San Lujc 24:18-53

¹⁸Badxiꞌ tijb bén la Cleofas laan, rëbaman: ―Gra ree bejn ragbee ni goc Jerusalén lën ree dxej guie. ¿Wen tijbzi lüj na̱j bén guzu Jerusalén ad gogbeetil ni goc ya?

¹⁹Dxel rëbaman loj reeman: ―¿Xhie goc? Abiꞌ rëb reeman: ―Ni beennë reeman Jesús bén Nazaret, laaman goc tijb bén badëë xtiidx Dios loj ree bejn, bén gop guialrniabee ziꞌc ni beenman në ree diidx ni guneeman niz loj Dios në niz loj ree bejn.

²⁰Në guial bayü ree bixhioz rniabee ree bixhioz laaman në ree dux guxtis ree din guiëtaman, abiꞌ bacaa reeman laaman loj crüjz.

²¹Par dunujn laaman na̱j bén yabëë ree bén Israel loj ree bén rom, per yan gojc choon dxej ni goc ree ni guin.

²²Majsi tioꞌp choon ree béngunaa noꞌch du lojn bachejb reeman dunujn, guial rsildoo wej reeman roꞌ baa guin,

²³abiꞌ guial ad baguiaat reeman xcuerpaman, bayejc reeman rü reeman diidx guial balüüloj ree anjl loj reeman, rëb ree anjl guin loj reeman guial naban Jesús.

²⁴Laa biquiaa gajc ree tioꞌp choon ree dux compniaran roꞌ baa guin abiꞌ baguiaa reeman ziꞌcgajczi rëb ree béngunaa guin, per ad baguiaat reeman Jesús.

²⁵Dxel rëb Jesús loj reeman: ―¡Xi nawëëg na̱j chigniaꞌdi abiꞌ xi raglaa par chililadxidi gra ni gunee ree bén badëë xtiidx Dios loj ree bejn!

²⁶¿Wen id na̱j ya guial sagdiaj Cristo, dxelri yayëꞌpaman xanyabaa?

²⁷Dxel guzuloj cusigniaꞌman laa reeman ni rën guiëb ni ca loj xtiidx Dios xcwentaman. Guzulojman con ree xlibr Moisejs abiꞌ basnuuman con gra ree libr ni bacaa ree bén badëë xtiidx Dios loj ree bejn.

²⁸Chi bidxin reeman guiedx lod zë reeman, been Jesús ziꞌc bén che mazri zijt.

²⁹Per laa reeman been reeman naguiejn din yayaꞌnnëman laa reeman, rëb reeman lojman: ―Bayaꞌn con dunujn, din ma gudxe yan abiꞌ ma cabej guiaal. Dxel guyu Jesús persi bayaꞌnnëman laa reeman.

³⁰Abiꞌ chi zojbnëman laa reeman xan mex, cwaꞌman guiadxtil abiꞌ chi gulox badëëman quixtëë loj Dios, gulaꞌman laan persi badëëman laan loj reeman.

³¹Hor guin gajc guzajc reeman ziꞌc bén baxal guiaaloj, abiꞌ bayünbee reeman laaman. Per laa gunidloj gajcaman,

³²zianz rëb loj lasaꞌ reeman: ―¡Zeꞌcliza dád nix yuꞌ du luxdoo chi zudnëꞌman lunejz, chi cusigniaꞌman dunuj ni rëb loj xtiidx Dios!

³³Abiꞌ niꞌquid gulëjzt reeman, laa bayunejz gajc reeman zia reeman Jerusalén lod rigaꞌ guidxiptib ree xi apóstoles Jesús con ree xcompniar reeman.

³⁴Rëb reeman loj grop ree bén guin: ―Walican ma baban Dad Jesús, ma balüülojman loj Simón.

³⁵Zianz be reeman diidx ni guzac reeman chi zë reeman lunejz xhie tëë naag bayünbee reeman Jesús chi gulaꞌman guiadxtil.

³⁶Sta cayü reeman diidx xcwent ree ni guin, chi balüüloj Jesús galay reeman, rëbaman: ―Yabeꞌcdxe Dios luxdoodi.

³⁷Dád badxaloj reeman abiꞌ bidxeb reeman guial gunaladx reeman anman cuguiaa reeman.

³⁸Per rëb Jesús loj reeman: ―¿Chexc zeel rdxebidi? ¿Chexc zeel yuꞌnawëëg luxdoodi?

³⁹Gol baguiaa yan në guiaꞌn. Naj gajcan, gol baquiꞌ naj gol baguiaa tëë naj, din tijb anm ad yuꞌtaman dxijt ad ca tëëtaman bëël ziꞌc ruguiaadi naj.

⁴⁰Chi rëbaman zian, balüü yaaman në guiaꞌman.

⁴¹Per laa reeman staczi ad rliladxt reeman guial tant rabaa reeman radxa tëë loj reeman, abiꞌ rëbaman loj reeman: ―¿Rajpidi taꞌn guialraw ya?

⁴²Dxel badëë reeman tibliaꞌ bëjl biguieꞌ,

⁴³abiꞌ cwaꞌman laab gudawaman niz loj reeman.

⁴⁴Zianz rëbaman loj reeman: ―Ni ma guzaꞌcan na̱j ni rnin lojdi chi sta zaꞌn con lëjt: Guial na̱j gac gra ree ni ca loj xlibr Moisejs ni gazaꞌcan, në xlibr ree bén badëë xtiidx Dios loj ree bejn, në loj libr salmos.

⁴⁵Dxel guxhalaman xquiarguiejn reeman persi bigniaꞌ reeman ni ca loj xtiidx Dios,

⁴⁶abiꞌ rëbaman loj reeman: ―Loj xtiidx Dios rëb guial Cristo, na̱j guial guiëtaman, abiꞌ ni yayon dxej yabanman.

⁴⁷Abiꞌ diizd Jerusalén suloj guireꞌch xtiidxaman xt guidib loj guidxliuj guial yuꞌ perdon par gra ree bén yayüjn xgab por xtol guililadx tëë reeman naj.

⁴⁸Lëjt na̱j testiw xcwent gra ree ni guin.

⁴⁹Naj gaxhal par lëjt ni ma na da Dadan. Per gol guzujsii luguiedx Jerusalén xt tiaꞌdi guialrniabee ni guiꞌt diizd xanyabaa.

⁵⁰Dxel briinë Jesús laa reeman luguiedx Jerusalén binëman laa reeman gajxh Betania, zianz gules yaaman beenleꞌman laa reeman.

⁵¹Abiꞌ laꞌtgaj cayüjnleꞌman laa reeman, wajsaman ziaman xanyabaa.

⁵²Chi gulox bazuxib reeman badëë reeman quixtëë lojman, dxel zia reeman Jerusalén, dád rabaa reeman.

⁵³Abiꞌ guixie guixie yuꞌ reeman lën yadooroꞌ Jerusalén ruzaꞌt reeman Dios zagdxe rudëëd tëë reeman quixtëë lojman.