SAN LUCAS 24:18-53

¹⁸Te ɨɨⁿ tée nàni Cleofás ní xáhaⁿ‑dě xii‑gá: —¿Te ná cuèndá nchaa ñáyiu íchí nǐ sáá ñuú Jerusàlén xìní‑yu nchaa nàcuáa ní cuu, te ɨɨⁿ dìi‑ná yòhó ñá túú xìní‑n‑í? —càchí‑dé xǎhaⁿ‑dě xii‑gá.

¹⁹Te ní xáhaⁿ‑gǎ xii‑güedé: —¿Te ná ní cuu‑i? —càchí‑gá xáhaⁿ‑gǎ xii‑güedé. Te ní xáhaⁿ‑güedě xii‑gá: —Cuèndá Jèsús tée ñuú Nazàrét càháⁿ‑ndɨ́, chi tée‑áⁿ cúú‑dě ɨɨⁿ tée càháⁿ tnúhu Yá Ndiǒxí, te ío váha ndùu tnúhu càháⁿ‑dé ní cùu, te quìde‑dé sá vǎ yǒo tnàhí ndàcu cada nacuáa cudɨ́ɨ́ ìní Yǎ Ndiǒxí ndɨhɨ ñáyiu ni cùu.

²⁰Te cue tée cùu dútú cúnùu, ndɨhɨ cue tée cùnuu taxi tnuní ñáhá xìi‑ndɨ́ ní sáha cuèndá ñáhá‑güedě xii‑dé núú tě Pìlatú te ní sata caa ñaha‑güedě te núú cùrúxí‑áⁿ nǐ xíhí‑dé.

²¹Dico vitna sa ní cuu úní nduu sá nǐ xíhí‑dé, te nchúhú ní sani iní‑ndɨ́ sá těe‑áⁿ dàcácu nihnu ñaha‑dě xii nchúhú ñáyiu isràél núú nchàa tnúndòho tnúhu ndàhú ndécú‑ndɨ̌.

²²Dico ío cùñúhu‑ndɨ́ cúú, chi ɨɨⁿ ǔú ñáyiu dɨ̀hɨ́ ní tuha ñaha xìi‑dé ndécú ndɨ̀hɨ‑ndɨ́ ní sáháⁿ ngotó‑yu ndéxuehe tàcuíhndá‑gá yaú núú nǐ chihi‑güedé yɨquɨ cùñú‑dé,

²³te ní nasáá‑yu càchí‑yu xii‑ndɨ́ sá ñà túú‑gǎ yɨquɨ cùñú‑dé yɨ́hɨ́ xɨ̀tɨ́ yaú‑áⁿ. Te ní xiní‑yu espíritú xínú cuèchi núú Yǎ Ndiǒxí, te ní xáhaⁿ‑xi xìí‑yu sá ndécú vǐvú‑dě.

²⁴Te sátá dúcáⁿ te ɨɨⁿ ǔú cue tée cùndɨhɨ‑ndɨ́ ní sáháⁿ ndéhé‑güedě yaú‑áⁿ, te ní xiní‑güedé sá ndàá cúú‑xí nchàa tnúhu ní cáháⁿ ñáyiu dɨ̀hɨ́‑áⁿ, dico ñá túú ní xìní‑güedé tée‑áⁿ —càchí‑güedé xǎhaⁿ‑güedě xii‑gá.

²⁵Te Jèsús ní xáhaⁿ‑gǎ xii‑güedé: —¡Ío cùmání sǎ xìní tnùní‑ndó, chi ío cuèé sàndáá iní‑ndó tnǔhu ní cáháⁿ cue tée ní xóo cáháⁿ tnúhu Yá Ndiǒxí ndéé sanaha!

²⁶¿Te náa ñá túú tàú‑xi sá ndóhó Crìstú òré cúmǎní‑gǎ sáá nduu ndàa‑gá andɨu nǔú ndécú Dǔtú Ndiǒxí cundecu‑gá‑ǎⁿ? —càchí‑gá xáhaⁿ‑gǎ xii‑güedé.

²⁷Te ní ngüíta‑gá xáhaⁿ‑gǎ nàcuáa quèe‑xi nchaa tnúhu càháⁿ‑xi núú tùtú Yǎ Ndiǒxí cuèndá‑gá, te díhna‑gá ní cáháⁿ‑gá nàcuáa ndùu nchaa tnúhu yòdo tnuní núú tùtú ndíi Moìsés, te dǎtnùní ní cáháⁿ‑gá nàcuáa ndùu nchaa tnúhu yòdo tnuní núú tùtú nchaa cue tée ní xóo cáháⁿ tnúhu Yá Ndiǒxí ndéé sanaha.

