Miti Mânec 83:2-17

²Honec me, râsifâcge ojowa qaŋgopieŋ, qaisocgueŋgopieŋ jaŋe pepec eŋgopieŋ.

³Jaŋe ŋicfâcge doc bacjopaniŋte dâŋ birickeŋgopieŋ, sabec‐jopaekic jaŋe wiac ejareniŋte meo roroc eŋgopieŋ.

⁴Muŋgopieŋ, “Ajoc, ŋicguru i omaec‐jopanaŋ, eme Israe ʒâŋe somarezejec.”

⁵Jâmbomac, jaŋe muc manac eku maŋ mocjaha embiŋ, go râsi egarehuc ʒâʒâfic sanaŋ eŋgopieŋ:

⁶Edom ŋicguru â Isimaere ɋâricfâc, Moabi ŋicguru â Hagiri kikefuŋ;

⁷Gebale â Amoŋ â Amaleke ŋic, Filisa mâreŋ â Tiro hae rune;

⁸eme Asiriazi jaŋerao wâc ʒuhuckekac, eki hâcne Lotire ɋâricfâc neŋgoc ŋesiŋ ejarekac.

⁹Go mârâc Midiaŋ wiac ecnemeŋ ijaha ejarezemec, erâ Sisera â Jabiŋ Kisoŋ opâo ejactemeŋ iŋuc;

¹⁰jaŋe Eŋdoro hae ŋifecnao bâsirowec‐jopatec, sahac biuc‐jeŋiczi mâreŋ irec guec ewec.

¹¹Ŋicbomboŋ‐jeŋic Orebe Ʒebe jahe iŋucne enʒepieŋ, â micnefâc‐jeŋic ine Ʒeba Ʒalimuna jahere sâc.

¹²Jaŋe hâcne mumbiŋ, “Anuture gie hata sakarepene nâŋâcne ezejec.”

¹³O Anutu‐nane, goki mutec rehac hâmocne me padi jawa mâŋâŋzi ficne sueekac iŋuc enʒepieŋ.

¹⁴Ʒoczi jâckâte ʒâseŋkeekac, â ʒocbâruŋzi sopâc tiki bârârâŋneekac,

¹⁵irec sâc bâbâricgezi jâpec‐jopazejec, â mâŋâŋgezi bipic tatara bâfua‐jarezejec.

¹⁶Mimizi ʒâŋe mai‐jeŋic bâsoŋkeme, Wofuŋ, gore ʒâŋe wâsickenʒepieŋ.

¹⁷Mimizi fai‐jeŋicko ferâ fohuc juzejec, erâ ŋecjopakume omaenʒepieŋ.