Nawum 1

1

2

3

¹Yéeneb waxyu bu dal dëkk bi ñuy wax Niniw a ngi, di téereb peeñum Nawum ma dëkk Elkos.

²Aji Sax ji mooy Yàlla ju fiir, te mooy mbugale, Aji Sax ji mooy mbugale, te di boroom sànj. Aji Sax ji mooy mbugal ay bañam, mooy sànju ci kawi noonam.

³Aji Sax ji la mer ma diib, doole ja bare; te du ñàkka topp ku tooñ, ag tooñaangeem. Aji Sax jeey daagoo biir callweer ak ngëlén, niir yi di pëndub tànkam.

⁴Mooy gëdd géej, wowal; mboolem dex, mu ŋiisal; parluy Basan ak Karmel, mu laxal; tóor-tóori àllub Libaŋ, mu laxal.

⁵Tund yu mag yi di ko loxal, tund yu ndaw yi seey, suuf fuddu fi kanamam, mook àddina ak mboolem li ci biiram.

⁶Bu sànjoo, ana kuy taxaw? Ana kuy dékku tàngooru meram? Am sànjam a naan soteet ni sawara, doj yi rajaxoo fi kanamam.

⁷Aji Sax jee baax, moo dib rawtu, bésub njàqare, te moo ràññee ñi ko làqoo.

⁸Mbàmbulaan lay walal ba faagaagal dëkk bii, te mooy toppi noonam ba ca biir lëndëm ga.

⁹Ana lu ngeen di fexeel Aji Sax ji? Mooy neenal, lépp neen; njàqare ja du ñaar.

¹⁰Niy taxas la ay noonam di laxasoo, mel ni ñu naan ba màndi, te ni boob mu wow lañuy lakke ba xoyomu.

¹¹Ci yaw dëkk bii la nit génne, di fexeel Aji Sax ji lu bon, di mébét pexey ndëngte.

¹²Aji Sax ji moo ne: «Bu ñu matoon, ne gàññ it ni lees leen di dagge, ñu ne mes. Maa la mitital, dootuma la mitital.

¹³Léegi buum gi ñu la yeewe laay dog, say jéng laay dagg.»

¹⁴Aji Sax ji moo santaane lii ci yaw. Mu ne: «Lu bokk ci saw tur du lawati, kërug say yàlla laay dagge xërëm ak jëmmi weñ gu ñu xelli, te maay waajal sa bàmmeel, nde tekkiwuloo tus.»