²⁸Te òré ní quexìo‑güedé yuhu ñùú núú cuàháⁿ‑güedé‑áⁿ, te Jèsús ní quide‑ni‑gá sá yǎha‑gá quɨ́hɨ́ⁿ‑gá ɨngá xichi ni cùu.

²⁹Dico ní cáháⁿ ndàhú‑güedé núú‑gǎ sá quéndǒo‑gá xíáⁿ ndetatú‑gá ndɨhɨ‑güedé, te xǎhaⁿ‑güedě xii‑gá: —Quendóo ndɨhɨ ñaha xìi‑ndɨ́ iha ndetatú‑n chi sa ní cuaa, te tnavíí cundɨquɨⁿ —càchí‑güedé xǎhaⁿ‑güedě xii‑gá. Te xíáⁿ cáá ɨ̀ɨⁿ vehe cuánguɨhu‑güedé ndetatú‑güedé ndɨhɨ‑gá.

³⁰Te òré sa yɨ̀hɨ‑güedé mèsá ndɨhɨ‑gá cùdini ndɨhɨ ñaha‑güedé, te ní queheⁿ‑gá pàá te ní ndacáⁿ táhú‑gǎ núú Yǎ Ndiǒxí, te ní táhú cuèchi‑gá te dǎtnùní ní dácǎhñu ñaha‑gǎ xii‑güedé.

³¹Te òré‑áⁿ nǐ naquiní ñáhá‑güedě xii‑gá ní cùu, dico uuⁿni ní ndóñúhú‑gǎ.

³²Te ní xítnàha‑güedé: —Te ndáá sá sǔúní cùdɨ́ɨ́ ìní‑ó òré tá ndàtnúhu‑o ndɨ̀hɨ Jesús véxi ichi, te ta dànehé ñáhá‑gǎ xii‑o nchàa nacuáa quèe‑xi tnúhu càháⁿ‑xi núú tùtú Yǎ Ndiǒxí —càchí‑güedé xǐtnàha‑güedé.

³³Te ñá túú‑gǎ ní xǐndetu‑güedé chi ndɨ̌hɨ‑ni ní natnɨɨ‑güedé ichi cuánuhú‑güedé ñuú Jerusàlén, te ní nasáá‑güedé núú xǐndecu ndɨ ùxí ɨɨⁿ cue tée ní táúchíúⁿ Jèsús cáháⁿ tnúhu‑gá, ndɨhɨ dava‑gá ñáyiu.

³⁴Te cue tée xǐndecu‑áⁿ xǎhaⁿ‑güedě: —Ndáá sá nǐ ndoto Yaá cúú Mèstrú, chi ní xiní ñáhá tě Xǐmú —càchí‑güedé xǎhaⁿ‑güedě.

³⁵Te cue tée ní nasáá‑áⁿ nǐ cani‑güedé cuèndú nàcuáa ní cuu ichi, ndɨhɨ nàcuáa ní cuu ní naquiní‑güedé Jèsús òré ní táhú‑gǎ pàá ní dácǎhñu ñaha‑gǎ xii‑güedé.

³⁶Te càháⁿ dúcáⁿ‑ní‑güedě nàcuáa ní cuu ní quexìo Jesús ní ngúnutnɨ́ɨ‑gá ndéé tnuú‑güedé, te xáhaⁿ‑gǎ xii‑güedé: —Yá Ndiǒxí chíndèe ñaha‑gá xii‑ndo ǐo váha cùu iní‑ndó ndècu‑ndo —cachí‑gá xáhaⁿ‑gǎ xii‑güedé.

³⁷Te da ní yùhú‑güedé, te ní sani iní‑güedé sá dìcó ɨɨⁿ espíritú cúú sǎ ndéhé‑güedě ní cùu.

³⁸Dico Jèsús ní xáhaⁿ‑gǎ xii‑güedé: —¿Ná cuèndá yùhú‑ndó, te sàni ɨɨⁿ sani úú iní‑ndó‑í?

³⁹Chí cúndèhe ndaha‑í ndɨhɨ sáhà‑í te quiní‑ndó nǎ dɨu‑ni‑í. Te chí téndàha ñaha xii‑í te cundehe‑ndo, te núu ɨɨⁿ espíritú ndécú yɨ̀quɨ cuñú‑xi dàtná ndécú ndɨ̀hɨ yúhú —càchí‑gá xáhaⁿ‑gǎ xii‑güedé.

⁴⁰Te sátá dúcáⁿ nǐ xáhaⁿ‑gǎ te ní dánèhé ñáhá‑gǎ xii‑güedé ndaha‑gá ndɨhɨ sáhá‑gǎ.

