Miti Mânec 89:2-52

²Aki anonocge dodoma sanaŋ âkendâŋnemeŋ, jauŋ fârige i sambâŋ iŋucne fofo sanaŋ foocmu.

³Go mumeŋ, “Ŋicnane bâwosâepo ehec ʒâʒâfic sanaŋ epec, ehuc kiŋaŋŋic‐nane Dawidi ʒiŋuc âzâcnepo:

⁴‘No ɋâricfâcge jusanaŋkeniŋte mupaŋke‐garekopac, â ŋicwofuŋ ŋeŋege ɋâric gaŋne gaŋne jufeniŋmu, jaŋerao ŋesanaŋkerâ ŋehuc juzejec.’”

⁵Sambâŋne sambâŋne jaŋe, Wofuŋ, gore mâsi bapa mumbiaŋkenʒepieŋ, tiriŋic jaŋere tutumaŋzi jauŋ fârige muafeckezejec.

⁶Sambâŋko mo ŋic mo Wofuŋ gohec sâc hehene? Sambâŋ aŋelo jaŋeraonec mozi Wofuŋ go iŋucne jukac?

⁷Anutu go hâcne aŋelo micne jaŋe araŋ bagareeŋgopieŋ, go rârec bârârec egareeŋgopieŋ, jaŋe siric‐jopahuc qeŋ bipinehec juekic.

⁸O Anutu Tâpiri Ɋuŋɋasaŋ Wofuŋ, go erâ‐eesanaŋgezi rârecguha, Wofuŋ, go iŋucnea mozi tâpirihec jukac?

⁹Goki hâwec qac momori‐ticnere guriŋ baekic, siri‐ticne fahareha goki bâniniŋkeekic.

¹⁰Go Aigita mâreŋ qâŋɋâŋ iŋucne banʒaŋnemeŋ, râsifâcge tâpiri megezi qâtâtiec‐jopameŋ.

¹¹Sambâŋ i gore wiac, â mâreŋ i gorea wâc; sambâŋ mâreŋ â maŋnao wiac fokac i gokizia bâfuameŋ.

¹²Mâreŋ faic â juwic i goki bâfuac‐jofameŋ; Taboro â Herimoŋ jahe ʒeri ehuc ʒâŋege mumbiaŋkeekopirec.

¹³Meombâŋge qac momori‐ticnehec, mege sanaŋne, mefârege bâfeŋnerâ domakic.

¹⁴Tiŋne juju â bâbâtiŋ izi eri ŋeŋegere hobeteŋ, aki anonoc â jauŋ fâri jahe bânie‐gareekopirec.

¹⁵Hombaŋte ofac hehe manaŋgopieŋ jaŋere manape ʒerine ekac, Wofuŋ, ʒâŋe maigere tatamacko juŋgopieŋ jaŋere hâcne.

¹⁶Jaŋe ʒâŋegere erâ dameŋ sâc kiwaeeŋgopieŋ, â tiŋnege muafeckeeŋgopieŋ.

¹⁷Go hâcne eri tatamac‐jeŋic â tâpiri‐jeŋic, aki anonocgere erâ tâpiri‐nâŋeczi fua tâcnekac.

¹⁸Maro‐nâŋec i Wofuŋzi rauckekac hâcne, â ŋicwofuŋ‐nâŋecte ru i Israere tiri Wofuŋzi jukac.

¹⁹Mârâc jaha mitiŋicge maŋko fuac ecnehuc ʒiŋuc âzâcnemeŋ: “No ŋicsanaŋ moc qizecnao eri hendiŋ hecnepo, ŋicguru jaŋeraonec moc bâwosâerâ fekicne âkendâŋnepo.

²⁰No kiŋaŋŋic‐nane Dawidi hâcne bâfuapo, erâ tiri wokemaŋ‐nane ruacnepo.

²¹Menanezi hati jowa qataŋ ecnezejec, meombâŋ‐nanezi tâpiri hecneme huzejec.

²²Râsi moczi e eatuckehuc doc mi bazejec, ŋic sindaŋne moczi e mi bawahazejec.

²³Kisâfâcne mai‐ticnao qanʒaŋ‐jopapemu, â e qaisockeniŋmu jaŋe qâfiec‐jopapemu.

²⁴Jauŋ fâri‐nane â aki anonoc‐nane jahe e qâtehuc juzepirec, â nore ʒâŋeo tâpiri‐ticnezi faharerâ domazejec.

²⁵Noni hâwec meticnere rurumaŋko râepemu, â opâ sâko râcnepe mefâre‐ticnezi soŋaŋkezejec.

