Buka Linge 89:2-52

²Nimua na dolo ke kabu kasila, ma nimua na vetena ke, sopou ngasi vaghaa na parako.

³Ighoe a Lord, to bosa, “Inau tu baubahu kolua David, a nigua tinoni ni lutu tu vilia, mu papari vania te vaghaa eni,

⁴‘Na lei vinavahuhumu kara vunaghi haba haia tua, ma kara tabe ngasilia na malei sopoumu haia tua.’”

⁵Lord, gaira i kokou tara nighi togotogo, na lei totobo uto to gonighi.

⁶Lord, e taho siki sakai kokou te vaghagho ighoe, e taho ghua hei tadira na lei tarunga vetena ke kaekagemu.

⁷Ta didira vaukolu rana tabu tara talumavagho igaa, gaira udolu tara nigho kikinima ghua.

⁸Lord, God, puku ni maana, taho tua hei ke sule vaghagho ighoe vamua to utuni tana lei totobo soko.

⁹Ighoe to vunaghina na tahi, mana bona te tughuru mai ga na maraghata, to bosa vania na tahi ge beata.

¹⁰Ighoe to lagavulea Rahab, mo havukaghinira ghamua na kana nia na limamu.

¹¹Na maramana i kokou a nimua, mana maramana i ani pari ghua a nimua, ighoe to gonia na maramana talighu mana lei totobo soko ilokana.

¹²Ighoe to gonia i ulu mi boko, na ghotu i Tabor, mana ghotu i Hermon toro holohabaa na ahamu.

¹³Ighoe to loghoa na maana sule ngangata, e sule ngangata na lagamu!

¹⁴Nimua na malei sopou ni haba te uto mu maemane, na dolo mana utuni te tate tana lei totobo uto to gonighi.

¹⁵Holoutora gaira tara rongovi togotogoa nimua hoholo ni holohaba, gaira tara kabu lokana na mararana nimua na veiarovi.

¹⁶Gaira tara togotogo tana bongi mana dani, tara holoutogho ighoe to uto haliu.

¹⁷Ighoe to neghai ge ai lagavule, na lagamami te tuturi kauha ta nimua na veiarovi.

¹⁸Lord, ighoe to heghai gaia te podopodoghai, ighoe God ni Israel to tabu, to heghai mai a nimami vunaghi haba.

¹⁹Tana maturu bole to kokoe vanira nimua prophet i dania, mo ghaghua, “Inau tu hangaa tua na malaghai rongoragha, mu vilia tua tadira na vure subo a gaia ke vunaghi haba.

²⁰David gaia nigua na ghairau tu vilia ge ke vunaghi halikama nia na siusiu tabu tu siuvia nia.

²¹Na laga tu loghoa i tatana haia tua, a nigua na maana ni laga keri ke nea ge ke lagavule.

²²Ghada na kana kara mua tangomana ta tughuru pungisiana, ma rana dika kara mua laga vulea tua.

²³Inau ku turiu lakusara ghana mate tana matana, mu ku havukaghinira tara kanahaghinia.

²⁴Inau ku lutu vania nia na utuni mu ku kabu rurughu i tatana, ku nea ge ke laga vule haia tua.

²⁵Inau ku talua ge ke righitaonia na tahi, maia ghua na lei beti tavetave.

²⁶A gaia ke bosa vaniu, “Ighoe a Tamagu, ma nigua God, Ighoe to righitaoniu mo volau.”

²⁷Inau ku nea ge ke dalegu na kamanagho, me ke haba vulera na lei vunaghi haba ni maramana talighu.

²⁸Inau ku dolovia mu ku arovia haia tua! Ma nigua na baubahu tu nia vania ke mua ghoi soko tua!

²⁹Inau ku nia na vinavahuhuna ge ke sopou ngasi, ma nina malei sopou ni haba te kabu kasila vaghaa na parako.

³⁰Kara ba mua taonia nigua na vetena na lei vinavahuhuna, ma kara mua kabu taonia nigua na huhuli.

³¹Kara ba nighi sika nigua na lei bosa ni tarai, ma kara diui nigua na lei vetena ke.

³²Ge ku hera na totoro te manadira, mu ku ramusira nia nigua na ghai ni raramu.

³³Ku mua ghoi soko tua na doloviana David, mu ku mua ghoi nia ponolio tua nigua na baubahu tu nea vania.

³⁴Ku mua diua tua nigua na bosa ni baubahu, mu ku mua laviolia siki bosa ni baubahu tu bosa horua tua.

³⁵Inau tu nia papari tua na ahagu, me vahola vaniu tua ge ku pegoa David.

³⁶Na vinavahuhuna ke kabu kasila, ma nina malei sopou ni haba ke sopou ngasi vaghaa na aho i kokou.

³⁷Gaia ke kabu kasila vaghaa na vula, te ladavaghiniu mai kokou.”

³⁸Mi ghoe to rutu vania nimua na vunaghi haba vivili! To sogha sania mo nia sika.

³⁹Ighoe to sokoa nimua na baubahu kolua gaia, mo sonihorua ghana pitiulu ni haba tana pari.

⁴⁰Ighoe to durakea na pilupiluna na komuna, mo dikalaa nina vatei polo.

⁴¹Gaira tara haliu i lilighina tara gitoi nina lei totobo, ma ghana komu kolu tara kiahaghinia,

⁴²Ighoe to nera ge ra lagavule ghana na kana! mo nera ge ra togotogo.

⁴³Ighoe to nia nina isi ge mua kale, mo hove na hangana tana sura.

⁴⁴Ighoe to lavikehaa nina malei haba, mo pitihorua tana pari nina malei sopou.

⁴⁵Ighoe to va kukului na bongina tana garimaneana, mo lavi mamaana tana mata ni tinoni.

⁴⁶Lord, engiha vaho ke soko nimua na rutu, te ruruhu vaghaa na lake! ko polo haia tau?

⁴⁷Ko ghanaghanaa na kukuluna na volagu, e taho na pukuna ge puputu mai na tinoni tana maramana eni.

⁴⁸Na lei tinoni udolu ke mate mughua, me taho tua hei ke polo ta nina maana na gilu ni mate?

⁴⁹Lord, ivei gaia nimua na vuivuni ni dolo? To bosaa vania David, ta nimiu padalaghi kaukolu?

⁵⁰Ko ghanaghanaa, ivei tara nea na bosa dikalaamu, inau nimua na ghairau.

⁵¹Lord, ghamua na kana tara bosa dikalau, ra bosa dikala gaia to vilia, mo siusiua tua ge ke vunaghi haba.

⁵²Holohaba a Lord, ke va ma vaa, Amen ma Amen.