⁴¹Te ío ní cuñúhu‑güedé, te ní cudɨ́ɨ́ ìní‑güedé sá ndécú‑gǎ tnuú‑güedé dico sàni ɨɨⁿ sani úú iní‑güedé, te ní xáhaⁿ Jèsús xii‑güedé: —¿Ndècu ndɨhɨ‑ndo luha sá cáxí‑ó ìha ñá? —càchí‑gá xáhaⁿ‑gǎ xii‑güedé.

⁴²Te ní sáñaha‑güedě xii‑gá luha chácá nǐ chíhó, ndɨhɨ dítá ñǔñú ñúhú ndùdí,

⁴³te ní queheⁿ‑gá te ndèhe‑güedé ní xexi‑gá.

⁴⁴Te dǎtnùní ní xáhaⁿ‑gǎ: —Nchaa sá nǐ yáha‑í‑a cùu‑xi sá nǐ cachí tnúhu‑í xii‑ndo cǔtnàhá ndécú ndɨ̀hɨ ñaha‑gá‑í xii‑ndo, chi ní cachí‑í sá dàcuɨtɨ́í càda‑xi nchaa nacuáa càháⁿ‑xi núú tùtú ndíi Moìsés, ndɨhɨ núú tùtú ndèé tnúhu ní cáháⁿ cue tée ní xóo cáháⁿ tnúhu Yá Ndiǒxí ndéé sanaha, ndɨhɨ núú lìbrú Sǎlmú —càchí‑gá xáhaⁿ‑gǎ xii‑güedé.

⁴⁵Te òré‑áⁿ nǐ sáñaha‑gǎ sá xìní tnùní‑güedé, te ní tecú tnùní‑güedé nchaa tnúhu càháⁿ‑xi núú tùtú Yǎ Ndiǒxí.

⁴⁶Te ní xáhaⁿ‑gǎ xii‑güedé: —Ducaⁿ ndèé tnuní núú tùtú Yǎ Ndiǒxí sá dàcuɨtɨ́í sǎ yǔhú Crìstú cuú‑í, te nduu úní ndoto‑í.

⁴⁷Te nɨhìí ñuyíú cùténuu tnúhu ní cáháⁿ‑í, dico díhna nuu‑gǎ ñuú Jerusàlén ngüíta‑yu cacunehe ñàhá‑yu xii‑í, te cáháⁿ‑yu nàcuáa ní dánèhé‑í‑yu, te cúñàhá‑yu xii cue ñáyiu sá ná dàndixi túu‑yu iní‑yu sá ñà túú quìde váha‑yu, te dàñá‑yu nchaa ichi cuèhé ichi duha ndècú‑yu, te natnɨɨ́‑yu ichi Yá Ndiǒxí, te ducaⁿ te cada càhnu iní‑gá nchaa yícá cuěchi‑yu.

⁴⁸Te vitna nchòhó cuu‑ndo cuè tée cáháⁿ ndáá nchaa nàcuáa ní cuu chi ní xiní núú‑ndó.

⁴⁹Te yúhú tendaha‑ǐ Espíritú Yǎ Ndiǒxí quixi cundecu ndɨhɨ‑ndo, chi ducaⁿ nǐ cachí‑gá. Dico chí cúndècu‑ni ñuú Jerusàlén‑áⁿ ndèé ná quèxio Espíritú Yǎ Ndiǒxí ngúndecu ndɨhɨ‑ndo cuèndá chindee ñàha‑xi xii‑ndo cada‑ndo nchaa nacuáa ní cáháⁿ‑í —càchí‑gá xáhaⁿ‑gǎ xii‑güedé.

⁵⁰Te Jèsús ní queñuhu ñaha‑gǎ xii‑güedé ñuú Jerusàlén ndécá ñàha‑gá cuáháⁿ ñuú Bètaniá, te xíáⁿ nǐ ndonehe‑gá ndaha‑gá núú nǐnu, te ní xícáⁿ táhú ñàha‑gá xii‑güedé núú Yǎ Ndiǒxí.

⁵¹Te sátá nǐ xícáⁿ táhú ñàha‑gá xii‑güedé núú Yǎ Ndiǒxí, te ní quee‑gá tnuú‑güedé cuándaa‑gá andɨu.

⁵²Te ní ngüíta‑güedé ní cachí‑güedé sá ǐo càhnu cuu Jesús, te ní natnɨɨ‑güedé ichi cuánuhú‑güedé ñuú Jerusàlén, te súúní cùdɨ́ɨ́ ìní‑güedé ñúhú‑güedě ichi.

⁵³Te nchaa nduu ní xíndecu‑güedé veñúhu càhnu sá ǐo cùnuu ní ndacáⁿ táhú‑güedě núú Yǎ Ndiǒxí, te ní cachí‑güedé sá ǐo càhnu cuu‑gá. Duha ní cuu dàvá‑áⁿ.