²⁶Eki ʒiŋuc nazaocmu: ‘Go mamac‐nane, Anutu‐nane, â bâbâpiaŋ‐nanere qânâ sanaŋ.’

²⁷Â noni e mârâc fufua âkendâŋnepemu, mâreŋ ŋicwofuŋ jaŋere micne.

²⁸Aki anonoc‐nanezi e basanaŋkehuc jowa jupemu, â ʒâʒâfic‐nane i paŋnea focnehuc juocmu.

²⁹Motec ŋosa birifâc‐ticne tofamâc forahuc juzejec, â ŋicwofuŋ ŋeŋe‐ticne keteŋkepe sambâŋte sâc ezejec.

³⁰“Ɋâricfâcne jaŋe sâcmutâc dâŋnane behehuc mumutâc dâŋnane mi bâjâpeniŋmuo,

³¹erâ wâc dâŋsanaŋ‐nane qambaraŋkehuc mumupaŋ‐nane qâsuaniŋmuo ine

³²noni bahac‐jeŋicte erâ kâcbiŋzi bâtiŋ‐jopapemu, â hehesic‐jeŋicte erâ bâʒâic‐jopapemu.

³³E ine aki anonoc‐nane mi jâoc ropemu, me jauŋ fâri‐nane mi omaecnepemu.

³⁴No ʒâʒâfic‐nane mi bâŋgoroŋkepemu, â micnaneonec dâŋ wahawec i mi hetikiepemu.

³⁵No tiri juju‐naneo ɋetickehuc mumupaŋ sanaŋ mupaŋkepo: ‘No Dawidi burec moc mi ecnepemu;

³⁶ere ɋâric biri tofamâc jurahuc junʒepieŋ, â ŋicwofuŋ ŋeŋe‐ticne mai‐naneo ʒoaŋ domakac ere sâc ezejec.

³⁷Mosa râekicne irec sâc ŋehuc juzejec, sambâŋ foocmu sâc ŋesanaŋkezejec.’”

³⁸Eme ʒi ine sifu behemeŋ â suŋgiŋkemeŋ, wokemaŋ ruacnemeŋ ere erâ kimbeŋzi maŋge fusekac.

³⁹Kiŋaŋŋicgehec ʒâʒâfic epic i hetâtiemeŋ, eri hendiŋ‐ticne mâreŋko behetec waha gâpârewec.

⁴⁰Go qânâsac‐ticne qâropie‐fâremeŋ, hae sanaŋ‐ticne hetâtiemeŋ.

⁴¹sicne fotâc eeŋgopieŋ sasawa jaŋe wiac‐ticne fiuckeeŋgopieŋ, digurafâcne jaŋe mu ruruc ecneeŋgopieŋ.

⁴²Râsifâcne mana‐jaretec sanaŋkecnembiŋ, kisâfâcne mana‐jaretec ʒeri bari embiŋ.

⁴³Jei, sâqe‐ticne masune bahasickemeŋ, ehuc ʒikamaŋko dope hutuŋ mi ecnemeŋ.

⁴⁴Meticnaonec ŋicwofuŋ gunu‐ticne batarameŋ, eri ŋeŋe‐ticne hetuŋketec mâreŋko qawec fokac.

⁴⁵Qacfiric jujure dameŋ‐ticne hetâcnehuc fai‐ticnao mimi busâqoc râemeŋ.

⁴⁶O Wofuŋ, go soŋkepaŋkehuc juku mo dameŋko fuacmu? Kimbeŋgere ʒocbâruŋzi wezimucko qaʒueocmu?

⁴⁷O Wofuŋ, juju dameŋ‐nâŋec bembeŋne fokac i manac me, ŋicte ɋâric sasawa sisirowene bâfuac‐nâpomeŋ irec manasuc.

⁴⁸Mozi moc jufehuc juku hâmoc geŋkecneocmu? Mozi juju‐ticne hâmoc haere tâpirire sâcne ŋezickeocmu?

⁴⁹O Wofuŋ, go mârâc jaha aki anonocge Dawidi siocmâc mupaŋkecnemeŋ i fârine weni?

⁵⁰O Wofuŋ, kiŋaŋŋicge nifepupu enareeŋgopieŋ irec manasuc me! Ŋicne ŋicne jaŋere mumusoriŋ dâŋ maŋnaneo bajukopac.

⁵¹O Wofuŋ, dâŋ izi hâcne mimi qaqa enâreeŋgopieŋ, ehuc wokemaŋ ruacnemeŋ e hata jume sâc mimi bâfuacneeŋgopieŋ.

⁵²Wofuŋ muteŋkehuc juzo raŋɋa raŋɋa. Jâmbomac jâmbâŋ.