SALMOS 59:3-14

³Nechpijpiyaj para quiitase quenicatza nechmictise. Masehualme catli quipiyaj chicahualistli nechchixtoque yahualtic. Pero amo pampa niquinchihuilijtoc se tlamantli catli amo cuali o pampa niquinixpanotoc.

⁴¡Amo! Amo tleno catli fiero niquinchihuilijtoc, pero inijuanti mocualtlalíaj para nechmictise. ¡TOTECO, xiisa! ¡Xihuala techpalehuiqui!

⁵TOTECO, Ta Catli Tijpiya Nochi Chicahualistli, ta catli titoDios tiisraelitame, ximotlanana huan xiquintlatzacuilti nopa tlalme campa itztoque masehualme catli amo israelitame, pampa techyahualojtoque. Amo xiquintlapojpolhui nopa masehualme catli mosisiníaj huan nimantzi tlaixpanoj.

⁶Mojmostla ica tlapoyahui hualahuij para quitlachilise quenicatza huelis techtlanise. Tzajtzitinemij quen chichime catli quiyahualojtinemij ni altepetl.

⁷Nijcaqui camanaltij fiero hasta camaposonij, huan mitztelchihuaj Toteco, pampa inijuanti quiijtohuaj: “Amo aqui techcaqui.”

⁸Pero ta TOTECO, san xiquinhuetzquili, huan xiquinpinahualti ni masehualme tlen sequinoc tlalme catli nechyahualohuaj.

⁹NoTeco Dios, pampa nocualancaitacahua quipiyaj chicahualistli, ipan ta nimotemachis, pampa ta catli techmanahuía.

¹⁰NoTeco Dios, ta nochipa techicnelijtoc miyac, yeca nijmati para temachtli techyacantiyas. Tijchihuas ma niquitas catli tlahuel nijnectoc ma ininpanti nocualancaitacahua.

¹¹NoTeco, ta catli techmanahuía, amo xiquinmicti nimantzi ni nocualancaitacahua, pampa huelis ni nomasehualhua nimantzi quielcahuase catli ininpantis nopa mosisinijca masehualme. Más cuali san xiquinsemana ica mohueyi chicahualis huan xiquinechcapantlali.

¹²Quena, xiquintlatzacuilti pampa nochi inijuanti tlahuel istlacatij, mohueyimatij huan tlatelchihuaj.

¹³Xiquintzontlamilti ica mohueyi cualancayo, huan xiquintlamiixpolihuilti. Huan quej nopa nochi masehualme quimatise para ta, Toteco Dios, titlanahuatía ipan tlali Israel, huan ipan nochi tlaltipactli.

¹⁴Nocualancaitacahua mocuepaj ica tiotlac huan tzajtzij quen chichime, huan quiyahualojtinemij ni altepetl.