Pisalem 18:2-48

²Dimaadua la go dogu madaloohi, go Mee go dogu abaaba mau dangihi. Dogu God la go dogu hagaloohi, au e benebene hagahumalia i baahi o Mee. Mee e abaaba au gadoo be di mee abaaba. Mee e daa mai au gi daha, ge e benebene au.

³Au e gahigahi Dimaadua, gei Mee ga daa mai au gi daha mo ogu hagadaumee. Hagaamu ina Dimaadua!

⁴Di hagalliga o di made gu haganiga mai i dogu gili. Nia beau o di haga mooho gu haga holi au.

⁵Di hagalliga o di made gu i dogu baahi. Taalunga la guu lawa di haganoho e hele au.

⁶Dogu madagoaa ne haingadaa mai gi di au, gei au gu gahigahi Dimaadua. Au ne gahigahi dogu God belee hagamaamaa mai au, gei Mee gu longono Ia dogu lee mai i lodo dono hale daumaha. Mee gu longono Ia dagu dangi anga i di hagamaamaa.

⁷Henuailala gu ngalungalua gu lullulu. Nia hagamau o nia gonduu gu haga moomoo gu bolebole, idimaa God gu hagawelewele.

⁸Nia huiahi e buu mai i lodo nia mada uhi o Maa. Di ulaula mo nia malala gaa e ulu mai i lodo di ngudu o Maa.

⁹Mee gu haahi di langi gi mahuge, gu haneia gi lala madalia di gololangi luuli i lala ono babaawae.

¹⁰Mee gu maangi iha i hongo dono dangada di langi e hai ono bakau. Mee gu maangi iha i hongo nia bakau o di madangi.

¹¹Mee guu gahu Ia gi di bouli. Nia gololangi maadolu e honu wai gu haganiga i di gili o Maa.

¹²Di uwa hadu magalillili mo di ahi e monnono iha mai di ila dela e dabadaba i mua o Mee, ga haahi nia gololangi luuli aalaa.

¹³Dimaadua ga ngoloolo gadoo be di lee atili mai i di langi, gei di lee di God Koia e Aamua la gu longono.

¹⁴Mee guu puu ana amu maalei, guu hai ono hagadaumee gi lellele dagidahi, gaa hai nia ila gi dabadaba gii llele digaula.

¹⁵Meenei Dimaadua, tua di baba o di moana gu gila aga, di hagamau o henuailala gu gila aga labelaa, i do madagoaa ma gu hagawelewele iei Goe gi o hagadaumee, gu ngoloolo gi nua gi digaula gi do hagawelewele.

¹⁶Dimaadua gu daahi e Ia dono lima i di langi guu kumi au. Mee gu hudi aga au gi daha mo tua di moana.

¹⁷Mee gu haga dagaloaha au gi daha mo ogu hagadaumee maaloo dangihi, mo digau huogodoo ala e hudiou mai gi di au. Digaula koia e maaloo i di au.

¹⁸Digaula gu heebagi mai gi di au i dogu madagoaa ne tale gi di haingadaa, gei Dimaadua gu abaaba au.

¹⁹Mee gu hagamaamaa au gi daha mo ogu haingadaa, gu haga dagaloaha au i dono manawa tene mai gi di au.

²⁰Dimaadua e hui au idimaa au dela e hai nia mee ala e donu. Mee e haga maluagina au idimaa au dela ogu huaidu ai.

²¹Au gu daudali nia haganoho a Dimaadua, au hagalee huli gi daha mo dogu God.

²²Au gu haga gila aga nia haganoho a Maa huogodoo, au digi de hagalongo gi nia helekai a Maa.

²³Mee e iloo Ia bolo au e madammaa, mo dagu hai dela e haga mogowaa au gi daha mo nia haihai huaidu.

²⁴Deelaa di mee a Mee e hui au i di au dela e hai di mee dela e donu, idimaa, Mee e iloo Ia bolo au deai ogu huaidu ai.

