Naokɛa 18:12-32

Click on verse(s) to share them!

¹²Nísi maa píi ń vɛ̃ɛ maa píio ń pↄ́wɛna káau pↄ́ aaì kpaao, máli n gbaɛ.

¹³An buapↄ́ káau pↄ́ aaì mↄomɛɛ á n pↄ́ɛ píi. N bɛ gbɛ̃́ pↄ́ i gbãlɛo píi a ble.

¹⁴Pↄ́ pↄ́ Isailiↄ dìlɛ ma pↄ́ ũ ń a mìbao á n pↄ́ɛ píi.

¹⁵Gbɛ̃nazĩn nɛgↄ̃ɛ sɛ̃́iaↄ ń pↄtuo nɛsana sɛ̃́ia pↄ́ wà mↄ̀omɛɛↄá n pↄ́ɛ. To aali nɛgↄ̃ɛ sɛ̃́iaↄ ń pↄtuo pↄ́ dɛ tɛ̃ ũ nɛsana sɛ̃́iaↄ bo.

¹⁶Tó nɛ́ kà mↄ do, wàli bo ã́nusu ↄwatɛ̃ sↄo, lá wà a gbia lɛ́ dìlɛ ma kúkĩiwa.

¹⁷Ńsu to wà zu ge sã ge blè nɛsana sɛ̃́ia boo, asa beeá ma pↄ́ɛ. Ǹ a au ká gbagbakĩiwa, ní a nísi kpasa pↄ́ pↄ́ wì kátɛu à tɛ́kũ a gĩ ì kɛmɛɛ na ũ.

¹⁸A nↄ̀ↄ iↄ dɛ n pↄ́ ũ, lá sáaukpa sa'obↄ kùla ń a ↄplaa gbáo dɛ n pↄ́ ũwa.

¹⁹Pↄ́ pↄ́ Isailiↄ ì ma gba píi, máli kpamaɛ ń n gbɛ̃́ↄ, gↄ̃ɛↄ ń nↄɛↄ e gↄↄpii. Ma bàa aↄ kunnↄ ń n buiↄ e gↄↄpiiɛ, aↄ lɛ́ vĩo.

²⁰Dii ɛ̀a ò Aalonaɛ: Ńyↄ̃ↄ tↄↄlɛ vĩ Isaili bùsuuo, ńyↄ̃ baa e a guuo. Mámɛ má n baa ũ, n asea ũ.

²¹Pↄ́ kwide pↄ́ Isailiↄ ì bↄ, má dìlɛ Levii buiↄ pↄ́ ũ píiɛ. Kpaaũkpɛ zĩ pↄ́ aaì kɛ asean we.

²²Isailiↄ su sↄ̃ kpaaũkpɛi lↄo. Tó aa sↄ̃̀i, aa ń duuna gbɛ'eɛ, aai ga.

²³Levii buiↄ lí kpaaũkpɛ zĩ kɛ, kpɛ́pi kua gbãlɛsai gↄ̃̀ ń yã́ ũɛ e an buiwa. Aa e kpaalɛsɛ ń Isaili bui kĩniↄo,

²⁴asa pↄ́ kwide pↄ́ Isailiↄ ì bↄmɛɛ, máli kpá Levii buiↄwa píiɛ. Bee yã́i ma mɛ̀ aa e kpaalɛsɛ ń Isaili bui kĩniↄo.

²⁵Yã́ pↄ́ Dii ò Mↄiziɛ,

²⁶a ò Levii buiↄnɛn kɛ lↄ: Tó a Isailiↄ pↄ́ kwide pↄ́ máli kpáwá á pↄ́ ũpi è, àli a kwide bↄmɛɛ sↄ̃.

²⁷Bee aↄ dɛɛ́ lán pↄgbɛ̃zɛ ń vɛ̃ɛfɛ̃kĩio gbawaɛ.

²⁸Màa ápiↄ sↄ̃ áli ma gba pↄ́ kwide pↄ́ Isailiↄ ì bↄɛ́. Àli sa'ona Aalona gba ma pↄ́ ũ.

²⁹Pↄ́ pↄ́ wà á gbáↄ píi, àli ma gba a maa.

³⁰O Levii buiↄnɛ: Tó a ma gba a maa, a kĩni iↄ dɛɛ́ lán pↄgbɛ̃zɛ ń vɛ̃ɛfɛ̃kĩio pↄ́wa.

³¹À a kĩnipi ble gu pↄ́ á yeiu, ápiↄ ń á bɛdeↄ, asa bee mɛ́ kpaaũkpɛ zĩ pↄ́ i kɛ asea ũ.

³²Tó a ma gba a maa, áↄ tàae vĩ a yã́ musuo, á pↄ́ pↄ́ Isailiↄ kpàa gbãlɛ à gao.