SALMOS 18:2-48

²TOTECO, mopan ta nimotlatía pampa temachtli techmaquixtis. Techyahualohua para amo huelis nechajsise nocualancaitacahua. Taya tinotlamanahuijca. Ipan ta, noTeco Dios, nimotlatía, pampa na niitztoc momaco. Quena, san ipan ta nimotemachía. Ta techyahualohua para techmocuitlahuía. Taya tieli quen se huejcapantic tepancali catli cuali huan temachtli. Ica ta mochicahualis nitlatlanis.

³San monequi nijnotzas TOTECO catli quinamiqui para nijhueyichihuas, huan yaya nechmanahuis ininmaco nochi nocualancaitacahua.

⁴Eltoya quen nechpixtoya imaco miquilistli. Nochi catli fiero catli onca ipan ni tlaltipactli nechtlanisnequiyaya.

⁵Nopa mijca ostotl nechtlaquechilijtoya hasta ayacmo nijpixqui fuerza. San se quentzi más huan nimiquisquía.

⁶Pero quema más nimotequipachohuayaya, nijnotzqui TOTECO. Nijtlajtlani ma nechpalehui noTeco Dios. Huan yaya nechtlacaquili hasta nepa ipan ilhuicac. Quena, quichihuili cuenta catli niquilhui.

⁷Huajca chicahuac mojmolini tlali hasta momajmatijque nochi tepeme. Moojolinijque nopa tepeme hasta campa ontlatzquitoque, huan mohuihuixojque pampa Toteco Dios cualanqui.

⁸Elqui quen quisayaya poctli ipan iyacatzol, huan ipan icamac quisayaya se tlitl catli nochi quitlamitlatiyaya, huan nochi quisosolohuayaya. Quena, quimajcahuayaya tlicoli xaxahuacatoc pampa nelcualanqui.

⁹Pampa Toteco Dios quitlapo nopa cortina tlen ilhuicac, huan temoc para nechpalehuis. Nejnentihualayaya ipan miyac mixtli catli nelyayahuic.

¹⁰Toteco Dios tlejcoc ipan ieltlapal se querubín tequihua, huan patlantihualajqui ipan ajacatl.

¹¹Yaya motzajqui ica tzintlayohuilotl, huan atl quiyahualo para amo aqui quiitasquía.

¹²Tlapetlanilotl quiyacantihualajqui quema ajsiyaya yaya catli tlahuel cahuani. Huan nojquiya huetzqui tesihuitl huan tlicoli xaxahuacatoc.

¹³TOTECO quichijqui ma quicaquica itoscac quen se tlatomonilotl catli quisqui ilhuicac. Quena, Toteco Catli Más Hueyi tlahuejchijqui. ¡Tlahuel miyac tesihuitl huan tlicoli xaxahuacatoc huetzqui!

¹⁴Quimajcajqui cuatlamintli ma quinajsi nochi nocualancaitacahua, huan inijuanti cholojtejque. TOTECO quinhuitejqui ica hueyi tlapetlanilotl huan quintzontlamilti.

¹⁵Quema TOTECO tlailpitzqui, nochi nopa atl ipan hueyi atl san sejco momanqui hasta nesqui nochi nopa tlali catli mocahua atzintla campa más tlahuejcatla. Ica icamanal TOTECO mopannexti itzinpehualtil tlaltipactli, pampa yaya cualanqui.

¹⁶Huan TOTECO quimelajqui imax hasta campa más huejcatla, huan nechquixti tlen nopa hueyi atl.

¹⁷Nechmaquixti ininmaco nocualancaitacahua catli quipixque huejhueyi chicahualistli. Quena, nechmanahui tlen nocualancaitacahua catli más quipixque chicahualistli que na.

¹⁸Inijuanti motlalijque noca na quema amo nijpixqui fuerza, pero TOTECO nechtlananqui.

¹⁹Nechquixti huan nechsehui campa amo mahuilili. Nechmanahui pampa nechicnelía.

²⁰TOTECO nechmacatoc catli quinamiqui pampa nijchijtoc catli xitlahuac. Nechtlaxtlahuijtoc pampa cuali nonemilis.

²¹Nijtoquilijtoc iojhui TOTECO huan amo nimoiyocacajtoc tlen ya.

²²Niquelnamictoc nochi icamanal huan amo quema nijcajtejtoc itlanahuatil.

²³Xitlahuac niitztoc iixpa. Nimoiyocatlalijtoc tlen nochi catli fiero.

