SALMOS 77:9-19

⁹¿Huelis Toteco Dios ya quielcajqui para monequi nechchihuilis catli cuali na catli niitztoc ipan tequipacholi? ¿Huelis tlahuel cualantoc huan yeca ayacmo quinequi nechtlasojtlas?

¹⁰Huan ipan nohueyi tequipachol nimoilhui: “Toteco Catli Más Hueyi mopatlatoc. Achtihui niitztoya inejmac huan nechtiochihuayaya miyac, pero ama nechcualancaita.

¹¹Más cuali niquelnamiquis nochi nopa huejhueyi tiochicahual nextili catli TOTECO nechchihuili huejcajya.”

¹²Quena, mojmostla nimoilhuis tlen nopa huejhueyi tlamantli para nochipa. Amo hueli nijcahuas nimonejnehuilis tlen yaya quichijtoc.

¹³¡NoTeco Dios, nelía tlatzejtzeloltic nochi moojhui! Amo aqui seyoc dios catli más quipiya chicahualistli que ta, titoTeco.

¹⁴¡Ta tiDios catli tijchihua huejhueyi tiochicahual nextili huan miyac tlamantli catli masehualme quisentlachilíaj! Huan hasta ama quejipa tijnextía mohueyi chicahualis.

¹⁵Ica mohueyi chicahualis techmanahui, timomasehualhua catli tiiconehua Jacob huan José.

¹⁶Toteco Dios, nopa hueyi atl catli itoca Chichiltic momajmati quema mitzitac. Huan huihuipicac hasta tlatzintla campa más huejcatla.

¹⁷Nopa mixtli quichijqui ma tlaquiyahui chicahuac. Huan tlatomonqui nepa ilhuicac. Huan nojquiya tlapetlanqui tlen se lado hasta seyoc.

¹⁸Caquistic tlatomonilotl ipan nopa hueyi ajcomalacatl. Huan nopa tlapetlancayotl quitlahuili nochi tlaltipactli, huan ni tlaltipactli huihuipicac.

¹⁹Tijchijqui se ojtli quema tiquixcotonqui nopa hueyi atl, pero amo aqui quipanti campa tijquetztiyajqui moicxihua.