Sam 91:11-16

¹¹Kaqu garuni Tamasa sari Nana mateana pude kopu nigo, pude va aqorigo vasina la si goi.

¹²Kaqu ovuligo rini pa limadia pude lopu kaqu hite raza nia sa nenemu pa patu.

¹³Kaqu neti goi sari na laione na noki; sari na laione variva matagutudi meke na noki variva mate.

¹⁴Zama sa Tamasa, “Kaqu harupi Rau sarini pu tataru Nau, meke kaqu va aqori Rau sarini pu gilanau sapu Arau se Zihova.

¹⁵Pana tepa mae sarini, si kaqu olaṉi Rau, kaqu koa turaṉi Rau si arini pa tinasuna, kaqu va sarei na va lavati Rau si arini.

¹⁶Kaqu pia ni Rau koarini sa tinoa gelenaena, meke kaqu harupi Rau si arini.”