1Pemineg kew is langun he menge etew he ed-ubpà kayi te kelibutan,
2dekelà is dengeg din etawa kenà, sepian etawa pubri.
3Egkaǥi a te egkezumahan te ketau ne zekelà is pulus te ked-isip-isip ku.
4Ebpemineg a te menge erubasa ne idseysey ku is menge kehuluǥan dan, dutun te edtukar a te alpa.
5Minsan ke egkehitavù is bangkit, ne minsan ke edliǥuyan a te lalung wey limbungan he menge etew he edsarig wey ebpahambug tenged te azen dan, ne kenà a egkahandek.
7Is etew kenà ebpekehimu he ebayad diyà te Megbevayà para kenè en sikandin mebpatey.
8Su ǥeina te utew mahal is untung, ne minsan sengemenu kezekelà ne kenà ereg he ibayad
9para meuyag is etew te wazà pidtemanan ne kenè en mebpatey.
10Su netuenan en te langun he minsan is uluwanen he etew ne ebpematey, iring din daan sikan is menge tulebung wey menge taleng. Ne emun ebpematey zan en igketaǥak dan dà is menge ketiǥeyunan dan diyà te zuma.
11Is menge leveng dan iyan en baley zan te wazà pidtemanan. Ne zutun sikandan ebpekeubpà te taman te taman, minsan pa ke zuen dan tanà hein uuyag dan pa.
12Minsan ke sepian is etew ne ebpatey ǥihapun iring te uyaǥen etawa leew.
13Iyan heini egkepeveyaan te menge etew he edsarig te keugelingen dan wey sikan is ebpekeuyun te egkeǥiyen dan.
14Netendek en is kebpatey zan iring te menge kerehidu. Ne is kemetayen iyan egiya kandan pehendiyà te penlevengà, iring te ed-elima he iyan egiya te menge kerehidu. Emun egkepawà, egkeveyveyaan sikandan duen te menge etew he midtinazeng. Egkengeredak is nemematey. Iyan en egkehimu he ubpeey zan, is leveng.
15Piru siak mulà, edlibriyen a te Megbevayà te ǥehem te kemetayen, su egkuwaan e zin.
16Kenè ka mesina ke edsepian is duma, wey emun egkeumanan pa is ketiǥeyunan te pemilya zan.
17Su kenè dan heeyan egkeuwit emun ebpatey zan en; is ketiǥeyunan dan kenè dan egkeuwit diyà te leveng.
18Dutun te uuyag pa sikandan, ne iyan ked-isipa zan te keugelingen dan he midtuvazan sikandan te Megbevayà, ne edeliǥen sikandan te menge etew tenged te kegkemeuswaǥen dan,
19iyan, ebpekaamur ǥihapun sikandan te menge kepuun dan he nemematey en, diyà te lugar he kenè dan en ebpekevulug ebpekaahà te merayag.
20Is sepian he etew he wazè din kedsavut, ebpatey he iring te menge langgam.