San Lucas 24:18-53

¹⁸Inepe ni ayo y uno ni y naanña si Cleofas ya ilegña nu güiya: Ada sumagaja jao guiya Jerusalem, ya ti untungo jafa manmalofan güine sija na jaane?

¹⁹Ayonae ilegña nu sija: Jafa sija? Ya ilegñija nu güiya: Ayo sija iyon si Jesus Nasareno, ni profeta güe ni gaeninasiña gui checho yan y sinangan gui menan Yuus yan todo y taotao sija;

²⁰Ya maentrega, gui magas mamale yan y magalajenmame para umasentensia ni y finatae, ya maatane gui quiluus.

²¹Lao jame innanangga sa güiya y para unafanlibre y Israel. Junggan, yan mas qui todo este, pago esta mina tres na jaane desde que masusede estesija.

²²Yan locue palo famalaoan ni mangachongmame janamanman jam sa manmato gui naftan gui taftataf gui egaan;

²³Ya anae ti masoda y tataotaoña, manmato guiya jame ilegñija na manmanlie sija y liniin angjet sija, ni y jasnangane na lâlâgüe.

²⁴Ya mamjanao guato gui naftan palo gui mangachongmame ya masoda taemanoja y sinangan y famalaoan; lao ti malie güe.

²⁵Ya ilegña nu sija: O taotao manaetiningo jamyo, yan y ñateng y corasonmiyo para injenggue todo y sinangan y profeta sija!

²⁶Ada ti nesesita na si Cristo ufamadese nu este sija ya taegüine nae ujalom gui minalagña?

²⁷Ya jatutujon desde as Moises, yan y profeta sija, y jasangangane claro todo ni tinigue ni y pot güiya.

²⁸Ya manmato gui sengsong ni jajananagüe güije; ya jasigue para mas chago jinanaoña.

²⁹Lao sija janasaga fuetsao, ilegñija: Maela tafañaga sa este puenge ya jocog y jaane; ya jumalom para usaga mañisija.

³⁰Ya susede, anae matachong gui lamasa yan sija, jachule y pan ya jabendise, ya jaipe ya manninae.

³¹Ayonae manmababa atadogñija ya matungo güe; lao güiya jamalingoja gui inatanñija.

³²Ya ilegñija entre y dos: Ada ti sinenggue y corasonta gui sumanjalomta mientras jacuentutusejit gui chalan, yan anae jababayejit ni y tinigue?

³³Ya cumajulo y dos güije na ora, ya tumalo guato Jerusalem: ya masoda y onse mandadaña, yan y manestaba mangachongñiñija,

³⁴Ya ilelegñija: Magajet, esta cajulo y Señot, na umalie yan si Simon.

³⁵Ayonae sija jasangane nu este sija y masusede gui chalan; yan jafa taemano, tungoñija anae jaipe y pan.

³⁶Ya mientras manguecuentos nu este sija, güiya tumojgueja gui entaloñija, y ilegña nu sija: Pas guiya jamyo.

³⁷Ayonae manmaañao ya manmajngang ya jinasonñija na manmanlie sija un espiritu.

³⁸Lao güiya ilegña nu sija: Jafa na ninafanestotba jamyo? Ya jafa na cumajulo y jinasonmiyo gui corasonmiyo?

³⁹Atanja y canaejo yan y adengjo, sa guajo mismoyo: pacha yan inlie sa y espiritu taecatne ni tolang, taegüije inliija na guajayo,

⁴⁰Ya anae jasangan este, manfinanue ni y canaeña yan y adengña.

⁴¹Ya anae ti jajonggue sija pot minagofñija, ya ninafanmanman, güiya ilegña nu sija: Guaja güine jafa para utacano?

⁴²Ya sija janae un pedason güijan na mapeja.

⁴³Ya jachule ya jacano gui menanñija.

⁴⁴Ya ilegña nu sija: Este sija na sinangan ni y jusangangane jamyo anae manjijita: taemanoja na nesesita na umacumple todo y esta matugue gui lay Moises yan y profeta sija, yan y Salmos pot guajo.

⁴⁵Ayonae manbinaba y jinasoñija para ujatungo y tinigue;

⁴⁶Ya ilegña nu sija: Taegüine esta matugue, na si Cristo ufamadese ya ucajulo talo guinin y manmatae gui mina tres na jaane;

⁴⁷Ya umapredica gui naanña y sinetsot yan inasiin isao, gui todo y nasion sija, umatutujon desde Jerusalem.

⁴⁸Ya jamyo testigo nu estesija na güinaja.

⁴⁹Ya, estagüe, na bae jutago y promesan y Tatajo gui jilo miyo: lao jamyo fañaga gui siuda guiya Jerusalem, asta que manminagago jamyo ni y ninasiña guinin iya jululo.

⁵⁰Ya manquinene juyong asta Betania; ya jajatsa y canaeña ya manbinendise sija.

⁵¹Ya susede anae manbinendise, jaapatte güe guiya sija ya machule julo gui Langet.

⁵²Ya sija jaadora ya manalo guato Jerusalem yan y dangculon minagofñija;

⁵³Ya mangaegue siempre gui templo, manmanbendidise as Yuus. Amen.