Yabura 59:3-14

³N natanga tinxintaree ma. N nakisi faxɛtie ma,

⁴barima e wama n faxafe. Sɛnbɛmae na e malanfe n xili ma, hali n mu findi fe kobi raba ra, hali n mu yunubi yo raba Alatala ra.

⁵Hali n mu na fe ɲaaxi rabafe, e e gima n fɔxɔ ra, e xa n gere. Keli, i fa n mali! Yandi n ma fe mato.

⁶Isirayila Marigi Alatala, Mangɛ Ala, keli, i xa si danxaniyataree ratɔn. I naxa diɲɛ yi yanfante tinxintaree ma. Ɲɛngi rate.

⁷E fama kɔɛ ra alɔ bare xaaɲɛe e fa taa rabilin.

⁸E dɛ luma alɔ bare dɛ xunfɛ minima naxan kui. E xa wɔyɛnyi mixi tɔɔrɔma alɔ santidɛgɛma. E naxɛ, «Nde nɔma won ma wɔyɛnyi mɛde?»

⁹Kɔnɔ Alatala, i tan nan yelema e ma. I si danxaniyataree birin mayelema.

¹⁰N nan n yɛtɛ ratangama e sɛnbɛ ma i tan nan saabui ra. Ala nan na n ma kantama ra.

¹¹N Marigi Ala, naxan xa hinnɛ gbo, i xa ti n ya ra, i xa n yaxuie rabira.

¹²N Marigi, n ma kantama, i naxa e faxa keren na. I xa e rabira alako n ma ɲama naxa nɛɛmu i sɛnbɛ ma.

¹³E yunubi rabama e xa wɔyɛnyie ra. I xa e suxu e xa yɛtɛ igboɲa kui. E dankɛe nun wulee nan tun falama.

¹⁴I xa e raɲɔn i xa xɔnɛ ra, alako e naxa to sɔnɔn, alako e xa a kolon Ala nan Mangɛ ra Yaxuba bɔnsɔɛ nun duniɲa birin xun ma. Ɲɛngi rate.