1Nahúm-negburgan-daksad-e-garda. Nahúmʼde Elcos-neggweburgined. We-gardagi Bab-Jehová Nínive-neggweburgi neg-guoed sogsad.
2Bab-Jehová, unnila dule-ebarbi-nanabi abeged, buged-mai dule-imakedbalid. Bab-Jehová dule-buged-mai-imakedid, e-isdarmaladse urwedid. Bab-Jehová, dule-egi-yoledimalad buged-mai imaked, e-isdarmalad ese sabsur-odurdakleged.
3Bab-Jehová wissur gwae-gwae urwed. Bab-Jehová bela-bela gangued nikad. Bab-Jehová dule-ibmar-oakalosad sabsur-odurdakedsegad. Bab-Jehová burwa-oored-abargi, burwa-dummad-abargi gudidaed, mogir Bab-Jehová-e-nanaedba ukub-ainakweyobi gued.
4Bab-Jehová demarga ibmar binnasur sogdele, demar dinnaa naddaed. Bela diwarmar dinnaa guega imakbalid. Basán-yar, degi, Carmelo-yar bela dinguded, Líbano-yar-dutumar bela dingudbalid.
5Bab-Jehová-asabin yarmar giglimakdedaed, yar-mullugan babatiddaed. Bab-Jehová-asabin napneg giglimakdedaed, Bab-Jehová-asabin napneg-dirbir-naid, degi, bela egi bukmalad wawanmakdedaed.
6Bab-Jehová-e-urwed-abin, ¿doa gwisguoe? Bab-Jehová-e-sae-itoged-abin, ¿doa gannarbaa gwisguoe? Bab-Jehová-e-urwedi, soo-gwabunye-gwichidyobi gued, e-asabin akwasailagan bela ese ubigwar gued.
7Bab-Jehová, duledar-nuedid, suli-suli-itogedgine, anmar-odukuedid. Dule-egi-bensurmalad-bendakedid.
8Bab-Jehová Nínive-neggwebur diwar-dummad-noedbali obelogoed. Bab-Jehová amba negsichidgine e-isdarmalad-baleginnoed.
9Bab-Jehováʼgi-gwisguega, ¿ibiga bemar igar-isgana aminanai? Bab-Jehová bela bemar-giir imakoed, bemar-wiledakega bar iba-baid nasikosulid.
10Bemar gagan-dinnagwadyobi bergumaloed, ikomar-dinnagwadyobi bergumaloed, Dule vino-doggus-gobsadba bar-itodisurdaedyobi bemar guoed.
11Be, Nínive-neggwebur, begi dule-binsaed-uked-isgana gwalulesad. A-dule, Bab-Jehováʼgi igar-isgana amied.
12Bab-Jehová weyob soged: “Asiria-dulemar nollosurgumala-inigwele, bergumaloed. Asiria-dulemar dula-bukidar-inigwele, burgwemaloed. Bedi, Judá-dulemar, an sabsuli-be-wiosmala-inigwele, bar deyobi, an be-wiogosurmalad.
13Dulemar-sabsur-be-imakdimaladgi an be-ollor-imakoed, bar be maiga-gudii guosurmalad.”
14Bemardi, Nínive-dorgan, Bab-Jehová bemarga igar-mesisad: “Mimmigan bar be nikuosurmarye, adi, be-nug mer bar degisadegu obarledii guegarye. Be-bab-dummadse-goled-neggi ibmar-wagar-sobarmar-bukwad, esgoro-gordikidgi ibmar-bab-dummadyob-sobar-bukwad, an obelogoed. Ar be dule-isganasoggu, an bega neg-uan guagwar sioed.”
15¡Be dakmala! Dule-gayaburba-nuegan-berbegedi, dule neg-bogidik-naguoedgi-sunmakedi, bato yalaganba danikid. Judá-dulemar, be-iba-onomaladgi, be wergumala, Bab-Jehováʼga be ibmar-ukoye-sogsad be uke. Ar dule-isganamar bar be-yarse ubogosurmalad, ar bela Bab-Jehováʼse giir gusmalad.
