Luuka 24:18-53

¹⁸Gooto e maɓɓe biyeteeɗo Kiliyopas jaabii mo, wii: —Aan tan gooto woni koɗo ley Urusaliima mo anndaa ko waɗi e ley ɲalaaɗe ɗee koo naa?

¹⁹O wii ɓe: —Koɗum? Ɓe mbii mo: —Ko waɗi e Iisaa Nasaraatunke oo koo. O annabaajo, jom baawɗe ley haala makko e golle makko yeeso Laamɗo e yimɓe fuu.

²⁰Kaa hooreeɓe yottinooɓe sadaka e mawɓe men ngaɗi mo e juuɗe laamu yalla omo jukkee jukkungo maayde, tonti mo e leggal bardugal.

²¹Miɗen njikkunoo kanko soottitotoo Israa'iila. Hannde woni ɲalooma tataɓo ko ɗum waɗi.

²²Kasen, yoga e rewɓe amen kaaynii min. Ɓe njehi to yanaande too beetee law,

²³ɓe tawaali ton tew makko, ɓe ngarti, ɓe mbii malaa'ika'en ɓannganii ɓe, mbii omo wuuri.

²⁴Caggal ɗum, yoga e wondiiɓe amen njaaɓe to yanaande too ɓee, tawri no rewɓe ɓee mbiiri nii, kaa kanko e hoore makko, ɓe njiyaali mo.

²⁵Oon wakkati Iisaa wii ɓe: —Hey onon famarɓe hakkille! Ɓooyii on ngoonɗinaali haala annabaaɓe!

²⁶Wanaa ana tilsi Almasiihu torree, naata e teddungal mum naa?

²⁷Nden o fammini ɓe ko Binndi ɗii fuu kaali haala makko, gila e Tawreeta Muusaa faa e dewte annabaaɓe ɓee.

²⁸Nde ɓe paandii wuro ngo ɓe immanii ngoo ndee, Iisaa waɗi hono o anniyiiɗo ɓettaade nii.

²⁹Nii ɓe ɲaagii mo, ɓe mbii: —Heddoda e amen, sabi hiirii, jemma warii. O jokki e maɓɓe, o jippanii ɓe.

³⁰Nde ɓe njooɗinoo eɓe ɲaama ndee, o ɓami buuru, o yetti Laamɗo, o helti buuru oo, o hokki ɓe.

³¹Non gite maɓɓe peerti, ɓe annditi mo. Ɗon e ɗon o iwi e gite maɓɓe.

³²Gooto fuu darii ana wiya goɗɗo: —Nde o haaldata e men e laawol ngol omo fammina en Binndi ɗii ndee, wanaa ɓerɗe men ɓuuɓii naa?

³³Ɗon e ɗon, ɓe immii ɓe mbirfitii Urusaliima, ɓe tawtoyi ton sappo e go'o ɓee e wondiiɓe mum'en ana kawriti.

³⁴Ɓeen mbii: —Goonga, Kalfaaɗo men Iisaa wuurtii, o ɓannganii Simon.

³⁵Ɗiɗon ɓee duu njantanii ɓe ko waɗunoo e laawol mum'en, e no annditiri mo nde o helti buuru ndee.

³⁶Ɓe tilaaki haalde, faa Iisaa e hoore mum darii hakkunde maɓɓe, wii ɓe: —Onon e jam!

³⁷Ɓe kuli, ɓe ɗemƴii, ɓe miili ko ɓe njii koo yo mbeelu.

³⁸Non o wii ɓe: —Ko hulɓini on? Ko saabii so oɗon miila ɗii miilooji e ɓerɗe mon?

³⁹Ƴeewee juuɗe am e koyɗe am, ɗum miin jaati. Memee kam, ƴeewon. Sabi mbeelu walaa tew, walaa gi'e no am nii.

⁴⁰Nde o haalata ɗum ndee, o holli ɓe juuɗe makko e koyɗe makko.

⁴¹Nde wonnoo ɓe ndonkii goonɗinde saabe seyo e kaayɗe, o wii ɓe: —Oɗon njogii ɗoo ko ɲaametee naa?

⁴²Ɓe ngaddani mo tayre liingu cahaaɗo,

⁴³o nanngi nde, o ɲaami yeeso maɓɓe.

⁴⁴Caggal ɗum, o wii ɓe: —Ko Tawreeta Muusaa e dewte annabaaɓe e Jabuura cappii e am koo fuu, ana tilsi ɗum goonɗa. Ɗum jaati woni ko kaalannoo-mi on nde ngondunoo-mi e mon ndee.

⁴⁵Oon wakkati, o udditi hakkillaaji maɓɓe, yalla eɓe paama Binndi ɗii.

⁴⁶O wii ɓe: —Ana winndii Almasiihu oo torrete faa maaya, immitoto hakkunde maayɓe ɲalooma tataɓo.

⁴⁷Ana winndii kasen: saabe makko leɲi ɗii fuu ooynante faa tuuba, keɓa yaafaamuya luutti. Ɗum ana fuɗɗa gila Urusaliima.

⁴⁸Onon ngoni seettotooɓe kulle ɗee!

⁴⁹Miin, mi neldan on ko Baabiraaɗo am fodi koo fuu. Kaa keddee e ngalluure ndee, faa nde baawɗe gonɗe dow ɗee njippii e mon fuu.

⁵⁰Iisaa naɓi ɓe faa hedde Baytaniya, hunci juuɗe, duwanii ɓe.

⁵¹Ɗo o duwantoo ɓe ɗoo, o seerti e maɓɓe, o ŋabbinaa dow kammu.

⁵²Ɓe cujidani mo, caggal ɗum, ɓe mbirfodii Urusaliima e seyo manngo.

⁵³Wakkati fuu eɓe tawee ley Suudu Dewal Mawndu nduu, eɓe njetta Laamɗo.