Gesami Hea:su 18:2-48

²Hina Gode da na gaga:sudafa. E da na gasa bagade gagoi gala. E da na gaga:sa amola na da E guga esalea, enoga wadela:mu da hamedei. E da gaga:su liligi agoaiga na gaga:sa.

³Na da Hina Godema wele sia:sea, E da na ha lai ilima na gaga:sa. Hina Godema nodoma!

⁴Na bogomu gadenenewane ba:i. Wadela:su liligi hano fugala:i agoane da na dedebomu galu.

⁵Na bogomu da gadenenewane ba:i. Bogoi uli dogoi da sani agoane dili dialu.

⁶Na da se nababeba:le, Hina Godema wele sia:i dagoi. Na da E na fidima:ne wele sia:i. E da Ea Debolo diasu ganodini na fidima:ne wele sia:su nabi dagoi.

⁷Amalalu, osobo bagade da fofogoi. Goumi ilia bai amola da igugui. Bai Gode da ougi bagade ba:i.

⁸Ea mi gelabo amoga lalu mobi ahoanebe ba:i. Ea lafidili, lalu sawa: amo da liligi nenanebedawa:, amola nasubu su gilisili ahoanebe ba:i.

⁹E da mu alalo gadelai amola mu mobi gasimiginisi gala amo da:iya osoboga dalebe ba:i.

¹⁰E da liligi hedofo galebe amoga fila heda:le ahoanebe ba:i. E da fedege agoane fo da hedofo galebe amoga fila heda:le ahoanebe ba:i.

¹¹E da gasimigi amoga uligi ba:i. Mu mobi gadugagi amo da hanoga nabai amoga E sisiga:i dagoi.

¹²Mugene igi agoai amola lalu gona:su digagala:su da ha:ha:na bagade amoga misini mu mobi gasimigi amo dugagale dalebe ba:i.

¹³Amalalu, Hina Gode Ea sia: da muagado gugelebe agoane nabi. Dunu huluane da Gode Gadodafa Ea sia: nabi.

¹⁴E da Ea dadi dili fisiagagai. Ea ha lai dunu huluane da afafane hobea:i. E da ha:ha:na digagala:su amoga gala:beba:le, ilia da hobea:i dagoi.

¹⁵Hina Gode! Di da Dima ha lai ilima gagabole sia:noba amola ilima ougiba:le gasa bagade sia:noba, hano wayabo bagade da hale hafoga:i dagoi ba:i. Osobo bagade ea bai huluane ba:i dagoi.

¹⁶Hina Gode da ea lobo gududa:le guduli, na gagulaligi, amola hano lugudu bagade amoga na hiougili gadoi.

¹⁷Na ha lai dunu da gasa bagade. Ilia gasa da na gasa baligi dagoi. Ilia da na bagade higasa. Be ilia da nama doagala:lalu, Hina Gode da na gaga:i.

¹⁸Na da se nabaloba, ilia da na doagala:musa: misi, be amomane Hina Gode da na gaga:i.

¹⁹E da nama hahawaneba:le, na gaga:i.

²⁰Na da wadela:i hou hame amola moloidafa hou fawane hamobeba:le, Hina Gode da na hahawane dogolegele fidisa amola nama bidi ida:iwane iaha.

²¹Na da Gode Ea hamoma:ne sia:i dedei amoma fa:no bobogesu amola Godema fa:no bobogei na da hame buhagi.

²²Na da Ea sema huluane nabawane hamosu amola Ea sia: nababeba:le hame nabasu hou hame hamosu.

²³Na da afuda:le hame hamoi amola moloi hou fawane hamonanu. Hina Gode da na hou dawa:.

²⁴Amo na hou dawa:beba:le, E da nama bidi ida:iwane iaha.

²⁵Hina Gode! Nowa dunu da Dima mae fisili, Dia hou dafawaneyale dawa:iwane hamonanea, Di da amo dunu amola hamedafa yolesimu. Di da nowa dunu moloidafa ba:sea, amo dunu hahawane fidisa.

