1Dawid sasawa Iawe God ipa ne sapana, ita inawana, sa baiwa ne mai santeapa. Me ne onianede ando mai kadi donsapa sa baiwa ne mai inguguranteapa.
2Emalawoa apanawa kadi daitada dewalala ne bodaneapu kadineapua baiwa, tane mo muba bagorantopue omepu.
3Mo uara awodeantopue ne onana enapu, tane ne mai mo sauntapa. Mo ne bodaneampo, ne sumanaina Iawe God mampe itupa.
4Ne Iawe God iririsapo dewa dea os ne baina dewasapi: walama uduudu ne inawana bedewe me duwa bedewe wainepina, ne me euwaa ewapaa menanede ita me duwa kakaiwa bedewe mampe rauparintapa.
5Ne poka mainawo wisempo me bola euda bedewe wereganepi, me duwa bedewe ne onianepi, me nau osowe ionoido itunepi.
6Ne emalawoana apanawa uara enapue pananeapu, tane ne mo onaponteapa. Ne Iawe God duwa bedewe me mampe pue pulontape supa, ne nuaeu mampe ka wape sino epape ita sasantapa Iawe God mampe.
7Iawe God, manawo rauparintepino etanea, nuaparenaite saunea!
8E ne dianee waanase, “Wine mainawo gagaloitaa.” Sa baiwa tauma ne manawo iedina.
9Ne ipa e nolaa dewalala, mai nuaa kadilepio adia ne mainawo itua, e mai weregaitaa! E ne inaneana, e walama uduudu ne sauneie, sa baiwa tauma mai nebaida enea! Mai eneaiaa!
10Naita ne mamana ita inana adiu ne mainawo itupu, tane Iawe God walama uduudu wadanempe mampeneampa.
11Iawe God, ne emalawoana apanawa wadaneapua baiwantoi, sa baiwa waeuwaneawo waroroepa, e inta dodomana asiasi banlanea.
12Emalawoa apanawa sa ne lagana wai, mo ne kadineapua menamode, sa baiwa e mai mo emowo ne wadaneapu!
13Ne sumanaintedina Iawe God euda dewasapio ewapa, tawo ema osowe inawaa wainepino me dewasapi.
14Sa baiwa Iawe God sumanaiwaitana, insaisala itune badowa enonuna, Iawe God sumanaiwaitana.