²⁵Meenei Dimaadua, Goe e manawa dahi ang gi digau ala e manawa dahi adu gi di Goe. Goe e humalia ang gi digau ala e humalia.

²⁶Goe e madammaa ang gi digau ala e madammaa, gei Goe e hai baahi ang gi digau ala e hai nia mee huaidu.

²⁷Goe e haga dagaloaha digau ala e manawa hila gi lala, ge e haga hila gi lala digau ala e manawa hagamuamua.

²⁸Meenei Dimaadua, Goe gu haga maalama au. Goe guu hai di bouli gii maa gi daha.

²⁹Goe guu hai au gii mahi bolo gii mee au di heebagi gi ogu hagadaumee mo e gaamai nia mogobuna bolo gii mee au di haga magedaa nia abaaba dauwa digaula.

³⁰Di God deenei le e humalia huoloo go nia mee a Mee ala e hai! Nia helekai a Maa le e mee di hagadagadagagee ginai! Mee e hai gadoo be di mee abaaba ni digau huogodoo ala e halahala a Mee bolo e abaaba ginaadou.

³¹Dimaadua modogo Ia dela go di God! Ma go God modogo Ia dela go tadau Dangada Daa!

³²Mee go di God dela e hai au gi maaloo, ge e hagaloohi ogu ala i nia haingadaa.

³³Mee ne gaamai ogu wae bolo gii lele au giibeni gadoo be di ee, gei e madamada humalia i di au i hongo nia gonduu.

³⁴Mee e hagawouwou au gi di hai dauwa, bolo gii mee au di hai hegau gi di maalei dela koia e maaloo.

³⁵Meenei Dimaadua, Goe e abaaba au, gei e haga dagaloaha mai au. Au hagamaamaa la gu haga madamada au, gei o mogobuna la gu hagaloohi au hagahumalia.

³⁶Goe gu duuli au bolo gi dee kumi au, gei au digi hinga loo.

³⁷Au e waluwalu ogu hagadaumee gaa kumi digaula. Au digi noho loo gaa dae gi dogu daaligi digaula gii mmade.

³⁸Au guu kili digaula gi lala, gei digaula gu deemee di nadau tuu aga. Digaula guu kii magedaa i ogu mua.

³⁹Goe ne hai au gi maaloo bolo gii mee au di heebagi, gei ne hai au gi aali i ogu hagadaumee.

⁴⁰Goe ne hai ogu hagadaumee gii llele gi daha mo au. Au e daaligi gii odi digau ala nogo hudiou mai gi di au.

⁴¹Digaula e gahigahi nadau hagamaamaa, gei tangada e haga dagaloaha digaula ai. Digaula e gahigahi a Dimaadua, gei Mee digi helekai gi digaula.

⁴²Au e dagadagahi digaula bolo gii hai gadoo be nia gelegele gohu ma ga ili go di madangi gi daha. Au e dagadagahi digaula be nia gelegele waiwai ala i hongo nia ala.

⁴³Goe gu haga dagaloaha au gi daha mo nia daangada hai baahi, gaa hai au gii dagi nia henua. Nia daangada ala digi iloo eau guu hai agu hege dolomeenei.

⁴⁴Digau mai i daha e pala i ogu mua. Di madagoaa digaula ma ga longono ginaadou au, gei digaula ga daudali.

⁴⁵Digaula gu manawa paagege ga lloomoi gi daha mo nadau abaaba dauwa mo di polepole.

⁴⁶Dimaadua le e mouli! Hagaamu ina dogu Dangada Daa! Hagadele ina di aamua huoloo o di God dela gu haga dagaloaha au!

⁴⁷Mee go di God dela ne hai au gi aali i hongo ogu hagadaumee. Ma go Mee dela ne hai nia henua la gii noho i lala ogu mogobuna,

⁴⁸ga haga dagaloaha au gi daha mo ogu hagadaumee. Meenei Dimaadua, Goe e hai au gi aali i ogu hagadaumee, gei e abaaba au gi daha mo digau daaligi dangada.