Nawum 3

1

2

3

¹Wóoy, ngalla dëkkub tuurkatu deret bi, ñépp di fen, fees aku ay, te foqati alalu jaambur du dakk!

²Kàccri dal, ay mbege riir, fas rëpptal, watiir kar-kari.

³Gawar buur, saamar melax, xeej lerxat, ñu bare ne lasiim, ñi dee jale, néew ya tëë jeex, ñuy fakkastaloo néew ya.

⁴Lépp ndax ngànctu gu bare, gi gànc bi nekke! Jekk tànkee, boroom xërëm yi, ci ngànctu nga jaaye ay xeet, te xërëmtu nga naxe ay giir.

⁵«Maa ngii fi sa kaw,» kàddug Aji Sax jee, Boroom gàngoor yi. «Sa pendal laay ñori, ba muur sa xar-kanam, won xeeti jaambur yi sa yaramu neen, gisloo waa réew yi sa gàcce.

⁶Maa lay xëpp mbalit, sewal la, def lam ceetaan,

⁷ku la gis, daw la te naan: “Niniw tas na! Moo ku koy jooy?” Ana fu ma koy wutale ñu ko dëfal?»

⁸Moo Niniw, dangaa gën Teeb, péeyub Misraa? Dëkk ba dëju fa digg wali Niil ya, am ndox wër ko, am tataam di géej, miiram di ndox mu wale géej,

⁹réewum Kuus di ndëgërlaayam, Misra di ko dooleele doole ju dul jeex, réewum Puut ak Libi di ko jàpple.

¹⁰Teewul ngàllo la dem, cig njaam; ay goneem, ñu falaxe leen ci mboolem selebe yoon; ay kàngamam, ñu tegoo bant; kilifaam yépp, ñu jéng leen.

¹¹Niniw yaw it dinga bilimbaane, jànnaxe, di wuta raw ab noon.

¹²Sa tata yépp ni garabi figg yu ñoral ndoortel meññeef lay mel, soo yëlbee, doom ya rot, gémmiñu lekk-kat aw.

¹³Say gàngoor a ngii diy jigéen fi sa biir, sa bunti réew lafal say noon, ne ŋàpp-ŋàppaaral, sawara xoyom tëjukaay ya!

¹⁴Niniwee, ndox moo fàggoo ab gaw, ngay rooti te dàbbli say tata. Duggal ci bàq bi, note ban bi, te ne cas móolukaay bi!

¹⁵Fa la la sawara di xoyome, saamar xottee la fa, raafal la ni soccet di def. Fulal saw nit niy soccet, ñu tollu niy njéeréer.

¹⁶Ay jula nga barele, ba ñu ëpp biddiiwi asamaan, te ñoo mel niy soccet, tojtal, naaw.

¹⁷Say kàngam it niy soccet, say jawriñ ni naaxu gunóor yu dale kaw tata, bésub sedd, jant bi jóg, ñu daw, te deesul xam fu ñu nekk.

¹⁸Buurub Asiree, say sàmm a saay, say garmi nelaw, sa gàngoor tasaaroo kaw tund wa, te ku leen dajale wuute.

¹⁹Sa damm-damm amul paj, sab góom metti, ba mboolem ñi dégg li la dal di tàccu ci sa kaw, nde ana ku sa mbon gi dul jeex lorul?