Nɑhumu 1

1

2

3

¹Gɑri wee yi Yinni Gusunɔ u geruɑ wuu ge bɑ mɔ̀ Ninifun sɔ̃. Nɑhumu Ɛlikosigiiwɑ Gusunɔ u derɑ u yi wɑ kɑ̃siru sɔɔ mɑ u yoruɑ.

²Yinni Gusunɔ u sɑ̃ɑwɑ nisinugii. U rɑ mɔru kɔsie. Win mɔru yɑ kpɑ̃. U rɑ win yibɛrɛbɑ mɔru kɔsie. U ku rɑ bu suuru kue.

³U ku rɑ toro deri u kun nùn sɛɛyɑsie. Adɑmɑ u ku rɑ mɔru se fuuku. Win dɑm mu kpɑ̃. Ù n sĩimɔ, woo gunɑ yɑ rɑ n seewɑwɑ, kpɑ guru winu nu n sɑ̃ɑ nge win nɑɑsun tuɑ.

⁴Ù n nim wɔ̃ku gbɑ̃re, gɑ rɑ gberewɑ. U rɑ dɑɑnu kpuron nim gberɑsiewɑ, kpɑ yɑkɑ si su wɑ̃ɑ Bɑsɑniɔ kɑ Kɑɑmɛlin gɑ̃ɑnɔ su gberɑ, kpɑ dɑ̃ɑ wɛ̃ɛ si su wɑ̃ɑ Libɑniɔ su dɛllɑ.

⁵U derɑ guunu bɑ̃ɑrimɔ. Mɑ gungunu diirimɔ. Mɑ tem kɑ mɛn tɔmbu bɑ yiiyɑrɑmɔ win wuswɑɑɔ.

⁶Wɑrɑ u koo kpĩ u yɔ̃rɑ u win mɔru mɑ. Wɑrɑ u koo kɑ win mɔru gɑbirinɑ. Win mɔru yɑ rɑ pusiwɑ nge dɔ̃ɔ. Wee yɑ kpenu bɛsukumɔ.

⁷Yinni Gusunɔ u sɑ̃ɑwɑ tɔn geo. U sɑ̃ɑwɑ be bɑ wɑ̃ɑ wɑhɑlɑ sɔɔn kuku yeru. Be bɑ nùn nɑɑnɛ sɑ̃ɑ, berɑ u rɑ nɔɔri.

⁸U koo Ninifu kpeerɑsiɑ mɑm mɑm kɑ nim bɑkɑm, kpɑ u win yibɛrɛbɑ nɑɑ girɑ sere gɔribun wɑ̃ɑ yerɔ yɑm wɔ̃kuru sɔɔ.

⁹Mbɑ i Yinni Gusunɔ bwisikusimɔ. Wiyɑ u rɑ kɑm koosie mɑm mɑm. Bɑ ku rɑ nɔni swɑ̃ɑru wɑ nɔn yiruse.

¹⁰Yibɛrɛ be, bɑ sɑ̃ɑ nge sɑ̃ki kɔkɔnu, bɑ rɑ tɑm nɔ sere mu bu go. Kɑ mɛ, bɑ koo dɔ̃ɔ mwɑɑrɑwɑ mɑm mɑm nge yɑkɑ gbebusu.

¹¹Ninifu, wunɛn min diyɑ goo u yɑrɑ wi u Gusunɔ kɔ̃sɑ bwisikusimɔ, mɑ u kĩ u nùn seesi.

¹²Yinni Gusunɔ u Yudɑbɑ sɔ̃ɔwɑ u nɛɛ, bɑɑ bɛɛn yibɛrɛbɑ bɑ̀ n dɑbi ɑmɔ, mɑ bɑ dɑm mɔ ɑmɔ, kɑ mɛ, kon bu gowɑ mɑm mɑm. Nɑ bɛɛ sekuru doke. Nɑ ǹ mɑɑ wuremɔ n bɛɛ kuɑ nge mɛ.

¹³Kon ben yoo te bɑ bɛɛ diisiɑmɔ kpeerɑsiɑ. Kon ten yɔni kɑsuku.

¹⁴Bɛɛ Ninifugibu, wee ye nɛ, Yinni Gusunɔ nɑ geruɑ bɛɛn sɔ̃. Nɑ nɛɛ, i ǹ bweseru wɑsi te tɑ koo bɛɛn yĩsiru sɔbe. Kon bɛɛn bwɑ̃ɑroku dɑ̃ɑginu kɑ sisuginu kpuro wunɑ bɛɛn bũu dirun di, kpɑ n bɛɛn sikɑ sɔɔru ko. Domi i ǹ sɑ̃ɑ gɑ̃ɑnu.