San Lucas 24:18-53

¹⁸Bubiꞌë didzaꞌ bönniꞌ naꞌ lëꞌ Cleofas, rëꞌ Lëꞌ: ―¿Nactsuꞌ bönniꞌ ziꞌtuꞌ lu yödz Jerusalén, len tuzuꞌ liꞌ cutu nöznuꞌ lë naꞌ guc nij nas niꞌ?

¹⁹Niꞌr Jesús rëꞌ lequëꞌ: ―¿Bizxa naꞌ guc? Tëꞌ Lëꞌ: ―Lë naꞌ guc queëꞌ Jesús, bönniꞌ Nazaret. Guquëꞌ bönniꞌ bëꞌë didzaꞌ uláz queëꞌ Dios, atiꞌ len yöl‑laꞌ huac zxön benëꞌ dxin len bëꞌë didzaꞌ lahuëꞌ Dios len laugac yúguꞌtë bunách.

²⁰Guludödëꞌ Lëꞌ yuguꞌ bxuz uná bëꞌ len bönniꞌ taꞌná béꞌinëꞌ netuꞌ, glunëꞌ ga nu bchugu queëꞌ gatiëꞌ, atiꞌ guludë́ꞌë Lëꞌ lëꞌi yag cruz.

²¹Netuꞌ bentuꞌ löz guquëꞌ Lëꞌ bönniꞌ naꞌ ral‑laꞌ huöaꞌuëꞌ bunách Israel, san naꞌa chguc tsonn dza catiꞌ glac lë ni.

²²Yetú caꞌ, glunnu ga gröꞌtuꞌ baguíꞌi laꞌcnu ngul nútsaꞌcnu ladjtuꞌ. Yjacnu raꞌ yeru ba queëꞌ catiꞌ ziꞌa glen gbidz naꞌa dza,

²³len catiꞌ cutu guludzö́linu Lëꞌ, duhuöjcnu, len glënu netuꞌ gulaléꞌinu caꞌ yuguꞌ gbaz laꞌy queëꞌ Dios, nup niꞌ glë lecnu zoëꞌ nabanëꞌ Jesús.

²⁴Niꞌr yjaquëꞌ raꞌ yeru ba naꞌ laꞌquëꞌ bönniꞌ lzaꞌtuꞌ len yajxácaꞌquëꞌ lei ca naꞌ gulananu ngul naꞌ, san cutu gulaléꞌinëꞌ Jesús.

²⁵Niꞌr Jesús gudxëꞌ lequëꞌ: ―Lbiꞌiliꞌ, bönniꞌ curejniꞌi. Nazíd icj ládxiꞌdauꞌliꞌ cui tséjlëꞌliꞌ yúguꞌtë le gulanë́ꞌ bönniꞌ gluꞌë didzaꞌ uláz queëꞌ Dios.

²⁶¿Naruꞌ cu ben bayúdx sacaꞌ quiꞌë Cristo yuguꞌ lë ni len tsaziëꞌ ga niꞌ gáctërëꞌ blau?

²⁷Niꞌr gzu lahuëꞌ Jesús rguíxjöiꞌnëꞌ lequëꞌ yúguꞌtë le ruiꞌ didzaꞌ ca nac queëꞌ nayujgac lu guich laꞌy, ca naꞌ gzu lau bëꞌë didzaꞌ Moisés ga bdxintë yuguꞌ le gulanë́ꞌ yúguꞌtë bönniꞌ gluꞌë didzaꞌ uláz queëꞌ Dios.

²⁸Catiꞌ guladxinëꞌ yödzdauꞌ ga naꞌ zjaquëꞌ, benëꞌ Jesús ca bönniꞌ zéajtërëꞌ ziꞌtuꞌ.

²⁹Glunëꞌ bayúdx ugáꞌnlenëꞌ lequëꞌ, taꞌnë́ꞌ: ―Bgaꞌnlen netuꞌ, le chrdzöꞌ naꞌa, len chzoa gal. Niꞌr gyaziëꞌ yuꞌu Jesús, bugáꞌnlenëꞌ lequëꞌ.

³⁰Catiꞌ niꞌ röꞌë rágulenëꞌ lequëꞌ Jesús, gdel‑lëꞌë yöt xtil len gudxëꞌ Dios: “Xclenuꞌ.” Niꞌr buzxuzxjëꞌ lei, len bëꞌë quequëꞌ.

³¹Laꞌ niꞌz bdua lë naꞌ gbagaꞌ yöj lauquëꞌ, atiꞌ guluúnbëꞌë Jesús, atiꞌ Lëꞌ bunít cuinëꞌ lauquëꞌ.

³²Niꞌr glë lzaꞌquëꞌ tuëꞌ yetúëꞌ: ―¿Naruꞌ cu böálaꞌtsca ládxiꞌdauꞌruꞌ tsal niꞌ ruíꞌlenëꞌ rëꞌu didzaꞌ laꞌ nöz, len catiꞌ niꞌ ruzálj laꞌnëꞌ le nayúj lu guich laꞌy?

³³Laꞌ niꞌz gulayasëꞌ yhuöjquëꞌ Jerusalén, atiꞌ yajxácaꞌquëꞌ nudubquëꞌ idxineajtëꞌ bönniꞌ gbaz queëꞌ Jesús len nup nacuaꞌlen lequëꞌ.

