NUMERA 18:12-32

¹²Dehoro namo-hereana bona vine ranuna namo-hereana bona uit namo-hereana bae mailai, edia uma anidia roboadia bona edia imea anidia roboadia Iehova bae henia, idoinai vada na henimu.

¹³Edia uma anidia roboadia bona edia imea anidia roboadia iboudiai, Iehova dekena e mailaidia ḡaudia, na oiamu; asi mirodia taudia iboudiai emu ruma ai na bae ani.

¹⁴Gwau-hamata daidiai Iehova bae henia ḡaudia Israel ai na oiemu.

¹⁵Mauri ḡaudia natudia roboadia iboudiai, taunimanima natudia bona ubu-ubu ḡaudia natudia, na Iehova bae henia, iboudiai na oiemu. Ḡautamona, taunimanima natudia roboadia bona ḡau mirodia natudia roboadia na davadia bae kara.

¹⁶Edia mauri huana tamona baine ore ai na davadia bae kara: davadia vada ba gwauraia, silver sekeledia, ima, gabu helaḡana ena sekele heḡereḡerena; una sekele lalonai gera na ruahui.

¹⁷A boromakau natuna roboana eiava mamoe natuna roboana eiava nani natuna roboana na davana basio karaia. Idia na hehelaḡa; raradia na ihaboulaina patana latanai ba nevaria, bona digaradia na ba haḡole oho, bonana namo ḡauna Iehova ena.

¹⁸A hidiodia na oiamu; kemena, e davea ḡauna, bona idiba mamuna na oiamu heḡereḡerena.

¹⁹Herahia helaḡadia, Israel taudia ese Iehova vairanai e dudui isimu ḡaudia, iboudiai name henimu, oiamu bona natumu mamaruanedia adia bona natumu hahinedia adia, umui ahumui ela bona hanaihanai. Ina, na herohemaino damenana Iehova vairanai, oiemu bona oi garamu edia, ela bona hanaihanai.

²⁰Iehova ese Aaron ma e hamaoroa, eto, Oi na emu inoḡo ta basio abia edia tano ai, bona ahumu ta basio abia idia bogaragidiai: lau na oi ahumu, oi na lau dihigu, Israel taudia bogaragidiai.

²¹Israel taudia edia ḡau e karoamu, karoa gwauta, bena karoa ta lau e henigumu, una karoa na Levi taudia; vada na henidiamu, idia ahudia, edia ḡaukara davana, hebou kalagana ai:lau, isiaigu lao henimu dainai.

²²Ina murinai, Israel taudia ese hebou kalagana: basie raka henia kahi, edia kara dika ai bae mase na garina.

²³A Levi taudia ese hebou kalagana ḡaukaradia iboudiai bae kara; kerere ta bema vara, una kerere na idia latadiai. Ina taravatu na do baine hesiriu hanaihanai emui uru iboudiai lalodiai. Israel taudia bogaragidiai idia na asi ahudia.

²⁴Badina be hari karoa ihagwautadia, Israel taudia ese Iehova vairanai e dudui isi ḡaudia, lau ese Levi taudia vada na henidia, idia ahudia; una dainai vada na hamaorodia, Israel taudia bogaragidiai idia na asi ahudia.

²⁵Bena Iehova ese Mose ma e hereva henia, eto,

²⁶Levi taudia na ba: hamaorodia, baoto: Israel taudia edia karoa ihagwautadia, umui ahumui vada na, henimui ḡaudia, bavabi negadia ai na ene karoa ihagwautadia ma ba karoadia, karoa gwauta gwauta, bena karoa ta ta ba dudui isi, Iehova vairanai.

²⁷Bena, ene ba dudui isi ḡaudia na emui boubou ḡaudia ai baela, uit na emui roge amo eiava vine ranuna na emui vine amo boma dudui isi heḡereḡerena.

²⁸Unuhetomana umui na emui karoa ihagwautadia, Israel taudia e henimuimu ḡaudia, na iboudiai ma ba karoadia, Iehova ena dudui isi boubouna na hahelaḡa tauna Aaron ba henia.

²⁹Bae henimui herahiadia iboudiai amo emui boubou ḡaudia ba dudui isi Iehova vairanai: namo-hereadia bona mai helaḡadia karoadia mo ia ba henia.

³⁰Taunabunai ba hamaorodia, baoto: Karoa namona ba duduia isi, bena orena be Levi taudia adia, uit anina ikwadina gabuna amo bona vine ranuna itaolaina gabuna amo heḡereḡeredia.

³¹Una na amui aniani: gabu iboudiai bavania, umui bona emui ruma taudia, hebou kalagana ḡaukaradia o karamu davana.

³²Bena namo-hereana na ba duduia isi dainai umui na ianina ai basio kerere. A Israel taudia edia ḡau helaḡadia na basio abi havara, ba mase na garina.