Ose 7

1

2

3

4

5

6

7

8

9

10

11

12

13

14

¹«Bu may faj Israyil foofu ca Efrayim la seeni ñaawtéef di feeñ, ànd ak mbonu Samari seen péey. Dañuy njublaŋ, sàcc yiy bëtt ci biir kër yi, gàngoori saaysaay di songe ci biti.

²Taxul ñu jàpp ci seenum xel ne seen mboolem jëf ju bon laa bàyyi xel. Léegi seeni jëf a leen wër ndombo, ne màkk fi sama kanam.

³Seenug mbon lañuy bégale buur, seeni fen di bégal kàngam.

⁴Ñoom ñépp a diy jaalookat. Ñu mel ni taalu mburu bu yànj, taal bu lakk-kat ba soxlawula xamb, ca tooyal ba, ba kera xóoy bay funki.

⁵Bu sunu buur xewlee, kàngam yi naan ba wopp, buur tàllal loxo ay ñaawlekat.

⁶Seenub xol lañu waajal nib taal, di tëroo, Seen lakk-katu mburu fanaanee nelaw, bët set taal ba yànj, di fër-fëri.

⁷Ñoom ñépp a tàng jérr nib taal, te ñooy xoyom seeni njiit, seen buur yépp a daanu, te kenn ci ñoom woowu ma wall.

⁸Efrayim moo jaxasook askani jaambur, Efrayim moo di mburu mu ñu walbatiwul cib taal.

⁹Ay doxandéem a jeexal dooleem, te xamu ko, aw liir tege ci kawam weex tàll, te yégu ko.

¹⁰Israyil, ag reewandeem a ko tiiñal, te taxul ñu délsi ci seen Yàlla Aji Sax ji. Loolu yépp taxul ñu sàkku ko.

¹¹Efrayim daa mel ni pitax, dofe, ñàkk xel, di woo wall Misraak a dem Asiri.

¹²Bu ñuy dem, maa leen di laaw samab caax, niy njanaaw laa leen di woddale fi suuf, fa ma dégge seenum ndaje laa leen di mbugale.

¹³Ngalla ñoom, nde ñoo ma daw, yàqute ñeel na leen, nde ñoo ma gàntal. Doon naa leen jot waaye ñoo ma fenal.

¹⁴Du seen xol lañu ma wooye wall, xanaa di salliiru ci seen kaw lal, pepp ak biiñ tax ñuy dagg seen yaram, dëddu ma.

¹⁵Maa leen jàngal, dëgëral seeni përëg, te man lañuy fexeel lu bon.

¹⁶Bu ñu waññikoo it, du fi Aji Kawe ji. Ni xala gu yolom lañu mel, te seeni kàngam ay fàddoo saamar ndax seen sànjum làmmiñ, te loolu lees leen di reetaane ca réewum Misra.