Sam 138:1-5

¹(Keke kinera te Devita) Kei Zihova, zama leana si rau koa Goi pa doduruna sa buloqu, kera vahesi Igo rau si Goi pa kenudi ri doduru tamasa pule.

²Tia la ia rau sa Mua Zelepade hopena meke hoqa todoṉo si rau, meke vahesia rau sa Pozamu, sina koa gua koasa Mua tataru nabuna, meke sa Mua kinopudi rina Mua zinama, ura ele vata dogoro nia Goi sapu sa Pozamu meke sari na Mua zinama si ṉati hiniva ni sari doduru.

³Totoso tepa atua rau sa tinokae, si va tabe au Goi, meke pa Mua ṉiniraṉira si va ṉiṉira au Goi.

⁴Sari doduru baṉara pa kasia popoa si kaqu vahesi Igo, ke Zihova, sina ele avosi rini sari na Mua vina tatara.

⁵Kaqu kera vura ni rini sari doduru gua pu evaṉi Goi, meke sa guguana sa Mua ṉiniraṉira lavata.