Lukaj 24:18-53

¹⁸Amen ira, me ad a Kleopaj, ap japen indan i: Koe men wai ta men nan Ierusalem, me jaja, me wiauier waja o ni ran pukat?

¹⁹A kotin majani on ira: Pwe dakot? Ira ap indan i: Duen Iejuj en Najaret, me jaukop manaman amen ni a wiawia o majan akan mon Kot o aramaj karoj.

²⁰O duen jamero lapalap o atail jaumaj akan ar panala i pwen pakadeikada on matala o kalopuela i.

²¹A je kiki on, me a pan kotin kamaioda wein Ijrael. Ari ran wet pon jili pon murin mepukat wiauier.

²²O pil kij at li akai kamajak kin kit ar pwaralan joujou o jankonai.

²³Ni ar jota diar kalep a, rap puredo indada, me re diaradar janjal en tounlan kai, me katitiki, me a iajadar,

²⁴O kij at kai kolan joujou o, ap diaradar, duen li oko kajokajoida, a i me re jota diarada.

²⁵A kotin majani on ira: O koma meid lolepon o pwand nan monion omail, en kamelele meakan, me jaukop akan kopadar.

²⁶Kaidin i, me udan Krijtuj en kalokolok ap kodalan a linan?

²⁷A ap kotin kawewe on ira kijin likau kan duen pein i, tapiada ni Mojej kokodo lel jaukop akan.

²⁸Irail ap koren ion kanim, me irail koko on. I ari kajonejon ira, dene a pan kotin daulul.

²⁹Ira ap nidinidiki i potoan on: Kom kotikoteta re at, pwe a pan waja ponier o ran wet koren ion imwijokela. A ap kotilon on nan im o, pwen mimieta re ra.

³⁰Kadekadeo ni a kotin ian ira ni tepel o, a kotin limada prot, laolaoki, a lao pilitiki pena, a kotiki on ira.

³¹Maj ara ap pad pajaner, ira ap aja i. A ap kotin joredi jan mo ’ra.

³²Ira ap inda nan pun ara: Monion ata jota mokimokid ni a kotin mamajani on kita pon al o, ni a kotin kawewe on kita kijin likau kan?

³³Ira ari uda ni auer ota o purelan Ierusalem, o diarada ekamen ko, o me ian ir, kot pena waja takij,

³⁴Katitiki: Nan melel Kaun o kotin iajadar o pwara don Jimon,

³⁵Ira ap kajokajoi, me wiauier nani al o, o duen ara ajaki i a pilitiki pajan prot.

³⁶A ni ar majan pena mepukat, pein Iejuj ap kotin pwara don nan pun arail majani on ir: Komail popol!

³⁷Irail ari majapwekadar o wapondar, o re kiki on, me ani men, me re udial.

³⁸A kotin majani on irail: Da me komail majak ki? O menda lamelam pukat mi nan monion omail?

³⁹Komail kilan pa i kat o na i kat, pwe pein nai ta. Doke ia o kilan, pwe ani jota kin uduk o ti, duen omail kilan ia.

⁴⁰A lao majani mepukat, ap kajale on irail lim a o aluwilu a kan.

⁴¹A ni ar jota non kamelele pweki ar peren o puriamuiki, ap kotin majani on irail: Jota kan omail met?

⁴²Rap ki on i kijan mam inin o onik.

⁴³I ari konot mo ’rail.

⁴⁴A kotin majani on irail: I majan akan, me I ki on komail er, ni ai mimieta re omail, pwe karoj en pwaida, me intinidier duen nai nan kapun en Mojej, o jaukop akan, o pjalm akan.

⁴⁵I ap kotin kalolikoni irail, pwe ren dedeki kijin likau kai.

⁴⁶O kotin majani on irail iduen a intinidier, o iduen udan kalokolok en Krijtuj, ap maureda jan ren me melar akan ni ran kajilu,

⁴⁷O padapadaki on wei karoj ni mar a, ren kalula, pwe dip akan en lapwada, a pan tapida nan Ierujalem.

⁴⁸A komail me jaunkadede en mepukat.

⁴⁹A kilan, I pan kadara don komail, me Jam ai inaukidar. A komail pan mimieta nan kanim o, komail lao audaudekier manaman jan poa.

⁵⁰A kotin kalua ir alan Petanien, kotikida lim a, kapai irail ada.

⁵¹Kadekadeo ni a kotin kapal ir ada, a kotiwei jan irail, kotidala nanlan.

⁵²Irail ari kaudok on i, ap pure don Ierujalem perenda kaualap;

⁵³O re potopot nan im en kaudok kapina o kaudok on Kot.