NUMERA 20:14-24

¹⁴Mose ese Kadesi dekena amo iena hesiai taudia be Edoma ena king dekenai ia siaia. Idia gwau, “Inai hereva be oiemu tadina Israela dekena amo. Oi diba vadaeni ai dekenai idia vara hisihisi gaudia ibounai.

¹⁵Aiemai sene taudia Aigupito dekenai idia lao, unuseni nega daudau ai noho. Aigupito taudia ese ai dekenai bona aiemai sene taudia dekenai idia dagedage.

¹⁶Lohiabada dekenai ai taitai, vadaeni ia ese aiemai taitai ia kamonai, aneru ta ia siaia, bona Aigupito dekena amo ai ia hakaua mai. “Hari ai be Kadesi hanua, oiemu tano ena hetoa gabuna dekenai ai noho.

¹⁷Mani emu kara, oi dekenai ai noinoi, aiemai dala do oi kehoa, oiemu tano do ai raka hanaia. Uma ta dekenai do ai raka lasi, vain idia vara gabuna dekenai do ai raka lasi, bona umui emui ranu guri ta dekena amo do ai inua lasi. To king ena dala sibona dekenai do ai raka, unai dala do ai rakatania lasi, lauri kahana o idiba kahana dekenai do ai lao lasi.”

¹⁸To Edoma ena king ia haere, ia gwau, “Aiemai tano do umui raka hanaia lasi! Bema umui karaia toho, ai ese umui do ai tuari henia.”

¹⁹Israela taudia ese ma idia noinoi, idia gwau, “Laolao dala badana sibona dekenai do ai raka. Bona bema ai o aiemai ubua gaudia ese emui ranu ai inua neganai, ai be davana do ai henia. Ai ura aena dekenai do ai raka hanaia sibona.”

²⁰To Edoma taudia ma idia haere henia, idia gwau, “Umui raka hanaia lasi.” Vadaeni Edoma tuari taudia momo mai goadadia ese Israela taudia edia vairana dekenai idia mai, tuari henia totona.

²¹Vadaeni Edoma taudia ese edia tano dekenai Israela taudia edia hanaia dala idia koua dainai, Israela taudia idia giroa, bona dala idauna ta dekenai idia lao.

²²Israela taudia ibounai ese Kadesi idia rakatania, bona Horo Ororo dekenai idia ginidae.

²³Inai Horo Ororo be Edoma ena tano hetoa gabuna kahirakahira. Unuseni Lohiabada ese Mose bona Arona ia hamaoroa, ia gwau,

²⁴“Arona be Israela taudia dekenai lau henidia vadaeni tanona do ia raka vareai lasi. Ia be kahirakahira do ia mase, badina be umui ese Meriba ranu gabuna dekenai lauegu hereva umui utua.