²⁴Huan TOTECO nechtlaxtlahuijtoc quen quinamiqui ica catli cuali nijchijtoc, pampa quinpantijtoc cuali nonemilis iixpa.

²⁵TOTECO, tiquinicnelía huan tiitztoc temachtli ica catli teicnelíaj huan catli temachme. Tiitztoc cuali ica catli quihuejcacahua tlajtlacoli.

²⁶Tiquintiochihua catli tetiochihuaj, pero tetic timotlalía ica inijuanti catli mosisiníaj.

²⁷Tiquinmaquixtía catli moicnonequij, pero tiquinpinahualtía catli mohueyimatij.

²⁸TOTECO, ta catli tinoDios, ta techmaca tlahuili. Ta tijcueptoc nopa tzintlayohuilotl campa niitztoc ica tlahuili.

²⁹Ica mochicahualis, noTeco Dios, niquinhuilanas nocualancaitacahua, huan niquixcopanos nopa tepamitl catli ica quitzactoque inialtepe.

³⁰Iojhui Toteco Dios nelía xitlahuac. Huan icamanal catli quitencahua, cuali para ipan timotemachise. TOTECO quinmanahuía nochi catli ipan ya motemachíaj.

³¹Amo cana aqui seyoc Dios quen TOTECO. Amo aqui seyoc catli huelis ipan timotemachise huan techmanahuis.

³²Toteco Dios nechmaca chicahualistli, huan nechchihualtía ma ninejnemi xitlahuac.

³³Yaya nechfuerzajmaca para amo ma nihuetzi. Noicxihua mochihuaj temachtli quen iicxihua se chivo quema moquetzaj campa tlahuejcapa huan tlaxixitlaca.

³⁴Toteco Dios nechmachtía tlaque ma nijchihuas quema onca tlahuilanalistli. Nechfuerzajmaca para cuali ma niquitzqui nopa tetic tepos huitoli catli quichijtoque ica bronce.

³⁵Toteco Dios, ta techmanahuía huan techmaquixtía. Techitzquía ica monejmac. Ica mohueyi teicnelijcayo techhueyichijtoc.

³⁶Tijchijtoc noojhui más patlahuac para amo ma nihuetzis.

³⁷Niquintepotztocac nocualancaitacahua huan niquinajsito. Huan amo nimocuepqui hasta quema niquintzontlamiltijtoya.

³⁸Niquinhuejhuelo huan ayacmo quema motlananase. Huetzque noicxitla.

³⁹Toteco Dios, ta techfuerzajmacac ipan nopa tlahuilanalistli huan tijchijqui para nocualancaitacahua ma motlancuaquetzaquij noixpa.

⁴⁰Miyaqui moicancuepque para cholojtehuase huan quej nopa huelqui niquintzontlamilti.

⁴¹Inijuanti tetzajtzilijque ma quinpalehuica, pero amo aqui huelqui quinpalehui. Quinotzque TOTECO, pero yaya amo quinnanquili.

⁴²Quen se quitisi tlalcuanextli huan quihuica ajacatl, na quej nopa niquinchijqui. Huan ininpan nimoquejquetzqui quen soquitl ipan ojtli.

⁴³TOTECO nechmanahuijtoc tlen nopa sequinoc altepetl ehuani catli mosisiníaj huan quinequiyayaj nechhuilanase. Yaya nechchijtoc ma nieli niinintlayacanca masehualme catli campa hueli ehuani. Masehualme catli amo niquiniximatiyaya hualahuij para nechtequipanose.

⁴⁴Quema quicaquij nocamanal, inijuanti nechneltoquilíaj. Sequinoc altepetl ehuani huihuipicaj noixtla.

⁴⁵Nochi motemacaj noixpa huan huihuipicatiyohuij quema quisaj campa motlatijtoque.

⁴⁶Itztoc TOTECO. Nijpaquilismacas yaya catli nechmocuitlahuía. Ma tijhueyitlalica Toteco Dios, notemaquixtijca.

⁴⁷Yaya nopa Dios catli quincuepilía ica catli fiero inijuanti catli nechcocojtoque. Quintlalijtoc masehualme ipan miyac tlali nomaco para ma niquinnahuati.

⁴⁸Yaya nechmanahuía tlen nocualancaitacahua huan nechhueyitlalía iniixpa catli nechcualancaitaj. TOTECO, ta techmaquixtijtoc ininmaco nopa tlahuilanca masehualme,