Nehumu 1

1

2

3

¹Na kinorokorotae pa guguana Ninive. Sa bukana sa dinogodogorae te Nehumu, sa tie pa Elikosi.

²E Zihova si na Tamasa konokono meke Tamasa tubehe si Asa; se Zihova si hoke tubehe meke siṉi ia na tinaṉaziri. Se Zihova tubehi sarini pu va karikari la koa Sa meke kopu nia Sa sa Nana tinaṉaziri koari nana kana.

³Se Zihova si lopu tuturei bugoro meke noma hola sa Nana ṉiniraṉira; se Zihova si kaqu va lipulipu i Sa sarini pu tavete va sea, lopu kaqu doṉo pani Sa. Sa Nana hahanana si pa korapa vivirua meke raneboṉi, meke sari na lei si na kavuru pa nenena Sa.

⁴Sa kolo lamana si gegese ia Sa meke va popa ia; doduru ovuku si va popa i Sa. Sa popoa Basani meke sa toqere Kameli si harahara meke sari havoro pelaradi pa Lebanoni si rida.

⁵Niu sari toqere pa kenuna Sa meke sari toa si kolo palae. Neneqara sa popoa pepeso totoso vura la Sa, gua tugo sa kasia popoa meke doduru pa korapana.

⁶Esei boka turu va tia ia sa Nana tinaṉaziri? Esei si boka koa totoso bugoro si Asa? Sa tinaṉaziri Tanisa si titisae guana nika; sari patu si ta piara pa kenuna Sa.

⁷Se Zihova si leanana, na tometomeana pa totoso tinasuna. Kopuni Sa sarini pu raṉe ia si Asa,

⁸ba pa keke naqe nomana si kote huara pania Sa si pa Ninive; kote hadu lani Sa pa hupohuporoana sari Nana kana.

⁹Be nasa si kuhana nia rini koe Zihova ba kote huara pania Sa; na tinasuna si lopu kote kamo mae vina rua totoso.

¹⁰Kote soqoni koari na hilibubuku meke viviri koari dia napo vaeni; kote gani na nika si arini guari na duduli popadi.

¹¹Koa goi Ninive si vura mae si keke tie sapu kuhana nia se Zihova meke tozi sari binalabala kaleanadi.

¹²Hiera gua si zama nia e Zihova: “Hinokara ari dia baere tugo si arini meke soku hola, ba kote mate palae si arini meke murimuri taloa dia. Hinokara ele va lipulipu igo tugo Arau si agoi Ziuda, ba lopu kote va lipulipu pule igo Arau.

¹³Kamahire kote moku pania Rau sa dia ioki d pa ruamu meke kumati koa goi sari seni.”

¹⁴Hiera gua si zama nia e Zihova pa guguamu agoi Ninive: “Kote loketoṉa tutimu si agoi pude kopu nia sa pozamu. Kote huari Arau sari kineha ta peqodi meke beku qolo sapu koa pa korapa zelepade tadi mua tamasa. Na mua lovu si kote va nama ia Rau, ura na kaleamu hola si agoi.”

¹⁵Dotu, koari na toqere panahoi, sari nenena sa tie sapu paleke mae inavoso leana, pu tozi vura nia sa binule! Qetuqetu ni sari mua rane inevaṉa, agoi Ziuda, mamu va gorevura i sari mua vina tatara koe Zihova. Lopu kote mae rapata pule igo ri na kana kaleanadi; na kote ta huara palae si arini.