ።