Numero 20:14-24

¹⁴Hein diyè pa te Kadesh is menge Israilihanen, impehendiyà ni Moises is menge menunudtulè din te hadì diyà te Edom. Iyan heini impetudtul ni Moises kandan, “Heini he lalag ebpuun diyà te menge kezuzumahi nu he menge etew te Israel: Netuenan nu is langun he kemeresayan he neeǥiyan dey.

¹⁵Is menge kepuun dey midhendiyà te Ehipto, ne neuǥet is ked-ubpè dey ziyà. Impaantus key wey is menge kepuun dey te menge Ehiptohanen,

¹⁶piru mibuyù key te tavang diyà te Nengazen ne mibpemineg key zin, ne midsuǥù sikandin te velinsuǥuen he mibpeǥawas kenami ziyà te Ehipto. “Guntaan kayi key te Kadesh he inged he uvey te tanè nu.

¹⁷Emun egkehimu ne ituǥut nu kenami is kebayà diyà te tanè nu. Kenè key ebayà diyà te menge bevesukè nu etawa pemuleey nu te paras wey kenè key ed-inum diyà te teheb. Diyè key zà ed-ikul te zekelà he beyeey ne kenè key en ebpenuweysuwey taman te ebpekeǥawas key puun te tanè nu.”

¹⁸Piru iyan heini tavak te hadì te Edom: “Kenà egkehimu ke ebayè kew kayi te kenami. Emun ebayè kew, edsurungen dey sikiyu ne ebpenhimetayan.”

¹⁹Midtavak is menge Israilihanen te, “Diyè key zà ed-ikul te dekelà he zalan; ne emun ebpekeinum key wey is menge uyaǥen dey te wahig niw, ne ebeyazan dey heini. Iyan dà tuyù dey is kebayà diyà te tanè niw, ne wazè en duma.”

²⁰Mid-uman medtavak is hadì te Edom: “Kenè kew iyan bayà kayi.” Ne midtiǥum duen te hadì te Edom is gemhanan wey melig-en he menge sundaru su ebpekidtebek dan te menge Israilihanen.

²¹Ne geina te kenà ebpeveyaan te menge tig-Edom is tanè dan, ne midsuwey en nasì is menge Israilihanen.

²²Mid-awà is tivuuk he keet-etawan te Israel diyà te Kadesh ne midhendiyè dan te Buntud he Hor.

²³Diyà te Buntud he Hor, he uvey te netemanan te Edom, migkeǥiyan te Nengazen si Moises wey si Aaron,

²⁴“He Aaron, neume en is timpu he idtampu ke en diyà te menge kezuzumahi nu he nemematey en. Kenè ka ebpekeseled diyà te tanà he ibeǥey ku te menge Israilihanen su midsupak kew ki Moises te suǥù ku hein diyè kew te serebseb te Meriba.