Luka 24:18-53

¹⁸Imoja wao yakemigwe Kileopa, kamuuza, “Vino, gweye wiiyeka ayo huli mwenekae wa Yelusalemu hujuwile mbuli zilawilile kuko sambi sambi?”

¹⁹Kawauza, “Mbuli gani?” Nao wamwidika, “Mbuli zimulawilile Yesu wa Nazaleti, munhu ayo kakala mtula ndagu wa Mulungu na kakala yokoneka mgameso ga Mulungu na wanhu wose kamba kana udahi kwa kila kinhu kiyalongile na kiyatendile.

²⁰Wakulu wa walava nhosa na walangulizi zetu wamgela mmakono yatagusigwe kufa, na yawambigwe mumsalaba.

²¹Na tweye tutamanila kamba heyo ayo yonda yawakombole wanhu wa Izilaeli! Lakini lelo siku ya kadatu toka zilawilile mbuli zino.

²²Watwanzi wayagwe wa mdibumbila jetu watukanganya, imitootondo wachola kuna dipanga,

²³lakini hawaluvikile lukuli lwake. Wabwela walonga wawona wasenga wa kuulanga wawalongela kamba, Yesu mgima.

²⁴Abaho wanhu wayagwe wa mkibumbila chetu wachola kuna dipanga na wavika vivija viwawalongele watwanzi awo, lakini hawamonile bule.”

²⁵Yesu kawalongela, “Mweye mwa wabozi, na mizoyo yenu midala kutogola gose galongigwe na watula ndagu wa Mulungu!

²⁶Vino, halondigwa Kilisito Mkombola yadununzike kamba avo, abaho yengile muukulu wake?”

²⁷Yesu kawasimulila gaja galongigwe na Maandiko Gang'alile mbuli yake mwenyego, kusongela mna ivitabu va Musa na maandiko ga watula ndagu wose wa Mulungu.

²⁸Viwavikile behi na ikijiji kiwakalile wochola, Yesu kaitenda kamba kogendelela na mwanza,

²⁹lakini wamgoma ng'hani, wolonga, “Ukale na tweye, zuwa dihonga na ziza dokwingila.” Avo kagenda na kukala nao.

³⁰Kakala hasi na kuja nao, kasola gate, kamgwaa nhogolwa Mulungu, abaho kadibanzula kawagwaa.

³¹Bahaja, meso gao gagubuligwa na wamjuwa, lakini kapotela mgameso gao.

³²Wailongela, “Vino, mizoyo yetu hayakile na kimuhemuhe vitukalile mnzila kotulongela na kotusimulila Maandiko Gang'alile?”

³³Bahaja wenuka wabweleganya Yelusalemu, kuko wawavika wanahina longo na imoja wakala hamoja na wanhu wayagwe,

³⁴wolonga, “Mndewa kazilibuka kweli! Kamulawilila Simoni!”

³⁵Wanhu waja wawasimulila kija kiwalawilile mnzila, na vija viwamjuwile Yesu viyadibanzule gate.

³⁶Wanhu waja viwakalile wang'hali wowasimulila mbuli azo, bahaja Yesu kema hagati yao, kawalongela, “Zihozeni.”

³⁷Wasinhuka na kudumba wagesa wokona mzimu.

³⁸Lakini Yesu kawalongela, “Habali modumba na kunyawanyawa?

³⁹Loleni makono gangu na magulu gangu, na mojuwa kamba ayo niye. Mbabaseni mojuwa, kwavija mzimu waduhu lukuli na mizege, kamba vimnyona niye.”

⁴⁰Viyalongile avo, kawalagusila makono gake na magulu gake.

⁴¹Wakala wang'hali hawatogola, kwavija wakala wodeng'helela na kukanganya, avo Yesu kawauza, “Mna kinhu chochose chakuja hano?”

⁴²Wamgwaa kihande cha somba yakokigwe,

⁴³kakisola, kakija mgameso gao.

⁴⁴Abaho kawalongela, “Mbuli zino azo ziniwalongeleni ving'halile hamoja na mweye, kamba gose gandikigwe mbuli ya niye mna Gamalagizo ga Musa, na gandikigwe na watula ndagu wa Mulungu, na Zabuli galondeka galawilile.”

⁴⁵Baho kazigubula nzewele zao wadahe kugajuwa Maandiko Gang'alile.

⁴⁶Kawalongela, “Vino avo yandikigwe, Kilisito Mkombola kolondeka yadununzike na siku da kadatu kozilibuka kulawa kwa wafile,

⁴⁷kwa twaga jake, usenga wopetigwa kwa wanhu wa isi zose, kusongela Yelusalemu, muladi waleke nzambi zao na Mulungu yazigele kumgongo.

⁴⁸Na mweye awo wasindila wa mbuli azo.

⁴⁹Na niye nowagalila ija iyalongile Tatangu. Lakini beteni kudibuga mbaka nguvu vonda iwezileni kulawa uchanha.”

⁵⁰Abaho kawalongoza kunze kudibuga mbaka Betania, ako kenula makono gake, kawatambikila.

⁵¹Viyakalile kowatambikila, kawaleka kagaligwa kuulanga.

⁵²Wamtambikila na wabwela Yelusalemu kwa deng'ho kulu,

⁵³kipindi chose wakala Mng'anda ya Mulungu na kumgwaa nhogolwa Mulungu.