³⁴Niꞌr glëꞌ chopëꞌ naꞌ bönniꞌ naꞌ nacuꞌë niꞌ: ―Chbubanczëꞌ Xanruꞌ, atiꞌ buluíꞌ lahuëꞌ, bléꞌinëꞌ Lëꞌ Simón.

³⁵Niꞌr gulaguíxjöꞌë ca naꞌ guc quequëꞌ laꞌ nöz chopëꞌ naꞌ, len ca naꞌ guluúnbëꞌë Jesús catiꞌ niꞌ buzxuzxjëꞌ yöt xtil naꞌ.

³⁶Tsal niꞌ tuꞌë didzaꞌ ca nacgac lë ni, laꞌ yajsoatëꞌ Jesús gatsj lahuiꞌl ga naꞌ nacuꞌë, atiꞌ rëꞌ lequëꞌ: ―Gul‑zóa dxi ládxiꞌliꞌ.

³⁷Niꞌr gladxi guladzöbnëꞌ le táquinëꞌ bxin taꞌléꞌinëꞌ.

³⁸Jesús rëꞌ lequëꞌ: ―¿Bizx quië röꞌliꞌ baguíꞌi? ¿Bizx quië rzaꞌ ládxiꞌliꞌ yuguꞌ lë ni?

³⁹Gul‑yutscaꞌ naꞌa len niꞌa. Nédaꞌczaꞌ ni. Gul‑cán nedaꞌ len gul‑yú nedaꞌ, le cutu daꞌ bëlaꞌ bxin, len cutu yuꞌu dxit ca ni rléꞌiliꞌ nac quiaꞌ nedaꞌ.

⁴⁰Niꞌ ruiꞌzëꞌ caꞌ didzaꞌ ni, buluiꞌinëꞌ lequëꞌ nëꞌë len niꞌë.

⁴¹Niꞌa qui yöl‑laꞌ rudziji quequëꞌ cutu gulayejlëꞌë, len tsal ban raz gulacuꞌë. Qui lë ni naꞌ Jesús gudxëꞌ lequëꞌ: ―¿I dë queëliꞌ ni le gahuaꞌ?

⁴²Niꞌr gulunödzjëꞌ queëꞌ látiꞌdauꞌbaꞌ böl chnéguiꞌbaꞌ, len tu quízxiꞌbaꞌ böz.

⁴³Gzxiꞌë lei Jesús len gdahuëꞌ lauquëꞌ.

⁴⁴Niꞌr rëꞌ lequëꞌ: ―Lë naꞌ glac quiaꞌ glac ca naꞌ gudxczaꞌ lbiꞌiliꞌ catiꞌ niꞌ zóalenaꞌ lbiꞌiliꞌ, gniaꞌ: “Run bayúdx utság yúguꞌtë le nayúj lu guich lu zxba queëꞌ Moisés len le gulanë́ꞌ bönniꞌ gluꞌë didzaꞌ uláz queëꞌ Dios, len le nayúj lu guich nazíꞌ lei Salmos, ca ral‑laꞌ gac quiaꞌ nedaꞌ.”

⁴⁵Niꞌr buzéjniꞌnëꞌ lequëꞌ lë naꞌ nayujgac lu guich laꞌy,

⁴⁶rëꞌ lequëꞌ: ―Cni nayúj lu guich ca run bayúdx gac queëꞌ Cristo, sacaꞌ quiꞌë len ubanëꞌ lu yöl‑laꞌ gut catiꞌ gac tsonn dza,

⁴⁷atiꞌ gdutë yödzlyú ral‑laꞌ gac lban ca nac quiaꞌ nedaꞌ quië lubíꞌi ládxiꞌgac bunách quië unít lahuëꞌ Dios dul‑laꞌ nabágaꞌquëꞌ. Lu yödz Jerusalén su lau gac lban naꞌ

⁴⁸atiꞌ lbiꞌiczliꞌ naꞌ bléꞌiliꞌ yuguꞌ lë ni ral‑laꞌ gunliꞌ lnaꞌ lau qui.

⁴⁹Gul‑yutscaꞌ, gsölaꞌa queëliꞌ le gzxiꞌ lu nëꞌë Xuzaꞌ gunnëꞌ queëliꞌ, san gul‑gáꞌnz Jerusalén catiꞌ gdxinr queëliꞌ yöl‑laꞌ huac naꞌ zaꞌ yehuaꞌ yubá.

⁵⁰Niꞌr bchëꞌë bönniꞌ daꞌquëꞌ Lëꞌ Jesús, zjaquëꞌ yödz Betania, atiꞌ niꞌ bchis nëꞌë len bulídz tsahuëꞌë lequëꞌ.

⁵¹Tsal niꞌ rulídz tsáhuiꞌzëꞌ caꞌ lequëꞌ, gzaꞌtëꞌ ga naꞌ nacuꞌë, buëpëꞌ yehuaꞌ yubá.

⁵²Gdöd gulayíj ládxiꞌquëꞌ Lëꞌ, lu yöl‑laꞌ rudziji quequëꞌ yhuöjquëꞌ Jerusalén.

⁵³Gulacuáꞌteczëꞌ nchil gdauꞌ, taꞌguꞌë Dios yöl‑laꞌ ba len tunëꞌ Lëꞌ zxön. Caꞌ nac.