Ruka 5:1-13

¹Morarame Kenezare ikuhpo esety kynexine. Moro ehpio Jezu kynexine, imehnõ amorepãko Ritonõpo omiry poko. Ahno tuhke kynexine. Epuropurohmãko toh kynexine, Jezu omiry etary se toexirykõke.

²Mame asakoro kanawa tonese eya nakuatao tymyhse. Tykãnarykõ tynomose kana anỹnanomo a. Tarãpa kurikãko toh kynexine.

³Morarame kanawaka tõtyrise Jezu, Ximão kãnary aka, —Kanawa isyryhmako pitiko irãnakahme samo, tykase Jezu Ximão a. Mame typorohse ynororo kanawao. Mame ahno tõ tamorepase eya kanawao tahtao.

⁴Mame tamorepakehse tyya ahtao ynara tykase Ximão a, —Kanawa isyryhmakohme sã irãnaka kana anỹtohme, tykase ynororo eya. Mame tysyryhmase irãnaka. Mame, —Atarãpãkõ ematoko kana anỹtohme, tykase ropa Jezu eya.

⁵Mame ynara tykase Ximão eya, —Ỹ toerohse yna itamurume repe. Kana anỹse yna nẽmehno repe. Yrome ananỹpyra yna nekurehno, tykase ynororo eya. —Yrome omorohko. Õmi poe tarãpa emãko ropa ase, tykase Ximão eya.

⁶Morarame tarãpa tõ tomase ropa eya xine. Kuhxo, tuhke kana tapoise. Tarãpa kararahpoĩse rokẽ toehse, tuhke kana exiryke.

⁷Morara exiryke imepỹ tykohmase, kanawa enehtohme eya xine kanawa pehme exiryke. Mame kanawa tonehse rahkene. Asakoro typehkase kehko kana ke eya xine. Neryĩse rokẽ toehse toto, kanawa tõ pehme exiryke.

⁸Yrome moro eneryke Ximão Peturu a tosekumuru po typorohse ynororo Jezu ẽpataka imehxo Jezu enetuputyryke tyya. Ynara tykase ynororo Jezu a, —Tamuxi, amekehme sã exiko ypoko. Popyra ase, iirypyryme, tykase ynororo.

⁹Tõsenuruhkase toto tuhke kana eneryke tyya xine.

¹⁰Morararo Ximão marõkomo, Tiaku tomo João maro, atakorõmãkomo, Zepeteu poenomo. Mokaro tõsenuruhkase roropa. Mame ynara tykase Jezu Ximão a, —Enaromyra exiko. Seromaroro kana poko oerohtoh rumekãko mase. Taroino jomiry ekarory poko rokẽ erohnõko mase. Imehnõ ahno akorehmãko mase Ritonõpo poko toto osenetupuhtohme, tykase Jezu eya. —Ỹ, tykase Ximão.

¹¹Morarame tykãnarykõ tyryhkase eya xine ehpikoxi ropa. Emero tynomose eya xine, Jezu maro toytotohkõme.

¹²Morarame pata pona tooehse Jezu. Moroto ipũ imotahpyry kynexine. Morarame Jezu eneryhtao tõpatapoe toehse ynororo Jezu ẽpataka. Ynara tykase ynororo Jezu a, —Tamuxi, ajohpãme sã ukurãkary se awahtao kukurãkako ropa, tykase.

¹³Mame Jezu a tomary tyrise epona. Ynara tykase eya, —Ỹ, okurãkary se ase. Tukurãkase ropa mase, tykase eya Jezu. Morara kaxĩpo sã rokẽ toekurãkase ropa ynororo ipũ imotahpyry.