12मिनु मेकोपुकीमी परमप्रभु यावे कली गेशो नेल्ल क्येङा रिम्शो तेल, नेल्ल क्येङा रिम्शो अङगुर शांबु, अन्न नु रिम्शो मारेइ मारेइ गो इ कली गेतन।
13मेकोपुकीमी परमप्रभु यावे कली चढ़ेथ चाक्शो आन ङोंइती मीशो फल फुल नेल्ल इं केन दुम्ब। इ खिंमी ग्रांग्रा मदिशो बाक्शो मुर नेल्लेमी मेको जने चाप्नीम। प्रस्थान २३:१९; ब्यवस्था १८:३-४
14इस्राएलम आं कली चढ़ेशो मारेइ मारेइ इ केन बाक्ब। लेवी २७:२८
15मिनु परमप्रभु यावे कली चढ़ेशो, मुर आन ङोंइती जरमेशो, बी ब्यफ क्यारश भेडा आन ङोंइती जरमेशो नेल्ल इ केन बाक्नीम। मो दुम्त हना यो, गे मुर आ ङोंइती जरमेशो कली प्रोंइचा माल्नेवे। ग्रांग्रा दिशो बस्तु भाव आन ङोंइती जरमेशो यो प्रोंइचा माल्नेवे। प्रस्थान १३:२; प्रस्थान ३४:१९-२०
16मेको आन कली प्रोंइतीक क्येट महिना का गाप्शो कली चांदी के ५ शेकेल ताक्चा माल्नेवे। मेको ताम्बु ङा शेकेल बाक्चा माल्नीम। मेको ताम्बु ङा शेकेल का २० गेराह ङा बाक्ब। गेराह का ०.६ ग्राम बाक्ब। ताम्बु ङा शेकेल का १२ ग्राम ङा क्येट बाक्ब।लेवी २७:६,२७
17मिनु बी, भेडा क्यारश आन ङोंइती जरमेशो आन कली प्रोंइने मचाप्नीम। मेको आं केन बाक्नीम। गे मेको आन हुश चढ़ेतीकेमी ब्रुइक्चा माल्नेवे। मिनु मेको आन बोंसो चोचा माल्नेवे। मेको परमप्रभु यावे कली आ दाक्चा ब्रोव़शो रिना पाइश्शो मीम चोशा चढ़ेतीक बाक्ब।
18तन्न आन श्ये इ केन बाक्ब। मेको क्युक्शा चढ़ेशो कुथ्रु नु ग्युरा फिला खोदेंशो पा इ केन बाक्ब।
19मिनु इस्राएलीपुकीमी आं कली चढ़ेशो नेल्ल इ कली नु इ तमी तौ आन कली गेना हना यो कली गेतन्नी। मेको इ कली नु इ चच युइ आन कली परमप्रभु यावे आ ङोंइती गेना हना यो लीशो हिक्सी आ कबल पशो बाक्ब” देंत। लेवी २:१३; २इतिहास १३:५
20मिनु नोले परमप्रभु यावेमी हारून कली “गे मेको रागीम मुर आन दातेमी रू मताइनीनी। गो इस्राएली आन दातेमी इन भाग नु इन शोंप नङ। गन्ती ३५:-; ब्यवस्था १०:९; ब्यवस्था १२:१२; यहोसु १३:१४,३३; भजन संग्रह १६:५; भजन संग्रह ७३:२६; इजीकीएल ४४:२८
21गो लेवी आ मुर आन कली ग्रुम्तीक ताम्बुमी गेय पचा कली इस्राएली नेल्ल आन १० भाग ङा भाग का गेतामी। लेवी २७:३०
22मुल रे इस्राएलीपुकी ग्रुम्तीक ताम्बु आ नेक्था जाक्ने मचाप्नीम। जाक्तेक्म हना, पापम पतीकेमी बेक्नीम।
23तन्न लेवीपुकीमी ग्रुम्तीक ताम्बु ङा गेय पचा माल्नीम। मेकोपुकीमी पाप पाम्तेक्म हना, मेको आंमा कुरचा माल्नीम। मेको इन कली गेना हना यो लीब शेंतीके बाक्ब। तन्न मेकोपुकीमी इस्राएली आन दातेमी रू मताइनीम।
24मारदे हना गो लेवी आन कली इस्राएली आन परमप्रभु यावे कली चढ़ेशो १० भाग ङा भाग का गेतामी। मोपतीके गो मेको आन कली ‘गे इस्राएली आन दातेमी रू मताइनीनी’ देंती” देंत।
25मिनु परमप्रभु यावेमी मोसा कली
26“गे लेवी आन कली ‘परमप्रभु यावेमी इन कली मुर आन गुइ रे इन भाग दुम्चा कली गेशो, इस्राएली आ १० भाग ङा भाग का ताक्नीनु, गेपुकीम मेको रे यो परमप्रभु यावे कली १० भाग ङा भाग का तिल्शा, गेचा माल्नीनी।
27मिनु मेको अन्न नु अङगुर शांबु मुर आन रे चाक्शो भाग खोदेंशो मिम्सीब।
28मोपा गे इस्राएली आन रे ताक्शो १० भाग ङा भाग का नेल्ल रे तिल्शा परमप्रभु यावे कली १० भाग ङा भाग का गेचा माल्नीनी। मेको चढ़ेब हारून कली गेचा माल्नीनी।
29मिनु गे मार मार ताक्नी, मेको नेल्ल रे परमप्रभु यावे आ भाग तिल्चा माल्नीनी’ दे माइक्मी।
30मिनु गे मेको आन कली ‘गेपुकीमी नेल्ल क्येङा रिम्शो भाग तिल्नी नोले, मेको लीशो इन रू रे रुप्शो अन्न नु इन अङगुर रू ङा शांबु खोदेंशो बाक्ब।
31मिनु गे नु इन खिं ङा मुर नेल्ले ते ते जचा दाक्नीनी, मेक मेक जने चाप्नीनी। मारदे हना मेको इन ग्रुम्तीक ताम्बुमी गेय पशो ङा गाल्च बाक्ब। मत्ती १०:१०
32मिनु गे मेको आन नेल्ल क्येङा रिम्शो भाग गेतीके इन कली मारेइ दोस मदुम्ब। तन्न इस्राएलीपुकीम आन परमप्रभु यावे कली गेशो थोव़क दूली पा मचलेने। मो पाइतीनी हना गे बेक्नीनी’ दे माइक्चा माल्नेवे” दे परमप्रभु यावेमी मोसा कली देंत।