Ose 9

1

2

3

4

5

6

7

8

9

10

11

12

13

14

¹Yeen waa Israyil, buleen béglu, buleen bànneexu ni yeneen xeet yi, nde yeena gànctu, dëddu seen Yàlla, yeena safoo peyu ngànctu ci mboolem dàgga ju ñuy bàcce pepp.

²Ndaxam dàgga ak nalukaayu reseñ du leen regg, te biiñ du leen doy.

³Dungeen des ci réewum Aji Sax ji. Efrayim, Misra lay dellu, te ca Asiri, lu daganul lañu fay lekkeji.

⁴Duñu tuural Aji Sax ji saraxu biiñ, te seeni sarax du ko neex. Seen ñamu sarax day mel ni ñam wu ku nekk fu nit deeye, sobeel, ba ku ca lekk sobewu. Seenu ñam, seenub koll lay ñeel, waaye du dugg ci kër Yàlla gi.

⁵Ana nu ngeen di def nag, ci bésu ndaje, bésub màggal bu Aji Sax ji?

⁶Ñu ngoogu dem ndax tasteg réew mi, Misraa leen di fat, Memfis suul leen, seen tànnéefu xaalis, mbooy mee koy nangu, te xaaxaam ay saxe seen biiri xayma ya woon.

⁷Bési mbugal dikk na, bési añale taxaw na, na ko Israyil xam. Yonent lañu jàppe ab dof, ku yor waxyu di ku wéradi, ndax seen ñaawtéef gu réy, ak seen mbañeel gu tar.

⁸Yonent bi mooy jongrukat biy wattul Yàlla, Efrayim, waaye ag fiir lees ko lalal ci mboolemi yoonam, te mbañeel a ngi ci biir kër Yàllaam.

⁹Ñoo sóobu ci xóotey yàqute, na woon ca janti Gibeya, te Yàlla mooy bàyyi xel seenug ñaawtéef, ba mbugale leen seeni moy.

¹⁰«Ni cabbu reseñu biir màndiŋ, ni laa fekke Israyil. Ni ndoortel doomi figg ju ndey ja taawloo, ni laa gise seeni maam. Waaye ñoom ñoo dem Baal Pewor, ñoo sédd seen bopp Baal, tuur mu ruslu mi, ba tax leena seexluwu ni kooku ñu sopp.

¹¹Efrayim, ab sagam ni picc lay naawe, du njurum doom, dub ëmb, du doom ju sosu sax.

¹²Bu ñu yaroon seeni doom it, maa leen leen di xañ, ba kenn du des. Te it ngalla ñoom, bu ma leen dëddoo.

¹³Ni ma dogule Tir dëkk ba, bi jëmbate ci parlu mu naat, ni laay dogule Efrayim, ba yóbbul ay doomam ab bóomkat.

¹⁴Aji Sax ji, yool leen! Ana loo leen di yool? Yool leen biir yu yàqu, ak ween yu ne sereŋ.

¹⁵«Seen gépp mbon moo feeñ ca Gilgal, te fa laa leen jéppee ndax mbonug seeni jëf. Sama kër laa leen di dàqe, te dootuma leen bëgg, seeni njiit yépp a diy fippukat.

¹⁶Fàddees na Efrayim, ay reenam wow, du meññ benn doom. Bu juroon itam, maay rey ngëneelu biiram.»

¹⁷Sama Yàlla moo leen di xalab, nde ñoo ko déggalul, te ñooy taxawaaluji ci biir xeeti jaambur yi.