Miti Mânec 81:3-10

³Mosa wahaocmuo qeŋ dâŋezejec, erâ wâc hombaŋ‐nâŋecko, toŋ heocmuo mâmâc.

⁴Israe kikefuŋ iŋuc mutâcnecnewec, Jakobore Anutuzi mupaŋkewec.

⁵Aigita mâreŋ maickehuc faharewecko, Josefe sâcmutâc iŋuc ecnewec. Dâŋ moc hazec furu‐nane manakopac:

⁶“Ɋawegao tagi fowec i qatarapo, megao sasac fowec i gowac ropo.

⁷Ʒâicmaŋko wira‐naretec baficgupo, ɋuŋ parandaŋte haesoŋko juhuc mana‐garepo, Meriba opâo esâicgupo.

⁸“Gurufâc‐nane, manahapie uŋ ŋazape; Israe guru, dâŋnane mananʒapiŋ me!

⁹Ŋoŋe nemu jabane moc mi bajunʒepieŋ, guru moc jaŋere nemu mi dapecnenʒepieŋ.

¹⁰Wofuŋ noni gore Anutu jukopac, Aigita mâreŋkonec jowacgu warepo no hâcne; go micge aŋketec bâfuse‐garepe.