SALMOS 132:8-18

⁸TOTECO, ximotlanana huan xicalaqui ipan nopa tiopamitl campa eltoc mocaxa, catli quiixnextía mochicahualis.

⁹Nopa totajtzitzi catli tiquintlapejpenijtoc ma moquentica ininyoyo chipahuac catli quinixnextía para tlatzejtzeloltique, huan nochi masehualme catli tiquiniyocatlalijtoc ma tzajtzica ica paquilistli.

¹⁰NoTeco, pampa tiquicnelía motequipanojca David, amo ximoicancuepa tlen nopa tlanahuatijquetl catli ta tijtlapejpeni, para quinnahuatis momasehualhua.

¹¹Pampa ta, TOTECO, tijtlajtolcahuili David, huan amo quema tiquelcahua tijchihua catli tijtlajtolcahua. Huan ta tiquilhui para teipa tiquintlalis iixhuihua ipan isiya para tlanahuatise.

¹²Huan sintla iixhuihua quichihuase catli quiijtohua nopa camanal sencahuali catli tijchijqui ica David huan sintla quitlepanitase motlajtol, huajca inijuanti nojquiya mosehuise ipan isiya para tlanahuatise para nochipa.

¹³Pampa ta TOTECO, tijtlapejpenijtoc altepetl Jerusalén para tiitztos nopona.

¹⁴Tiquijto: “Ya ni elis nochaj campa niitztos para nochipa. Nopona nimocahuas pampa ya nopa catli nijnequi.

¹⁵Nijtiochihuas ni altepetl miyac huan niquintlamacas imasehualhua catli teicneltzitzi.

¹⁶Niquinmaquixtis itotajtzitzi tlen nochi catli quinequij quincocose, huan itlatzejtzeloltijca masehualhua tzajtzise ica paquilistli.

¹⁷Nopa chicahualistli catli David quipixqui sempa nijchihuas para monextis ipan icone, huan yaya catli nicaltijtoc para nijtequimacas quen tlanahuatijquetl elis quen se tlahuili para imasehualhua.

¹⁸Icualancaitacahua niquintlahuisos ipan se hueyi pinahualistli, pero yaya catli tlanahuatijquetl tlanahuatis cuali huan monextis nochi ihueyitilis.”