²⁶Di da ledo hamedei fofoloi dunu ilima fofoloi ba:sa. Be wadela:i hamosu dunu Di higasa.

²⁷Nowa dunu amo ea hou hi fonobosea, Di da amo dunu gaga:sa. Be nowa da ilila: hou gaguia gadobe, amo Di da banenesisa.

²⁸Hina Gode! Di da nama hadigi iaha. Amola gasimigi Dia fadegale fasisa.

²⁹Di da nama gasa amo nama ha lai dunuma doagala:musa: defele gala, amo iaha. Amola gasa amo ha lai dunu ilia gagoi amo mugulumusa: defele gala, Dia da nama iaha.

³⁰Gode Ea hou da noga:idafa amola moloidafa. Ea adi hamomusa: sia:sea, E da hamosa. Nowa dunu Ema masea, E da gaga:su liligi defele amo dunu ea ha lai dunuma gaga:sa.

³¹Hina Gode Hi fawane da Godedafa. Hi fawane da nini gaga:su dunu.

³²Gode Hi fawane da nama gasa iaha amola na da logoba:le ahoasea, E da na noga:le ouligisa.

³³E da na goumiba:le noga:le heda:ma:ne, na emo amo “dia” ohe ea emo defele hamosa. Amola na da goumiga ahoasea, E da na mae dafama:ne noga:le ouligisa.

³⁴E da gegesu hou nama olelesa. Na da gasa bagade oulali amoga gegemusa:, E da nama gasa iaha.

³⁵Hina Gode! Di da na gaga:lala. Dia ouligisu hou da na fidibiba:le, eno dunu da nama nodosa. Dia gasa fawane da na gaga:i dagoi.

³⁶Dia fidibiba:le, na da na ha lai amoga hame gagulaligi ba:i. Na da hamedafa dafai.

³⁷Na da na ha lai dunu sefasili, gagulaligisa. Amasea, gegesu mae fisili, ilia da wadela:lesi dagoi ba:sea fawane yolesisa.

³⁸Na da ili fane legesea, ilia da bu wa:legadomu gogolesa. Ilia da na emo gadenene dafasea, hasali dagoi ba:sa.

³⁹Di fawane da na gegema:ne nimi iaha amola na ha lai dunuma hasalasima:ne gasa iaha.

⁴⁰Dia hamobeba:le, na ha lai da naba:le hobeasa. Nowa da nama higasa, na da wadela:lesisa.

⁴¹Ilia da fidima:ne diginiwane wele sia:sa. Be gaga:su dunu hame ba:sa. Ilia da Hina Godema wele sia:sa, be E da hame alofesa.

⁴²Na da ili gagoudane amola ilia gulu dou agoane hamone da fo misini doga:le fasisa, amo defele ilia da fafu logoga dialebe agoane ba:sa amola na da ilima ososa:gisa.

⁴³Hame nabasu dunu da nama hasalasimusa: dawa:i. Be Di da na gaga:i. Di da na fifi asi gala ilima hina bagade hamoi. Amola dunu fi na da musa: hame dawa:i, amo da na ouligimusa:, nama misi dagoi.

⁴⁴Ga soge fi dunu da nama beguduli, na sia: nabawane fa:no bobogesa.

⁴⁵Ilia da beda:ga ilia gasa bagade gagoi amo fisili, yaguguiwane gadili maha.

⁴⁶Hina Gode da esala. Na Gaga:su dunuma nodoma! Na Gaga:su Gode amo Ea gasa bagade hou amo dunu huluanema olelema.

⁴⁷Ea da na ha lai ilima hasalasimusa: nama gasa iaha. Na da dunu fi ilima hasalasimusa:, E da amo dunu fi banenesisa.

⁴⁸E da na gaga:sa. Hina Gode! Na da nama ha lai ilima hasalasimusa: Dia hamosa. Amola nimi bagade dunu nama mae doagala:ma:ne, Dia da na gaga:sa.